Samaher🔬

احد الجوانب السوداوية الي مايتكلم عنها بعض الاطباء، هو جانب التعامل مع المرضى. طيب احد منكم جرب يدخل عليه مريض ويرمي ورقة الانتظار في وجهه ويقوله خلصونا ورانا سحور؟ :) ولا شخص يصرخ يقول ابي ل ولدي كمام "بخار nebulizer " بمشي وراي شغل ماني فاضي!!😅 طيب لحظة ولدك قدامه عشرين مريض ينتظر وحالته مو طارئة اصبر شوي !! بينما فيه مريض عندك فيه اشتباه جلطة قلبية وتحاول تعطيه تركيزك. ولا مريض يشتكي عليك عشانك ما عطيته اجازة، لانه قرر اليوم يكمل نومته واحلامه الخلابة وما يداوم.. طيب وش اكتب بتقريرك الطبي؟ "كثر نوم وكبر المخدة " !! والمشكلة يصارحك ويقولك دكتور انا منتظر ساعتين ابي اجازة بس بتعطيني ولا شلون؟ 🤨 طيب الاجازة هذي امانة وفي رقبة الطبيب ولو جهة العمل طلبت تقرير من بيتورط غيره؟ تخيلوا معاي بعض المرضى يجون كل اسبوع يبون اجازة فقط !! تفتح ملفه تحصل له كمية زيارات جنونية! والمشكلة بعضم يلفق على نفسه اعراض ويوهمك بس عشان تعطيه الاجازة! وهذا التصرف فوق انه حرام وكذب، يستهلك وقت الطبيب وموارد المستشفى في شيء كاذب 🤥 يمكن البعض يشوف الكلام هذا من وحي الخيال، لكن للاسف ان 10-20% من وقتك ك طبيب يُستهلك انك تهدّي اعصاب المريض وتعلمه النظام، وتوضح له ان قدامه مالا يقل عن عشر مرضى جايين قبله ويستحقون العلاج مثل ماهو يستحقه. لذلك انك تعمل في تخصص فيه انتظار عالي ك طب الاسرة وطب الطوارئ وغيره.. انت في وجه المدفع ! ولازم تراجع نفسك عشر مرات قبل اختيارك لتخصص فيه لود عالي ومقابلة مستمرة مع المرضى. تصدقون اني مرات اجلس بالمصلى اصلي ركعتين واستغفر شوي عشان اطرد الطاقة السلبية؟ وارجع للعيادة بنفس طيبة اقابل فيها المراجعين، لان طاقتي صفّرت، نفدت، استهلكت. 😅 وهذا الامر لن ينتهي لان انا ملاحظ نسبة من المجتمع حار جداً وعجول وغير صبور! يبي الاشارة تفتح بسرعة، ويبي يخالف بالطريق، ويبي ينفذ كل شيء بحياته بسرعة، ويبي يدخّل المستشفى ويتعالج بعشر دقايق ويمشي! الشخص لازم يتأنى ويركد ويصبر، ويحترم الاخرين ويصبر على نفسه .