الشاعره بنت ابوها

#بنت_ابوها

حفنة مبادئ لمها علم الانساب بنيتها طيب ونقا واهدمتني تصوروا حتى أحاسيسي أغراب وحتى جروحي بالظلايم خذتني هبت الشقا وأنا قويه ولا اهاب حسبي على دنيا الشقا وهقتني أنا ولو كلٍ حما ظهره القاب بيض النوايا بالنقا حاميتني أشوم بإحساسي واعلق بمرقاب وأبيّح اللي بالحشا مو جعتني البارحة تصوروا دمعي انساب ضعفت للعبرات يوم خنقتني ما أدري وش أبكاني وأنا أرحابي رحاب لو أطلب الدمعه تهل اسفهتني ذرفت دمعة غبن لا لوم لا عتاب ذرفتها وارتحت بس ..ذبحتني #بنت_ابوها

تمطر وانا تمطر حواليّ بلهود لا اونس مطرها لا ولا اسمع رعدها ماكن فوق الأرض ذي حي موجود ولا اشعر بهالدنيا ولا ارجي رغدها ليت المطر يغسل معاليقنا كود ندله وننسا ماعثا من مددها بركود ياصكات الأيام بركود معاد نحصي لا تراكت عددها صرنا صخاف قلوب لو نسمع رعود هلت دموع العين واركت جهدها في راس رجم يمرك عدود وبدود تشيب منها قذلةٍ في مهدها ما تنفعك القاب واقراب وجدود ولا تسندك لو كنت دايم سندها تجتاحك الضيقه بلا اذن وحدود ولاتقفي إلا بعد يصمل وعدها لو فجرها يعرف تفاصيلها السود ماغابت الشمس وتناما سهدها مريت في دربٍ طويلٍ وملدود مرارته تنسي الحليمه ولدها وبكيت واجهشت البكا في رجا جود ربٍ يبعثر ضيقها مع نكدها وينبت على رجم الوجع عشب وورود وتزهر بطيب ايامه اللي فقدها ياليتها يوم انكفت ما اخذت العود اللي يذريني سمايم لهدها متن الرجا من بعد ماراح مهدود تبين سطوات المتون ولهدها وراحت معه مليحة القلب والعود ولعاد للدنيا طعم من بعدها فديتها باللي وطا الأرض وتعود واعيد معها الذكريات وسعدها ليت المطر يغسل معاليقنا كود ندله وننسا ماعثا من لهدها #بنت_ابوها

يارب .. يارب البشر مامعي شيّ الا الدعاء وطامعه بإستجابه مرت شهور وهي مثل ماهي بهيّ من بعد ماهي كبرياء وذرابه ياليت كل الآمها الموجعه فيّ ولا تعاني مالها من طبابه #بنت_ابوها

ما اصعب من الانتظار الا قسا الانتظار لاصرت بين الحياه .. وبين آهاتها طفلة مطر هاديه نسمة حنان ووقار هد المرض كتفها واستنزف احلامها يارب لطفك بها من كل مؤلم وضار يارب لطفك بها من وجعة آلامها #بنت_ابوها

ابختصر هالحين كل المسافات إلى هنا والحمل يصعب عليه ضيم السهر له في جبيني علامات بالعنبو مجنا الهوم الخفيه تعال دام الهم ماله نهايات طبطب على روحي واحظن يديه ازرع يدك بين الضلوع النحيلات وإلمس وجع ضيم الظروف الرديه مافيه عرقٍ ماثنته المغلات حزمة مشاعر بس ماهي خليه كثر الهموم اللي بجوفي أصيلات تدرهم جيوش المواجع سريه لاضاقت بوجهي جميع الفضائات تدن لين تفتق الراحبيه خلك من اللي فات اليوم بالذات ماشفت أنا اسوأ منه وماشفت زيه لي شايبٍ يطري علي كن مامات وأحس روحه من حوالي حيه أرفع يدي لله بكل الصلوات إنه يطمن زفرة الوجد ليه أنا لحالي بين أربع محيطات بس اشعر إني فيك دايم قويه مدام دربك ينتهي بالبطولات خذني على دربك بحب وحميه مالي ملاذ إلا إنت وسط المتاهات ومالك وطن بالكون إلا هنيا👈🏻❤️ وإلا الغلا.. كلي لقلبك محطات من هامة العشق لمواطيه ذيه حتى ايش لو مر المحبه جراحات وإلا حدينا قام يجرح خويه إن عودت للجد راحت سلامات غاليك مالامك على أدنى خطيه راهنت بك ماضعت بين إحتمالات بس إن غيثك مالحقت برديه لالا..لحقته بس جدت جديدات سوالفن مابين روحه وجيه لمعة جبينك مع نجوم المجرات بأقصى الحنايا تلتعج بك ضويه تعال عشني لا تطول المسافات إلى هنا والحمل يصعب عليه #بنت_ابوها

تنام الرياض وخاطري بالشقامانام اقلب بصفحات المواجع واساهرها على طاري الاحلام .. وش جابت الاحلام؟! مساحات ضيقٍ جابت الروح لآخرها ولا يكسر الخاطر الا كسرة اللي قام يبي حمل الهموم ،، ويوم جاها تكابرها عجاف السنين ثيابها مالها اكمام تغطيك .. ويدينك عنا الهم حافرها انا قبل ماكنت اعرف ان البشر احجام واثر بعضهم خلقه كذا اللّٰه عاثرها تعال استرح خلك من مصافح الاقزام تموت الليال الغبر مامات فاجرها تعال ارتكي جنبي وإلا قلت لك قدام تراكا ،، وقل بعض المواضيع خابرها خطانا بيدنا بس وش دخل الأيام ولاضاقت الدنيا ولا شان خاطرها انا وانت يالحظ ان تصافينا فلاننظام لو النفس تصخف ما تحرك مشاعرها وانا بعد موتة شايب لي غديت حطام من اربع سنين النفس والهم فاطرها تعبت ارخي الحبل ويشدونه الظلَام دنافيس ناس ٍمعمي اللّٰه نواظرها ابسأل عليك الله ماتعبت الاقدام احث الخطا للغيم ويشح ماطرها ابسأل عليك اللّه من نكس الأعلام خيول الشقا ترهبك دبكة حوافرها ونين التعب من فوق صدر الأمل إجرام تمرك قلوبٍ ونتك .. ماتكاثرها وتدري.. أنا لو شمت دمع الرجا ماشام لناسٍ بصدري مابقا الا مقابرها وعلى طاري الأحلام ..وش جابت الأحلام؟؟ مساحات ضيقٍ جابت الروح لآخرها #بنت_ابوها

هذاك في قلبي علي كثر اساميه عجزت لا القا مايليق بجنابه هذاك من يلمس حروفي بأياديه صارت حروفي في يمينه سحابه هذاك اصلا من كثر ماني اغليه اغلي اثر خطوته واغلي ترابه #بنت_ابوها

كل عيد والغالين فالقلب غالين وكل عام في شوف الحبايب تبارك اللي بجوف صدورنا عنه دارين نفتح لهم باب الغلا ونتشارك #بنت_ابوها

حنا نصوم بدون شوفك من سنين ونحس ضيقة صدر بس وتعدّي والليله الضيقه من الصدر للعين وثوب الحزن ضيق ولاهوب قدّي يابنت مسلط ليتك بجنبي اللحين نصوم ونصلي الفروض ونمدّي #بنت_ابوها

كل عام وانتم ياحبايب حبايب من خلقة الدنيا .. الى وقتنا اللحين شهرٍ فضيل نحث فيه الركايب بالذكر والدعوات والطيب والدين #بنت_ابوها #رمضان

الليله .. ابرد ليل مر بحياتي من ليلة الذكرى الى ليل هاللحين لين السما وصلتها ملحماتي ومدري متى صار انقلاب القوانين المخرجات مخالفه معطياتي والا النتايج واضحه بالعناوين من جيت للدنيا معي صولجاني ومعي قصيد وقلب واحساس ويمين ومعي مبادي للترف والأماني ومعي دموعٍ مالقت دربٍ لعين لكنّ ليل البرد مليان .. اغاني من لين تسمعها الى مدري لوين #بنت_ابوها #موسكو #روسيا

لي قلب لكن طيبٍ حيل حساس .. ياكثر جمرٍ في طريقة وطاها اسوقها مطراش وانكف بالافلاس .. واسج وانسى ماجروحه وطاها هو ياس ؟؟ لا لا ماطمع فيني الياس .. شمع الامل ماذاب ليلة عناها ابني واحسب اللي بنيته علي ساس .. ولاهبها الغربي تطابح بناها #بنت_ابوها

غرقت مطر هالبلد وانا غرقت بحنين وش ينتظر من يتيمة اب هذا المطر #بنت_ابوها #المطر

ما تطول السالفه وانا اخت بدوا ثم ليال الوجد.. هالصبح يحسمها كل رحلة شوق عادت دون جدوا باحترمها دام ربي ماقسمها #بنت_ابوها

ابشرك من غبت مامره اشتقت ولاجابتك ضيقات صدري ببالي والليله ايبله تذكرتك وضقت ياكثر ماانت اليوم بالذات غالي #بنت_ابوها

احتاجك اليوم كثر احساسي من اول تعال طبطب علي انا ارهقتني السنين مليت اوّقف قلوب الناس واتسول كل الشوارع بعد غيبتك ضجت حنين #بنت_ابوها

تكتبك في تالي الليل المشاعر بالخفا تكتبك ماهو في حضورك في غيابي .. بس ليله صير شاعر ترجم احساس الوله واحساس جورك #بنت_ابوها

لا تحسبني اعاني بعد فقدك سنين والا غيابك بليله هز فيّ شعَره لكنّه الفقد يملا كل ليلي حنين خذ عني الليل وافقد غاليك واشعره #بنت_ابوها

ماخذاك الشوق لحظه وانت مارق يم بدوٍ كنت تحلف في غلاهم ياخي اسأل حتى لو انك مفارق قول عشرة عمر تجبرني علاهم #بنت_ابوها