᷂هـشيـم

اللَّهُمَّ اغفِر لِي ولِو الدَىَّ ولِلمُؤمِنينَ و لِلمُؤمِنات الأحيَاء مِنهُم والأمُوات

انا استودع الله فيك ياقلبي المخطوف وداعة من مسلّم حياته من البارح مع الفارع اللي تجعل السمع مثل الشوف ووجهٍ يرد الجرح من نيّة الجارح تلافح بروحي كنّها ماتعرف الخوف وادوّر مماتي من يديها وانا فارح ولا عاد عندي شي غير انّي الملهوف خذتني سواة الانتباهه من السارح

مياسة القد في قدك يطول الكلام على سبيل المثال وفي سبيل الحصر يحسْب بقيراط مايحسب بكيلو جرام ماينحني للهزيمه ينحني للنصر ان مال لي ياسلام ولااعتدل ياسلام يميل قلبي لو اكابر واثابر واصر حاولت اسوي مثل يوسف عليه السلام لكنك اجمل بواجد من عزيزة مصر !

فدا وجهك صواريخ النساء ومسيّرات ايران وفداك اللي يحسّب ان الحروب اخطر من فتونك .. ولولا إن ب أرض الجوف صقور وجند ابو سلمان لـ أقول الطايرة طاحت بعد ماشافت عيونك

يا باهي الحسن لا بعدك ولا قبلك مراتع الريم سيدها .. وقايدها القلب والروح والألبيات تطرب لك والله ما يزهى حلاك الا جدايدها وشلون تحسبني أبنساك ؟ ياخبلك لولا محبتك ما اجمع فرايدها يمديني اقرا عليك الشعر واسهب لك دام ابتسامتك ما خلت عوايدها اعرف وش يجوز لك واللي يناسب لك ارمي على الشارده واجيبك صايدها اجيبها تشبهك .. تقول تقرب لك عمرك سمعت بقصيده تشر بيدها ؟ خذها عساها تعانق حسنك ونبلك قريحتي فيك ما شابت قصايدها شاعرك عيده معك لا قام يكتب لك بعدين يفضى لخلق الله .. يعايدها

روحها من خِفّها لا هبّت النسمة تطير وفكرها علّق على متن الشموخ خصالها واضحة تسكب رذاذ العطر بأنفاس العبير غامضة من ثقلها يحتار فيها ظلالها يغرق أجزل بحر شعر فـ بحر عفّتها الغزير كل ما ينبض خجلها يرتعش سلسالها بنت شعر وأم طهر وأخت للبدر المنير فاتنة تجلس على عرش الكمال لحالها

أحس إنك مثل قمرا .. تبدّد ليلتي بالنور تباهى في سماي .. وتستفزّ الأرض وسراجي وأنا لولاك ما عشت الغرام .. ولا كتبت شعور ولا غنّيت لي شعرٍ ، لبس في حبك التاجي

يا ملهم عيوني للسهر غايب وموجود طواريك ما غابت لو أن شوفتك غابت تشبب على قلبٍ رهيفٍ وعقلٍ عود لو العقل شايب رغبة القلب ما شابت لـ ذاب السحاب اللي تزفه هبوب النود يذوب الصبر مثل السحابه ليا ذابت معي كلمة ما أملك عليها صريح وعود أحاضي عليها مير لا أخطت ولا صابت انا اهاب من ذكراك ماهاب يوم تعود ترى ذكرياتك تفتق الجرح ماهابت على جمرة الفرقا محبتك كسرة عود أخاف الجروح تشمها مابعد طابت ضحايا الحروب تهون مع ناعسات الخود عن الرمي في قلوب العشاشيق ماتابت نواياك بيض وفتنتك فـ الرموش السود وانا هقوتي في فتنة الرمش ماخابت قساوة هدب عينك مثل قدحة العبرود مع ان وجهك الطف من غصين الروى النابت تبيح السراير يوم رتم الفراق يزود وانا شيمتي عيت على صدري الكابت غيابك كتبني شعر والمفردات شهود وش اللي يغيب ضحكتك والوفا ثابت أحنك مثل ما أحن وجهي من المنقود وأعدك ليا عديت الأيام وش جابت

عاتبيني كان ما ألبستك من الود ثوب وإعذريني لو تماديت في ساعة غضب والله إن ماني على كية الحب مغصوب غير ما عينت مثلك على الكون الرحب لك كلام أعذب من الما ولك صوتٍ عذوب يشهد الله كنه العافيه ، عقب التعب ولي خفوقٍ عن محبتك ، عيا لا يتوب جنته وصلك ، وفرقاك سوء المنقلب

عليك يتبارك جعل سود القلوب فداك وجعلك .. من اللي كل عامٍ يصومونه

عسى العمر وتفاصيله من أوّل حبه وتاليه فدا ضحكة محيّا وجهك وتنهيدة إحساسك ليا عاث الزمان بصبحك و نورك عجز يمليه أخذني عن ليالي مظلمة بالحيل مقباسك أحب اللي تحبه و أكره اللي يمكن تعاديه ولا باقي سوا أحارب عن ظنونك و وسواسك

يالفاتن اللي صغت لك اغلى النوادر والطروق ماترأفين بحال من صابه على الضلع رهوه؟ ولا زآل يتبع هقوته والناس تتبع ل الوفوق وما جابتك هقوه كثر ما جات سجه وفهوه مشتاق لك والشوق ناطورً على باب الخفوق مافاد فيه الصلح والضيقه ولا كل شهوه وش حيلة اللي صبّ لك كل الشعور من العروق وما عاد خلال الاوادم كثر فنجال قهوه

من محطات الليالي ودورات الفصول أنتي أصلاً في حياتي . . محطه فاخره ٰ مابقى للحب عقبك على صدري ميول كل عرقٍ ينبض الحب لجلك . . ذاخره ٰ لو يرد العمر . . والله يا الظبي الجفول لـ أعشقك من أول العمر ، حتى اخره

سلامي سلام العشق ولا سلام إجلال عموما ياحلو إسمك ليا مرّني ذكره عيونك ليا من سلهمة رمشك القتال مثل عين حرٍ بين ملواحه و وكره حّمار الشفايف كل ما جات ف الفنجال يزود القناد وتبتدي حالة السكره حلا وجهك إللي بين مبسم و حبّة خال ولا فيه وجهِ مثل وجهك على فكره

يفدى مواعيدك شعوري فالبداية والختام والعُمر لا من ضاع معك يضيع جعله مايدّل واجد حديثي عنك في روحي عدا روحي الملام انا أحبّك .. و اللي يحبّك حبيبي ما يملّ معاك انا اقبل الإختصار بكل شي إلا الكلام خير الكلام بـ صوتك المعزوف ما طال ودلّ

رقيبي الذاتي مسوي وزارة دفاع لو القصايد نخل وعذوقها يانعه وان قلتوا العذر مايشبع بطون الجياع قلت القريحه مهيب تطيع ومسانعه اصد واقفي من الزحمات والاجتماع واقول نفسي عيوف وطابت وقانعه واثرني اعيش مع عقلي وقلبي صراع قلبي يبي شي من عقلي وهو مانعه اخاف من طاري الفرقى واخاف الوداع حسبي على صوت ابونوره وابن مانعه

كيف بالله ودي اوصفك يا راع الجمال وانت مالك بالوصف وصوف ولا شباه!. كل ماحاولت ابكتب بحسنك يا العقبال اشهدني ماقويته وبوحي ما اقواه حسنك طاغي طغا فوق همات الخيال شتت التفكير والعقل مدري ما دهاه كيف ابوصف في جمالك جمال مايقال كيف ابوصف في حلاياك يامال الغناة لو ابوصف في عيونك للعيون الغزال استحي لاجيت اشبهك بعيون المهاه

من جمالك من يلومك بـ الشموخ و بـ التباهي مالقيت لوجهك مشابه على وجه البسيطه في قوامك مايثير القلب ويشد انتباهي جيتي بـ تاج إمتلاك الزين ماجيتي وسيطه من يشوفك لو حفيد متعّب عزوم الدواهي مستحيل انه يقاوم سلطتك ! و انتي سليطه

مرحبا يا أطهر من الدمع في عين اليتيم لا لمح زول أمّه وقام يجهش في بكاه مرحبا يا أصفى من البدر فالليل العتيم يا ألطف من الماء ليا سار فالجوف ورواه مرحبا يا أغلى من الصيب في عين العقيم يا سبايب فرحة القلب لا طوّل عناه

راح ليل ، ولاح فجر ، وحرّك الشوق الحنايا والهوى مثل الاسير اللي مايدري وش مصيرة ودي اصافح يد الفرحة و ابادلها التحايا وابتجح مثل الامير اللي خطب ودّ الاميرة واتفقّد نور وجهك في الدروب وفي الزوايا والمحه في كل عفريّة و ريمٍ مستذيره وش يفيد الشوق لو ما يكسي قلوب العرايا ؟ وش يفيد النور لو ينقاد لـ العين الضريره ؟ انتي اسمى من هوى النزوه و اعزّ من الحمايا في عيون الفارس اللي سلّ سيفه من جفيرة " وان ظفرت بـ بقبلةٍ من ثغر معسول الشفايا ليه لا ؟ و انا الكبير اللي طموحاته كبيره ! " بين عذبات الوصوف وبين ترفات الصبايا شفت في وجهك ملامح سكرة الموت الاخيره وان تمعّنت التفاصيل الصغيرة والحلايا ضعت مابين الحلايا والتفاصيل الصغيره في عيونك ما يورّد عاشقك حوض المنايا وفي قصيدي ما يغيّر خارطة شبه الجزيره غبتي وباقي لك بـ صدري من اللهفه بقايا ياسرابٍ ماتت احلامي على رجوى غديرة لو ما تلهمني الصبر ذيك الرسايل والهدايا مت حزن ومت شوق ومت غبن ومت غيره

يموت الشوق في راحة يدينك والوعد ما زَل أمانه دثّريني من عذاب الشوق بـ أحضانك على بحرك غريقٍ ما يشوف إن المراسي حَل لقى دافع حياته .. موته لـ لولك ومرجانك يقولون النفوس تمل ؟ لا والله ماهي بـ تمل حشّى من يملكك ما فكر بـ غيرك ولا خانك