am

كلامي لعيالنا.. شباب وبنات كليات التقنية العليا 🎓 ​أولاً: مقدرين جداً صدمتكم من موضوع تطبيق نظام "الكيرف" وتغير درجاتكم فجأة (نزول الدرجة من A إلى C شيء يقهر ويزعل، ومن حقكم تماماً تتضايقون وتطالبون بالتوضيح والإنصاف). ​ثانياً: لكن اللي نرفضه وما نقبله عليكم، هو استغلال هذا الغضب من حسابات محسوبة على الإعلام المعادي (مثل حساب الإمارات 71 وغيره). شفت تفاعلكم وإعجاباتكم على تغريداتهم، وأنا على يقين إنكم تتفاعلون بحسن نية ومن حرتكم على تعبكم، بس هم "عرفوا من أين تؤكل الكتف"، ويلعبون على وتر العاطفة! ​ثالثاً: هذي الحسابات (وحسابات تنظيم الإخوان) ما يهمها مستقبلكم ولا درجاتكم، همهم الوحيد اصطياد أي مشكلة أو استياء داخلي وتوجيهه كأداة لضرب مؤسسات دولتكم..نحن دوم نراهن على وعيكم التقني والفكري، فلا تخلونهم يتسلقون على أكتافكم. ​رابعاً: حقكم ما بيضيع في بلادكم. عندكم قنوات رسمية للاعتراض: تواصلوا مع إدارة الكلية، مجلس الطلبة، وقدموا طلبات تظلم (Appeal) رسمية. عبروا عن استيائكم بالطرق الأكاديمية الصحيحة اللي تحفظ حقكم وترفع صوتكم للمسؤولين. ​خامساً: وعّوا ربعكم، احذفوا أي تفاعل مع هذي الحسابات المشبوهة، وخلونا نحل أمورنا في بيتنا الداخلي. الموضوع وصل للجهات المعنية وبيندرس بإذن الله. ​سادساً: لا تخلون هالموقف يكسركم أو يحبطكم، وفالكم التوفيق.. الدرجات تتعوض، بس الوطن ما يتعوض! 🇦🇪🤍

يوم بيكون حد من عيالك مكان الي انظلموا بتحس 🙂 الله يحفظ بنتك و عساها دوم تحافظ ع مستواها و مايجيسها نصيب من تلاعب الدرجات👍🏻 بنت اختي انظلمت بعد و درجتها كانت شي و ردوا حجبوا الدرجات و لعبوا فيها و تغيرت و صح مانزلت وايد لكن مش الأولية و دومها من المتفوقين الحمدالله 🙂 الله يهديك لكن الاستهانة بحزن طالب علم مش حلوة منك إذا انك اب و تحس 👍🏻

بعد الغدرة اللي صارت كلنا نوحد الدعاء لإخواننا فكلية التقنية يمرون بضيق لا يعلم فيه إلا الله

مب حلوه انه طلاب شادين حيلهم وتعبانين عشان يرفعون الGPA وانضغطو بالقوانين اللي تطلع فجاه وحاطين طاقتهم كلها عالكليه، واخر شيء ايي شخص بكل برود يتهم طلاب كلية كامله بانهم "مهملين" لانه بنته درجاتها عاليه، ما أتوقع انه في مهمل بيحتشر عالدرجات، المهمل اهم شيء عنده يعدي الماده وخلاص

هل انتو تحطون القوانين بكامل قواكم العقليه ولا تتمصخرون؟ يعني مختبرين ميد لكل المواد في أسبوع، والأغلب مختبر 3-4 مواد فيوم وكل ماده أصعب عن الثانيه وكل ها عشان بس تكلمون الخطه اللي حاطينها بدون مراعاة الطالب وفوقها مخبصين فدرجاتنا ؟🫠🫠

عندي سوال قدام ربي شو بيكون مبرره شو بيقول الي حط النظام هاذا ظلم في حق طلبه مب طالب سابقًا كانت من أفضل الكليات، أما حاليًا فأصبحت من أسوأها من جميع النواحي. لو ابدا اقول الي مريت فيه ما خلصت اسوء مرحله في حياتي هي اني درست عندهم ما اتوقع بتذكرها بخير اقيم التجربه 0

نحن ما نطلب شي فوق حقنا، نبا بس نشوف تعبنا وجهدنا منعكس في درجاتنا، عشان نحس إن كل السهر والتعب والضغط اللي مرينا فيه طول السمستر ما راح هدر. الطالب يوم يجتهد، أقل شي يتمناه إنه يشوف نتيجة تنصف تعبه! #كليات_التقنية #HCT

الله يعين طلاب التقنيه لا مب على كليتهم بس على التعليقات المستفزه و الي عباره عن ثقالة دم لا اكثر ولا اقل، بعض الناس يتعمدون يشاركون في مواضيع معينه عشان يغثونا بفلسفتهم و ثقالة دمهم بس

@alnuaimi_mayed @kindah11 ها النظام مايمشي فالتقنيه ياما اشتكينا أنا خريجه شكثر شاكين ولا مره خذت حقي فالتقنيه لان الكل يتجاهل ماوصلنا لها المرحله إلا لان مب قادرين نوصل صوتنا ترا

كليات التقينه العليا انخفاض كبير في درجات عدد من الطلبة دون أي توضيح رسمي. من حقنا معرفة الأسباب والحصول على الشفافية والعدالة. نطالب برد رسمي عاجل ومراجعة الدرجات لضمان عدم ضياع حقوق الطلبة. @HCT_UAE @mohesruae @Faisal_Alayyan #راجعوا_الدرجات #حقوق_طلبة_كليات_التقنية_العليا

يرجى فتح تحقيق في موضوع درجات كليات التقنيه لمعرفة الحقيقه كامله وكشفها بدون هذا التحقيق سيستمر التخبط العشوائي والظلم ضد طلبتنا @MohamedBinZayed @HHShkMohd @MOEUAEofficial @ABZayed

إلى كليات التقنيا العليى نتمنا مراجعة الدرجات بسبب تعرظنا للضلم #راجعوا_الدرجات #حقوق_طلبة_كليات_التقنية_العليا ولا هذي الحركة بس حق المدارس ؟

لا والف لا يعني حدث العقل بما يعقل اذا كانت درجاتي ما تنزللللللللل عن 85 في المشروع و الامتحان هل يعقل اني استحق C هل في نظرك هاذا منطقي لايجود منطق اتمنى اذا كانت بنتك من سعيده الحظ و يعل ربي يوفقها دوم ما تاثرت فااتمنى ما تتكلمون بلسان الطلبه الي تعاني و شكراً

إلى كل من يشكك في اجتهادنا خلال هذا العام الدراسي: عندما بدأت الظروف الاستثنائية، كنا في الأسبوع الثامن من الفصل الدراسي، وهو الوقت الذي تبدأ فيه الاختبارات الأولى. وللتوضيح، في كلية الهندسة يعتمد التقييم بشكل أساسي على الاختبارات، أما المشاريع فتكون للمواد التي تتطلب شرحًا أو عرضًا من الطالب. في ذلك الوقت لم نختبر، وإنما استكملنا الدراسة بشكل طبيعي. وبعد صدور قرار العودة الجزئية إلى الجامعة، ما زلنا لم نقدم الاختبار الأول. بدأت الاختبارات في الأسبوع الثالث عشر، مع العلم أن الاختبارات النهائية تبدأ عادة في الأسبوع السادس عشر. خلال أسبوعين قدمنا الاختبار الأول لجميع المواد، ثم خلال أسبوعين آخرين قدمنا الاختبار الثاني. وبسبب ضيق الوقت اضطرت الكلية لإضافة أسبوع إضافي بحجة منح الطلبة وقتًا كافيًا للدراسة. لكن هل طُلب منا الحضور إلى الكلية رغم أننا أنهينا شرح المنهج؟ نعم. هل كان لدينا وقت كافٍ للاستعداد للاختبارات النهائية؟ لا، لان كان الحضور إلزامي. كان آخر يوم حضور لي يوم الخميس، وبدأت اختباراتي النهائية يوم الجمعة مباشرة. وحتى أعضاء هيئة التدريس لم يكن لديهم القدرة على تغيير هذا الوضع، لأن جميع هذه القرارات جاءت من الإدارة. وللتأكيد: - لم نقدم اختباراتنا من المنزل. - لم تكن هناك مشاريع أو تقييمات عن بُعد تُحتسب لنا. - جميع الاختبارات أُديت حضوريًا داخل الكلية وأمام أعضاء هيئة التدريس. وما أقوله هنا ليس تبريرًا للدرجات، بل توضيح للواقع الذي عشناه. لم تكن هناك أي مراعاة حقيقية للضغط النفسي الذي تعرض له الطلبة، وكل درجة حصلنا عليها هذا الفصل كانت نتيجة جهدنا وتعبنا داخل قاعات الاختبار، وليس خلف الشاشات. إذا كانت هناك مشكلة في تضخم الدرجات، فأبلغوا الطالب منذ دخوله الكلية أن ترتيبه ومستواه قد لا يكون لهما قيمة، وأنه قد يحصل على درجة أقل فقط لأن عددًا كبيرًا من الطلبة حققوا درجات مرتفعة. الحقائق باختصار: - تم تغيير الدرجات والمعايير خلال أسبوع واحد فقط. نطالب فقط بأن يتم الاستماع إلينا بإنصاف، وأن تُتخذ إجراءات عادلة تجاه ما نواجهه @HHShkMohd @MohamedBinZayed @ABZayed @faisalalayyan @HCT_UAE @mohesruae

@HCT_UAE نرى أن الدرجات المعلنة لا تعكس جهدنا الحقيقي طوال الفصل الدراسي، وتم تعديلها بشكل مفاجئ ودون أي توضيح، على أي أساس صار هذا التغيير؟ انخفضت درجاتي من A إلى مستويات أقل!!!وأنا خريجة وهذا آخر سمستر لي، والتغيير هذا مأثر بشكل كبير. هذا ظلم واضح ونطالب بتوضيح رسمي ومراجعة للدرجات.

حسبي الله ونعم الوكيل على من ظلمنا، وأسأل الله العظيم رب العرش العظيم أن ينصرنا ويُظهر الحق، وأن يرد إلينا حقوقنا ردًا جميلًا، كما نصر نبيه يوسف عليه السلام وأظهر براءته، اللهم إنا نشكو إليك ما أصابنا، فأنت خير من يُلجأ إليه، وخير من ينصر المظلوم. @HCT_UAE يعل ربي يعاقبكم

طلاب التقنية ( البعض ) منهم مب الكل عشان محد يتهجم ، راقدين طول السمستر ، غياب ، حتى اونلاين مايحضرون ، ماعندهم اندفاع تعليمي ، ولايبون يتعلمون ، وكل شوي يحشرونا يبون اونلاين في الكومنتات هم ومال المدارس المراهقين ويوم نزلت الدرجات قاموا يصيحون 🤷🏻‍♂️

بعيداً عن انه مايخصني في الموضوع.. بس اختي ماشاءالله تبارك الرحمن وايد شاطره وتحب تخصصها ومعدلها امتياز، تخيلوا معدلها نزل من المصخره اللي صارت!!! وانا مسفرتنها تغير جو تنكدت في نص السفره 🙂💔

إذا الطالب المواطن اليوم يشتكي من الرسوم ومن تغيير القرارات كل فترة، لازم حد يسمع له مستقبل البلد يبدأ من تعليم عياله، مب من تحميلهم أعباء أكثر كل سنة #الجامعة_الزرقاء #الامارات