Zoram People's Movement

#AIRNewsAizawl: Tun hnai khan CM Pu Lalduhoma hian Thenzawl Auditorium-ah Serchhip Sub-Headquarters YMA Inkhawmpui a hmanpui Thenzawlah Rel a luh theih nan hmalak mek a ni tih a sawi.

#AIRNewsAizawl: Home Minister Pu K. Sapdanga'n tunhnaiah Mizote sorkar laipui hnaa lut an tlem hle tih sawiin tan tlan a ngai takzet tih a sawi.

#AIRNewsAizawl : Siaha District chhunga VC 6 By Election nimin khan neih a ni a, vote tla te chhiar chhunzawm nghal a, A pumpui ah BJP in seats - 4 la in Independent Seat-2 leh ZPM in seat - 1 an la a ni.

#AIRNewsAizawl : Mizoram sorkar chuan tun sorkar kum kal mek 2026-27 atana Mizoram Universal Healthcare Scheme (MUHCS) 2.0 a kalpui hnuah nimin thleng khan damlo 2,615 enkawlna senso atan cheng nuai 700 a pechhuak tawh.

#AIRNewsAizawl : Asian Football Confederation inkhawmpui lian, AFC Congress vawi 36-ah Mizoram Sports Minister Pu Lalnghinglova Hmar chu a tel. Mizoram Sports Minister chauh hi AFC Congress-ah hian India aiawh in a kal a, hei vang hian Voting Right pawh pek nghal a ni.

#AIRNewsAizawl: Disaster Incident Reporting & Management System ‘Khuarel’ Application chu vawiin khan DM&R Minister Prof. Lalnilawman a hawng.

Aizawl May 3, 2026: Mizoram tlawh tura lo zin, Union Textiles Minister, Giriraj Singh chuan vawiin khan Aizawl a rawn thleng. Union Textiles Minister hi Chief Minister Pu Lalduhoma hoin Lengpuiah lo hmuah a ni a, hemi hnu hian Lok Bhavan pan nghalin, Hetah hian Larsap Gen VK Singh nen an inhmu a, Sawrkar Department hotu hrang hrangte nen inkawmin Sericulture, Cooperation, Agriculture, Handloom & Handicraft lam hotute hnen atangin Department hmalakna hrang hrang tarlan a ni. Vawiin vek hian Minister hian Lapar Seri Boutique, Kulikawn leh Zozia Silk Emporium Tlangnuam a tlawh anga; Entrepreneur-te nen an inkawm dawn a, Cooperative Federations Chairperson leh member te bakah, BJP hruaitu leh Party Worker-te nen an inkawm bawk ang. Union Minister hian naktukah Sericulture Farm Zemabawk bakah ZOHANDCO office-te a tlawh ang a, puantahtute leh mithiam bikte nen hun an hmangin, Mizoram a chhuahsan hmain Eri Farm Lengpui a tlawh bawk ang. #ddnewsmizoram

Aizawl May 3, 2026: Chief Minister Pu Lalduhoma chuan nimin khan 'Mizoram Rural Bank Branch Manager Conclave 2026' a hmanpui. Mizoram Rural Bank, Head Office-a hun hmanah, Chief Minister chuan, Mizote ta, Mizoram Rural Bank kan nei chu a hluin, CD Ratio nei tha ber pawl Bank an ni reng thei chu chhuanawm a tih thu a sawi a; Bank-te CD ratio a san hian an sum dawnkhawmte mipui tan an pe chhuak tam tihna a ni a, chu chu ram hmasawnnan a pawimawh a ni a ti. Chief Minister chuan Bank Manager-te chu Sorkar policy a taka chantirtu an nihna chen a awm tih sawiin; an Flagship programme 'Bana Kaih'-ah phei chuan ataka chantirtu ni lehzualin, ram hmasawnna tura tih theih an ngah avangin beiseina pawh an neihsan thu Chief Minister chuan a sawi. Pu Isaac Lalfamkima Sailo, Chief Manager, P&OA chuan he hunah hian, kalkhawmte lawmna thu a sawi a, Pi Sheryl L. Vanchhong, Chairman, MRB chuan sorkar kum kal ta chhunga hma an sawnnate a tarlang bawk. MRB hian, Tun sawrkar kum liamtaah khan Deposit cheng vbc 6526.10 an hmu a, an target vbc 682.11 in an khum a ni. An loan pek chhuah zat hi vbc 4129.98 a tling a, an tlin zat tura an bituk hi vbc 300 chuangin an khum a. Nikum chhunga an hlep hi vbc 152.27 niin, an Credit Deposit ratio hi 63.28 niin, Mizoramah an sang ber a ni. Branch ti thate lawmman semna neih a nih hnuah, MRB General Manager (Business) Saibal Kanti Roy chuan lawmthu sawiin inkhawm a khar a ni. #ddnewsmizoram

Lunglei West MLA Pu T. Lalhlimpuia'n Bungtlang West YMA Golden Jubilee lawmna hun a hmanpui. Golden Jubilee lawmna vawiina neihah khuallian Pu T. Lalhlimpuia chuan thu sawiin, Bungtlang West YMA ten Golden Jubilee an thleng thei chu a lawmpui thu leh YMA chu kan hnam tana lungphum pawimawh leh kan hnam nunphung vawngtu a nih thu a sawi. Khuallian chuan Kohhran leh YMA chu inlungrual taka a kal a pawimawh thu a sawi a, ruihhlo zuar awm lohna khawtlang an nihna chu chhawm nung zel turin Bungtlang West mipuite chu a chah nghal bawk a ni. Pu T.Lalhlimpuia chuan Golden Jubilee lawmpuina thilpek pawisa fai bakah Keyboard leh Volley ball 2 a hlan a, Golden jubillee Souvenir 'Bungte' tih chu a tlangzarh nghal bawk. #DDnewsmizoram

Home Minister Pu K. Sapdanga'n Central Anti-Drugs Squad (CADS)-te ruihhlo man tihralna hun a hmanpui. Central YMA hnuaia ruihhlo do pawl CADS ten January 20 atanga May 1 chhunga ruihhlo an man tihralna hun hi tukin zing dar 8 khan Central YMA Hall-ah neih a ni a. Khuallian Home Minister Pu K. Sapdanga chuan ruihhlo do kawngah sawrkar leh tlawmngai pawl, a bik takin YMA te thawhhona chu hlawhtling a tih thu leh thlamuanpuiawm a tih thu a sawi a, sawrkar hna hmun sàwma ṭhen a hmun kua chu tlawmngai pawlte zara an thawh a nih thu a sawi bawk. Home Minister chuan Excise Minister-in ruihhlo do a vei hle chu lawmawm a tih thu sawiin ruihhlo do danah tharum nena bul ṭana, counselling nena hma lak zui zel chu a tangkai thu sawiin Kohhran pawhin nasa takin hma an la tih a tarlang bawk. Central YMA President Pu R. Lalngheta pawhin thu sawiin 'ruihhlo do' kumpuan hnuaia CADS-te thawhrimna chu chhuanawm a tih thu sawiin, thalaite tichhetu ruihhlo lakah indo puan a nih thu leh thil thalo laka mahni inven reng a tul thu a sawi a ni. #DDnewsmizoram

Chief Minister Pu Lalduhoma'n YMA Sub-Hqrs. Serchhip inkhawmpui a hmanpui a, inpumkhatna vawng nung tur leh ram leh hnam tana inpekna rilru pu turin thalaite a chah. YMA Sub-Hqrs. Serchhip inkhawmpui vawi 8-na, Thenzawl Auditorium-a neih, nizana a hmanpui naah Chief Minister chuan thu sawiin, Manipur leh Chin Hills lamah Mizo nihna chungchangah harhtharna a thleng mek tih a sawi a, inpumkhatna vawng nung zel turin kal khawmte a chah bawk. Chief Minister chuan HPC-D (LF) ten ralthuam an tun tak avangin Mizoramah hnam pual hel pawl an awm tawh loh thu leh Mizorama thil tha hrang hrang lo thlengte chu YMA thawh rah a nih thu a tarlang a. Thalaite chu chhungril nun siam tha a, ruihhlo laka fihlim tur leh ram dang officer-te el pha tura National level competitive exam-te hmachhawn tam turin a fuih a, hlawhtlinna chang ngei thei turin taihmakna leh tumruhna nei turin a fuih bawk. YMA Sub-Hqrs Serchhip inkhawmpui Vawi-8 na hi Ningani khan neih tan niin nizan khan a tiak a, thupui atan 'Ruihhlo Do' tih hman a ni. #DDnewsmizoram

Supply Minister Pu B Lalchhanzova chuan nimin khan Teikhang SC-ah Sorkar kudam a hawng. Khuallian chuan Dept hotute thawhrimna zara Teikhanga kudam hawn a ni thei chu lawmawm a tiin, gas leh buhfai buk dik chu sawrkar thupui a ni tih a sawi a, mipuite pawhin hruaitu dik an duh chuan dik taka thil tih chu an mawhphurhna a ni, a ti. Revenue Department lamah pawh a thawhpuite nen theih tawp an chhuah zel thu sawiin, Saituala Revenue Headquarters te pawh an thuam chak chho mek zel a ni, a ti bawk. Minister chuan mipuite nena harsatna leh mamawh inhrilh tawnna hun remchang tak an hmang thei chu lawmawm a tih thu sawi bawkin; khawtlang hruaitute ngenna hrang hrang te pawh bawhzui a, theih tawp chhuahpui a tum thu a sawi bawk. #DDnewsmizoram

Chief Minister Pu Lalduhoma chuan vawiin khan a bialchhung, Thenzawla thlipui leh ruahsur avanga chhiat tawkte hnenah SDRF leh CM Relief Fund atangin zangnadawmna a hlan. Chief Minister hian, chhiat tawkte hnena zangnadawmna a hlan bakah Thenzawl kanan veng leh Tualvungi venga chhiatna tawkte a tlawh bawk a ni. Puantawh angin, April ni 27 tlai dar 4 vel khan thlipui leh ruahsur nasa avangin, Thenzawl ah hian chenna in 8 chu luah tlak lohvin a len chhia a, hei bakah hian in chhe nasa zual 9, chhe nasa lutuk lo 54 bakah Sorkar Building leh vantlang in chhia 13 leh Electric ban tlu 15 a awm a ni. Chief Minister hi Pu K. Lalhlimpuia SDO (Civil) Thenzawl, Pu R. Vanneihtluanga DIPRO Serchhip bakah khawtlang hruaitu engemawzat in an tawiawm a ni. #DDnewsmizoram

Sesawng April 30, 2026: Hmar People’s Convention– Democratic (Lalhmingthanga Sanate Faction) HPC-D (LF) chuan vawiin khan Sawrkar mi pawimawh te hmaah an ralthuam an tung . Ralthuam tun na hun- 'Home-Coming Ceremony and Arms Laying of HPC-D (LF)' hi CTI Parade Ground Sesawngah neih niin, Chief Minister Pu Lalduhoma, Assembly Speaker Pu Lalbiakzama, Home Minister Pu K Sapdanga, Lok Sabha MP Pu Richard Vanlalhmangaiha, minister leh MLA eng emaw zat bakah sawrkar mi pawimawh thahnem tak hmaah HPC-D (LF) te hian an ralthuam an tung a. HPC-D (LF) mi leh sate hi an hotupa Lalhmingthanga Sanate hoin mi 43 an ni. An ralthuamte chu Mizoram Sawrkar aiawhin IGP H Ramthlengliana'n a lo dawng a. Ralthuam an tun zawhah tharum thawh zawnga che tawh lo tur leh ram leh hnam tana mi tangkai tak ni turin an intiam bawk. Ralthuam an tunte hi rifles 18, pistol 4, mortar 2, walkie talkie 8 bakah mortar mu leh silai mu eng emaw zat a tel a ni. Lalhmingthanga Sanate Faction leh Mizoram Sawrkar hian April 24, 2026 khan Sakawrdaiah inremna ziakin vawiin khan an ralthuam an tung ta a ni. #ddnewsmizoram

Saitual April 30, 2026: YMA Sub-Headquarters Saitual Inkhawmpui vawi 3-na chu “Ruihhlo do” tih thupui hmangin neih a ni a, Minister of State Pu B. Lalchhanzova chuan khuallian niin a hman pui. Lal Hrangchhuana Run, NE Khawdungseiah Inkhawmpui hi neih a ni a, nizan khan Minister Pu B. Lalchhanzova chuan thu sawiin YMA Sub-Headquarters Saitual Inkhawmpui vawi 3-na an hmang thei chu lawmawm a tih thu sawiin, NE Khawdungsei panna kawng pawh tha a tih thu leh ram hmasawnna hmel hmua a inhriat thu a sawi bawk. Khuallian chuan YMA chu Mizo hnam phuar khawmtu leh hnam lungphum pawimawh tak a ni, a ti a, YMA chu ramngaw, nungcha leh lui humhalh kawngah pawh hma lain, khawtlang nuna thil tha lo, ruihhlo leh eirukna do kawngah pawh theih tawp an chhuah thin tih a sawi a, chhawm nung zel turin kalkhawmte chu a fuih nghal bawk a ni. Minister chuan hnam anga kan ropuina kan chhawm nun zel theih nan pun chak kan mamawh tih sawiin, nupui pasal innei hma tura infuih thar a tul a ni, a ti a. Thalaite chu an taksate ruihhlo bawiha pe lo tur leh mahni inkhawngaihna dah thaa hma lam pen zel turin a fuih bawk. #ddnewsmizoram

Mizoram Grand Challenge Lawmman sem a ni. Planning & Programme Implementation Department buatsaih Mizoram Grand Challenge hmawr bawkna leh lawmman semna hun chu vawiin khan Bible Society of India Auxilliary Hall, Aizawlah neih a ni a. Mizoram State Planning Board Vice Chairman, Dr Kenneth Chawngliana'n a hmanpui. Dr Kenneth Chawngliana chuan India ramin kawng hrang hrangah hma a sawn zel thu leh, Mizoram pawh state dang te ruala hma lam pan pen a pawimawh thu a sawi a. Mizoram Sawrkar pawhin ruahmanna hrang hrang a neih thu leh Thalaite thuam chak chu Sawrkar tum lian tak a nih thu sawiin hmasawnna tak tak thlen tur erawh chuan Sawrkar chakna ngawt a tawk lo a, mipuite nen thawhho a tul thu a sawi bawk. Mizoram Grand Challenge hi thil thar inthlensiak (innovation competition) a ni a. Team anga tel theih niin, Open Category leh College Category-a then hran leh a ni. Mizoram Grand Challenge ah hian team 28 atangin mi 112 telin Open Category leh College Category atangin a ti tha team 4 ve ve thlan chhuah niin heng mite hnenah hian lawmman hi hlan a ni. #DDnewsmizoram

School Education Minister Dr. Vanlalthlana'n HSSLC Result lawmawm a tih thu a sawi. School Education Minister chuan vawiin khan a office chamber-ah HSSLC result chhuah pualin thu a sawi a. MBSE buatsaih, Higher Secondary School Leaving Certificate Examination 2026 result chhuakah zirlai exam hmachhawn mi 12,243 aṭanga za zela 87.67 laiin hlawhtlinna an chang thei leh kum hmasa aia pass percentage zaa 6.57 laia a sang chu lawmawm a tih thu a sawi. Minister chuan kumin result chhuakah Govt Higher Secondary School zirlai pass zat chu stream hrang hrangah zaa 80 chung lam an ni thei vek tih sawiin kum hmasa lama result neih dan han thlirin zirlai pass percentage zaa 80 an la pel ngai lova, kuminah erawh chuan stream tinah an pel vek tih sawiin sorkar sikula zirtirtute leh zirlaite taimakna a lo lang chu a lawmawm a tih thu leh a chhuan thu a sawi. Dr. Vanlalthlana chuan zirlai hlawhtlinna chang thar zawng zawngte thinlung taka a lawmpui thu a sawi a. A hun taka result tih chhuah a nih theih nana thawktu MBSE officer leh staff te, Higher secondary school zirtirtute, zirlaite leh nu leh pate, khawtlang hruaitute leh zirna kaihhnawiha thawktute zawng zawng chungah lawm thu a sawi bawk. #DDnewsmizoram

Disaster Management & Rehabilitation Department Minister Prof. Lalnilawma'n 'Khuarel' App a tlangzarh. DM&R Department leh Buannel Geo Solutions & Services te ṭangkawpin an buatsaih Disaster Incident & Reporting Management System 'Khuarel App' tlangzarhna hun hi vawiin chawhnu khan Secretariat Conference Hall No. 1, MINECO-ah neih a ni a. DM&R Department Minister Prof. Lalnilawma chuan Khuarel chhiatna a lo thlen huna mipui mimir, DM&R leh State & District Disaster Management Authority ( SDMA& DDMA) ten rang taka chanchin an inhrilhhriat zung zung theihna leh chhiatna lam thil record data felfai taka dah ṭhat theihna tur ni nghal bawk “Khuarel App”, DM&R Department leh Buannel Geo Solutions & Services ṭangkawp ten an lo duangchhuak chu lawmawm a tih thu a sawi a. Prof. Lalnilawma chuan 'Khuarel App' tlangzarh a ni chu Mizoram tan thil chhinchhiah tlak tak a nih thu leh India hmar chhak State zinga hetiang App changkang nei hmasa ber kan nih thu a sawi a, Mizoram mipui te chu he Khuarel App hman awlsam leh ṭangkai tak hi download a, hmang tangkai theuh turin a chah bawk. #DDnewsmizoram

CM Mr. @Lal_Duhoma attended Mizoram Rural Bank Branch Managers’ Conclave 2026 in Aizawl today. He praised MRB’s strong growth & highest CD Ratio in the state, urging greater financial inclusion & support to flagship programmes. Govt assures continued support for MRB’s progress.

Home Coming & Armes Laying Ceremony held at Sesawng today as HPC(D)–Lalhmingthanga Sanate Faction cadres lay down arms and join the mainstream. CM @Lal_Duhoma calls for unity and urges all to reject anything that may incite violence. Mizoram stands peaceful and united.