نايف المطيري🇬🇧.

اللهم ارحم أبي رحمة لم يدعُ بها داعٍ ولم تخطر على قلب بشر اللهُم آنس وحشته في قبره وإجعله في نعيم مُترف واكتب له جنة عرضها السموات والأرض.

توك تجي وتقول يا صاح وش فيك
توك تذكر لك وليفٍ نسيته أنا الذي من كل الأعماق شاريك
وأنا الذي لا من بغيته لقيته وأنا الذي ردي على نداك لبيك
سويت بي شيٍ وأنا ما هقيته يا للأسف يا زين خاب الرجا فيك
قلبٍ صفالك في يمينك كويته لا تعتذر قلبي من العام ناسيك
خلك مع اللي بعتنا واشتريته من أولٍ أبيك واليوم ما أبيك
هذي نتيجة دربك اللي مشيته ماني مجازي فعلك الله يجازيك
قلبٍ وفالك للأسف ما وفيته وش عاد تنفع قولت أهواك وأغليك
خلاص حبك بعد صدك طويته أنشهد إنك طحت من عين مغليك
خلك مع اللي بعتنا واشتريته

يالحب الأول جاك حبٍّ يغطيك حبٍّ مسح بالذاكرة كل ذكراك خلّاني أنسى ما مضى من لياليك وخلّاني أنسى سيرتك وأتناساك مثّلتها مع شخصٍ همّه يعاديك وهمّه يجيب العيد من عقب فرقاك ودّه على شيٍ يجيني وأخليك مدري وش اللي جابره يوم عاداك ما فيه شيٍّ إلا وهو جايبه فيك ينقل كلامٍ بالغلط ويتبلاك يبي يشككني وأنا بدون تشكيك ما تدخل الشكّه خفوقٍ تمنّاك لا قال شيٍّ قلت يا حيّ طاريك أحرق خفوقه وأدعسه بس لرضاك أسجّ ثم يقول جالس أحاكيك ما يدري إنّي يوم أسجّ وياك حرام ما يسوى بعيني مواطيك جعله فداك وعسى البيض تفداك أبك أنت الأول ما به أحدٍ يساويك يظهر بوجهي شيٍّ وإن مرّ طرياك خلّيت أنا أشياء بس وشلون أخليك منت بعادي غير ذولا وذولاك به شيٍّ في قلبي يحنّ ويناديك طامع بشوفك لبّى والله محيّاك يا ليتها صدفة تجيني وأناجيك مشتاق أشوف اشلون تضحك شفاياك ملّيت أغنّي بين نفسي وأناديك الله كتب لي يا حبيبي بفرقاك ويا الحب الأول ما به أحدٍ يغطيك ولا فيه حبٍّ يقدر يزيل ذكراك

تعبت أداري قصّتك بين الأوراق وتعبت أخفي لهفتي واشتياقي وتعبت أجامل وأتبع الشوق واشتاق وتعبت أطفي لوعتي واحتراقي لا تحسب إن القلب في غيبتك راق قل لي بعد فرقاك وش عاد باقي ما دام قلبك للغلا ما بعد فاق الحين دوري شوف قسوة فراقي بذوقك كاسك وبنشوف تشتاق وبعطيك همّي والعنا والبواقي بسهر معك بنام وبقسى وبشتاق وماني بصاير لك على ما أنت هاقي إلى متى باجامل الشوق واشتاق ومتى أبيّن لوعتي واحتراقي أنا أشهد إن الحال ما عاد ينطاق ارحل عسى ما كنت ناوي تلاقي عندي خبر حظّي له سنين ما فاق ولا فيه جمعٍ إلا يليه الفراقي والحين ماتت قصّتك بين الأوراق ومات الغلا مع لهفتي واشتياقي ومات السهر والقلب في غيبتك راق يعني غرامك مات وش عاد باقي

أنتظرتك لين ما ملّ انتظاري ما أذكر إني مثلك إنسان انتظرته ما ذبحني بالجفا غير الطواري كل ليلٍ يمر بطيوفك سهرته ماهقيت إنك معي بايع وشاري ليه من شاريك بإحساسه هجرته كنت أظنك بالغلا دايم تماري وأنت ما حسّيت فيه ولا شعرته كنت أظنك في شعور القلب داري وأنت ما تدري وفي غيابك كسرته دايم أداريك وأنت ما تداري كل شيٍ معك سويته خسرته لو صحيح إن المحبه باختياري كان حبك بالقصايد ما ذكرته ولا ولهت لشوفتك لا مر طاري والغلا ما كان بالقلب اعتبرته دام لك قلبٍ على الهجران ضاري بتركك وأنهيك من قلبٍ أسرته

يا هيّه المحبّه ماهي بكيفك ومشهاك متى ما تبي تعشق تجيني وتلقاني إذا كان ودّك تعرف الحب قرب هاك خفوقي وفتّش فيه بالحب واقراني خفوقٍ حلف طول العمر بأنه ما ينساك حرام إنك تلعب فيه يا خير خلّاني لو إنك عطيته يا بعدهم مثل ما عطاك تشوف الحياة بكبرها أشكال وألواني تغيب ويجيني شي لو إنه نصّه جاك ورب الملا تعذر جنابي وتلفاني أكافح طوال الليل وأسهر على فرقاك وأغنّي لحون الشعر والدمع عنواني بغيتك تكون اللي تخيّلته وأبغاك تكذّب جميع الناس وتعزّ لي شاني لكن الغرور اللي قتلني خذا مبداك تصدّقهم وتقفي وأنا الهمّ يصلاني تذكر كلامك والله إني فلا أجفاك خذاك الغياب وما بقى غير حرماني وأنا لو قريب الناس لك مقفي وخلاّك فلا أنساك لو كل البشر منك تنساني طلبتك تعال ولعنبو قلبٍ من ينساك وارحم ترى فرقاك بالحيل أبكاني وإذا جيت خل الحب من كيفك ومشهاك ومتى ما تبي تعشق تجيني وتلقاني

يغفر الله للحبيب اللي تركني في سهادي ما هقيت إن الغلا والحب بعيونه تجلّى ما حفظ معنى العهود ولا عرف معنى المبادي غرّته دنياه بلحظة نسى العهد وتخلّى عشت بأوهامي وجتني صدمةٍ هزّت فؤادي كنت أنا عنده مجرد واحدٍ فيه يتسلّى آآآه من هالليلة اللي كان يغشاها السوادِي ليلةٍ فيها خفوقي من معاليقه تدلّى ليلةٍ كانت مثل حلمٍ تبعثر في رقادي وقتها ماني مصدّق وأحسب إن الحلم حلّى ليلةٍ فيها الأيادي ودّعت ضمّ الأيادي كأن الأرض انشقّت ولا عيّنت رجلي محلّى كنت أجاهد في هواه وكنت مؤمن في جهادي وأستلذّ بجور طعناته ولو ظلمه تبلّى قلت له ترضى عليّ جرح المفارق قال عادي قال لي ترضى علي حكي الأوادم قلت كلا جيت أصوّت له ولكن لا حياة لمن تنادي صدّ كنه ما سمعني وأحرق الخافق وولّى واستدار وخطوته كانت عجولة في بعادي وأضحك ودمعي على خدّي وأقول إنه يتغلّى رحت كن صمت الطريق يقول لي وين أنت غادي تايهٍ مالك جهات، والصبر فيك يتحلّى يمكن الفرقا تريحني وتشفي لي فؤادي دامني عنده مجرد واحدٍ فيه يتسلّى

تعبان نفسيًّا ومنهاكه أعصابي وأعيش فترة ضياع ولا تضيّعني أفهم حقوق الغلا وأتقبّل عتابي وأصدق معي وأوف لي ولا عاد تخدعني ما دمت حاسب حسابك فاحسب حسابي وما دمت حاشم جنابك لا تلوّعني قصايدي بغيبتك ما نالت إعجابي وأجمل بيوت الغزل ما عاد تُقنعني في غيبتك حمت مرقابك ومرقابي حتى لو إن الدوافع ما تشجّعني أضيق في غيبتك وأنوّخ أركابي وأحاول أنساك مير الحب يمنعني أطمح لقربك وأشوف الأفضل غيابي وأحلم بصدفه قريبه معك تجمعني وإليا نويت أوصلك وأبيّن أسبابي العزّة تردّني والشوق يدفعني ولا صرت ناوي فراقي يا آخر أحبابي تكفى احترم موعد الفرقا وودّعني

يا حبيبي ليه طولت الغياب والمشاعر في غيابك ترتجيك الغياب المُر من أقسى الصعاب ليه تهجر خافقٍ مِيتٍ عليك من غرامك مبتلي ما يوم تاب باع كل الناس جا لك مشتريك وفي غيابك ذاق لوعات العذاب والدقايق والثواني تحتريك الزمان أصبح في بعدك اكتئاب كل شيءٍ فيني يا الغالي يبيك الزهور اللي ملت صدر الكتاب والرسائل يوم تكتبها يديك غير همّي والحزن ما مِن زهاب لي متى؟ الله يرحم والديك ذي حياتي يوم طولت الغياب والمشاعر يا حبيبي ترتجيك

بين الأماني والصحيح أحلام وبين المحبّة والوصال سلوم لو أبني العِشرة على الأوهام ما كان يوم موادعك مشؤوم تاخذني الذكرى على الأيام فرقاك كوم وذكرياتك كوم في غيبتك علامة استفهام خليتني ما أخذت منك علوم برّر غيابك لو بروس أقلام عشان أحس إني ماني بمظلوم تحسب مواصلنا مسيرة عام والعام عدى لا عداك اللوم وأنا معك ما أعدّها بأرقام ولا أحسب الأيام يوم بيوم وياك وأنا الشاعر المقدام ومن غيرك أنا العاشق المحروم شاعرك ما يبغى شعر وإلهام وهو بلوعات الزمن مزحوم شفني ولا أدري وش بقى قدّام من ساعة غيابك وأنا مصدوم في مظهري ما رّيه استسلام وفي داخلي ما فيه غير هموم من غيبتك عنّي ما عاد أنام فقدتك وفقدت طعم النوم

أعايدك ولا أعايد جروحي ولا أعايد فيك باقي بقاياي قل لي متى قلبك خِلّي وشحوحي قل لي متى تشتاق لأرضي ودنياي ما فاد قافي لك ولا فاد بوحي مليت أنادي لك وتتجاهل أنداي ليلة وداعك كان قلبي يلوحي يبغى يقول ارجع ولا تزيد بلواي ما كنت أحسك غير نبضي وروحي لا رحت كن الروح ماهي بأحشاي ما كنت أشوفك غير حلم وطموحي لا غبت غابت سالفة حلم جواي قال الفراق وقلت هذا مزوحي ماني مفارق سلوة العمر ومناي قال الزمن غدار لا كنت توحي قلت الهوى وافي على طول وياي قال الغرام إن جاك لازم يروحي قلت الغرام إن زال زلت بي أخطاي كذبت في حبك كلام النصوحي اللي يشوف الهم ياكل حناياي دار الزمان وصار دمعي سفوحي دمعٍ ذرفته بالخفا في زواياي دار الزمان وصرت عايش بروحي بين الضياع وبين أطهر خطاياي يا نفس كفي لوعتك لا تنوحي هذه نهاية ما بدت به نواياي بعايد أيامي وأعايد جروحي وأعايد الوقت الردي وبقاياي

وحانت ساعة الفرقى وخاطر مهجتي مجروح عليم الله من عقبك تعبت ولا عرفت أرتاح وكيف أرتاح وغيابك جرح كل الحكي والبوح جرحت الروح والخاطر ودمعي من عيوني طاح عطيتك من غلا روحي مشاعر يا عديل الروح ولا جاني سوى الفرقى وذكرى كلّبوها جراح دخيلك ليه تتركني وتترك هالغلا وتروح عطيتك أصدق شعوري من أشواق وغلا وأفراح أبادلك الوصل دايم ويرجع هالوصل مذبوح يجيك القلب متعافي ويرجع ممتلي برماح فقدت النوم والراحة فقدت الخاطر المشروح أشوف أيامي وعمري تناثر كنه المسباح غدى كل شي في وجهي من آثار الغلا مفضوح تشوف الهم بعيوني وشوقي والغلا فضّاح تعال أسمع صدى صوتي من فراقك غدى مبحوح تعال ولملم جروحي وناظر ما بقى وانساح أنا مثل الغريق اللي تعلّق في بقايا لوح يقاوم ما تلاعب به من أمواج البحر ورياح فديتك بس علمني وقلّي وش جرى بوضوح ترى شوقي لو أوصف لك على جمر الغلا فوّاح بنيت بداخلي لجلك من ضلوع الصدور صروح دخلت القلب وأغلقته وقلبي ماله المفتاح فديتك بطلبك حاجة تخلي وصلنا مفتوح طلبتك لا تقاطعني ترى بعض الغلا ذبّاح إذا غلطان في حقك ترى بعض الزعل مدموح عسى تشفع لي همومي ودمعٍ في وداعك طاح أحاول أحبس دموعي وأنا من داخلي مجروح أبي أرتاح لا غبت وتعبت ولا عرفت أرتاح وكيف أرتاح بس قلّي وأنا من غيبتك مذبوح مثل طفلٍ يشوف أمّه وإذا غابت عليها صاح

مشاعر شاعرك فاضت على باب الغلا ترجيك تشوف الشوق في عينك وعنّي تبعد أحزاني طرالي جرحك البارح وأنا كثر الهجر طاريك لك الله من ذكرته قمت أغنّي وأبدع ألحاني صحيح إن الجروح اللي تجيني من طعون إيديك فداك الجرح والسكين طعناتٍ على شاني هلا يا ملهم إحساسي أحاسيسي تغنّي فيك أحاسيسي تغنّي فيك وزولك ما تعدّاني لكن الحين وين الشعر وين إحساسك وماضيك تبعثرها هبوب النود وصارت حلم وأماني لا تستغرب ليا شفت الجروح الماضية تبكيك طعونك تربك عيوني وجروحك تعقّد لساني نويت أعيش من دونك وخليت الغلا يسريك تجاهلتك وأنا أشوفك نويت أعيش وحداني كثر ما كنت تطلب كل شيٍ تطلبه ويجيك وكثر ما كنت أحبك في زماني كنت تنساني كثر ما كنت ضامي في وصالك كنت أنا أرويك وكثر ما جيت لك عاني ما عمرك جيتني عاني هلا يا ليلة الفرقا من جروحه نويت أسريك ظلمني جرحه البارح وأنا ما أخون خلاني يا قلبي لا تزيد الجرح من حبّه نويت أنهيك ما عاد أقدر على جروحي ولوعاتي وحرماني

وفيت ب أول دروبي وخنت ب آخر المشوار يا آخر سكة طعوني وذنب أول مشاويري خطاي إني بنيتك حلم كبير بخطوتين قصار وجيت أكبر من أحلامك عليك وقلت لك طيري تشكلتي على هيئة براءة والنوايا كبار وصدقتك على النيّه ورحت أجني مخاسيري تأملتك عمر ثاني ملكته والسنين بكار يلقحها الوفا لكن صحيت وخاب تصويري هقيتك أجمل أقداري لقيتك أقبح الأقدار عمتني طيبة ظنوني ولا طابت تدابيري نسيت إن الصدر أصغر مساحة لأكبر الأسرار وأنا لا جابني سري تركته في صدر غيري عجب شفت الزمن غابه كبيره والبشر أشجار وأنا كني غصن ذابل خانتني عصافيري عجب كيف القلوب أحيان تسرق رقة الأزهار وهي أصلا حجر ينبض كيان إن صح تعبيري عجب وجه الطريق أسود ذا خاين وذا غدار كأني بينهم غلطة وعجزت أفهم تفاسيري عطيتك للأسف ديره تمنتها قلوب كثار بها شمس وقمر لجلك تسير لقولتك سيري وبها جال وبحر يخفي حكايات وكثير أسرار وبها أرضٍ تصير أطلال إذا قلتي لها صيري وبها جروح وألم وأحزان تسألني عن الخطار وعلي إني بغيتك لي تجيني كل مساييري على كل حال خسرتيها ولا باقي من اللي صار سوى دمعه عليك أضحت تشيل أسوأ مقاديري أبرحل واترك أحلامي تسولف عن غريب الدار عن آخر سكة طعوني وذنب أول مشاويري بخطاي إني بنيتك حلم كبير بخطوتين قصار وجيت أكبر من أحلامك عليك وقلت لك طيري

بعد طول الغياب اللي بدون أعذار كيف تنسى مواقيفي وتنساني والله إني بهجرك ما بغيت أنهار لين عجزت متوني شيلة أحزاني أول الوقت في قلبك ولي مقدار وآخر الوقت دوّرني وتلقاني بين قسوة حياه وبين ضيع أفكار أتلفّت ولا ألقى غير عدواني انكسرت وظلمني وقتي الغدّار يكفي اللي من غيابك وما جاني أنت خليتني ما بين نار وغار الضحية غلا والموت مجّاني وعند لحظة ذهول احترت وش أختار إن بقيت احترق وإن رحت وحداني لين شاب الغلا فيني وأنا محتار ما بغيت الشقى لكنه أشقاني ما بقى في قلوب العاشقين أسرار يوم بدّلتني في واحدٍ ثاني لا تعوّد علي إن كان وقتك جار بس باقي طلب سوّه على شاني احتزم للفراق وكمّل المشوار وإن مرّيتني صدفة تعدّاني ولا تعذر ترى ما عاد فيه أعذار عقب بدّلتني في واحدٍ ثاني

خذاني هاجس الذكرى على من طاب لي ذكره ولا غير الهجوس اللي على قربه تودّيني قطع وصلي ولا أدري عن سبب صدّه ولا هجره ومن عامين كان آخر عهد ما بينه وبيني تعبت أردّد الأمثال كل غايب معه عذره ولا عادت حروف الشعر بغيابه تسلّيني يقولون العرب من غاب ينقص بالصدر قدره وهو غايب وطول البعد عيّا لا ينسّيني ربى طيفه وسط عيني وعودها علي العبره يجيني كل ليلة لين عن نومي يجزّيني قبل طيفه صدى صوته بنفس الحس والنبره يناديني وأهلّي به وأحيّيه ويحيّيني يجيني يسبق الخطوة شذاه وطيبه وعطره تخالط ريحة أنفاسه مع زهور البساتيني مثل ما كان لا جاني خجول ويسرق النظره وكن الرمش لا سلهم على حبّه يوصّيني أجي له مندفع كلّي قليل الحظ والدبره يزول لي خياله واقفٍ ولا تطوله إيديني على هالحال طول الليل لين يبان لي فجره خيوط الشمس مثل اللي من الغفلة يوعّيني يروح الطيف في غفله ويتركني مع الحسره ألوم الليل ويجاوب نهار اليوم قافيني رعاك الله يا الهاجس خذيت العاشق وفكره أنا أكبر وأنت لك حسبه ترجعني لعشريني تنشّف لي عدودي لين ما يبقى ولا قطره وأقول بصوتي الخافت كريمه دوم يا عيني

آسف وخل السنين تدور برضاك تعبت واللي بقدرتي ما قدرته لا عاد تشره على قلبٍ تمنّاك ما هو بذاك الفؤاد اللي خبرته الجرح ما زال ينزف من خطاياك وأحساسي العذب من يديك نكرته مجبور واللي سواتي كيف ينساك قلبٍ عطاك الوفا خنته وغدرته البارحة مرّ عذري ثم تعدّاك واستسلم العذر للقلب وعذرته كنت آخر إحساس مات بيوم فرقاك كنت المس الحب لكنك كسرته ممداك ترجع علي وتعيد ذكراك يكفيني اللي من أحلامي خسرته كانت زوايا الخفوق أحلى زواياك والليل من قبل أشوفك ما سهرته وشلون تنسى مداهيلك ومرباك معقول قلبك ولا عمرك شعرته أثر الغلا مات قبل يعيش وياك وتوك مع الوقت حسّيت وذكرته لو ترتبط فرحتي بأفراح دنياك ما خفت يوم الوداع ولا انتظرته ما لوم أنا العذر يوم إنه تعدّاك واليوم منت الصديق اللي ذخرته

الغايب اللي راح ما قال دعواه كذا بدون أسباب ما قال لي ليه يجرفني إحساس الوله وأتمناه وأدوره بين الغياب ومساريه ولا لقيت إلا أثر مشية خطاه باقفايةٍ مدري على وين تنويه وشلون أبقوى غيبته وأتناساه وطيفه مقيّد ناظري من عراويه قدّام عيني لو إني مغمّض ألقاه من كثر ما أنا مغرمٍ فيه وأبيه يطري علي بصوته العذب وحكاه وأموت من طاري غنجه بتمشيه ويطري علي معاتبه حزة رضاه ونظرته وملامس يديني بأياديه مشتاق له كثر احتراقي بفرقاه لو كان ما همّه عناي بتجافيه يا قو قلبه في بعاده وما أقساه أنا أشهد إنه ما ذخر في تجنيه حسبي عليه شلون طاوع بي عداه ناسٍ يبون اللي بديناه ننهيه ما عاد فيني للشقا والتأواه وأنا خفوقي صابه اللي يكفيه عليه عقلي لا تذكّر سواياه يردني دونه وأنا ميتٍ فيه وعيني عليه اليا تذكّرت طرياه صبّت كما مزنٍ تحدّر خوافيه ذي عادته لا غاب قمت أتحراه ما بين طيّات القصايد وأغانيه موال من همّ المفارق وبلواه أدمى مسامع من يحسّه ويوحيه

ياللي من غيابك تعلّمت فرقاك شكراً على هجرك وشكراً على الصدّ منته بناسي لكن الغير نسّاك ظلمك وهجرك حيل زايد عن الحدّ منته بقاسي لكن الغير قسّاك وأجبرك تقسى في المحبة وفي البعد حاولت أنا أنسى ما بقى من بقاياك وأترك دروبك وأصبح اليوم مرتدّ وأحاول أرحل وأبتعد عنك وأنساك وأنسى الغلا وأنسى المحبة مع الودّ لكن معذّب خافقي اليوم ذكراك دايم يجيني كلّما جيت أبرقدّ تعال شفني كلّما حلّ طرياك والله دمع العين بالعين يشتدّ وش قيمة الدنيا حبيبي بلياك يعني كذا يرضيك دمعي على الخدّ هذا اختيارك وإنت حرٍ بدنياك وأنا اختياري واضحٍ حظٍ أسودّ الحب قاتل دامنه اليوم نسّاك والهجر ظالم بالمحبة وانشهدّ تعال شفني كلّما قلت بنساك أكذب ليا من قلت بنساك من جدّ أفارق الدنيا ولا أعيش فرقاك لكن على ما قيل شكراً على الصدّ

آسف أنا في جيتي لك تسرّعت ظنيّت الاقي فيك شيٍ فقدته كنت أحسبك مجروح مثلي تولّعت جرّبت فرقى شخص قلبك وهبته كنت أحسبك من مرّ جرحك تجرّعت حبيت فيك إحساس طفلٍ لمحته لو قلت آه بوسط روحي توجّعت ولو شفت دمعاتك شعوري سكبته ولو تطلب عيوني أبد ما تمنّعت وأعطيك قلبي لو بعد ما طلبته وصلت بك أعلى مكان وتربّعت وفي قلب غيري يا الغضي ما وصلته وأصبر على صدّك وأشوفك تدلّعت وأعطيك ودّ وما أظنّك حسبته أذهلتني بطباعك اللي تطبّعت حتى قصيدي فيك أبد ما فهمته لو كان غاياتك حروفي فأنا بعت منك الشعور اللي بنفسي كتبته خلّ القصايد تنفعك يوم ودّعت وافرح بجرح الشاعر اللي جرحته وأرجوك من صدّك تراني تشبّعت خلّك مع اللي عاجبك أو عجبته يكفي قهر في جيتي لك تواضعت تركت غيرك لجل عينك وبعته ياليتني عن حب مثلك ترفّعت ياليت قلبي قبل أعرفك دفنته لكن بأبعد دامني ما تولّعت الله يرحم حبّنا اللي ذبحته أنا شريت الود والحين أنا بعت وأنا عطيتك قلبي اللي قهرته في يوم جيتك أطلبك ود وأقنعت نفسي بأنك شخص عادي عرفته كمّل حياتك مثل ما أنا توقّعت تبقى أسير الماضي اللي فرضته ولا يحزنك إني جبان وتراجعت حولك بدالي ألف شخصٍ عجبته أمّا أنا لا يمكن أخضع ولا أطعت يُحرَم عليّ أعطيك قلبٍ خذلته بأريّحك من شوفتي يوم قاطعت أسلوبك اللي به تجامل كرهته غلطان يا المقفي أنا ما تتبّعت غيري يتابع خطوتي ما تبعته ما ينحني راسي لو إني تقطّعت وما هو بنا من لا رميته لقطته وإن كان غرّك حكي عذّالي وطعت الله يعلم كيف قلبي سكنته اللي ملا قلبك عليّ وتسمّعت خلّه يعوّض شخص مثلي خسرته أنا بما فيه الكفاية تولّعت واللي بقى من قلب فيني حرقته وإن شفتني صدفة بعينك تطلّعت ذكّرتني بإنسان غالي فقدته بأول لقا سلّمته إحساسي وضعت غلطت حياتي يوم قلبي سلبته وأستسمحك في البعد كأني تراجعت ما عاد ألقى فيك شي نزفته