Loay Alkhteeb

تقارير أمريكية كتير بتتكلم عن الغزو البري كخطة بيتم العمل عليها فعليا، و وول ستريت جورنال بتتكلم عن دراسة البنتاجون لإرسال ١٠ آلاف جندي إضافي للشرق الأوسط، مع ملاحظة إن لحد اللحظة دي مفيش أي انتشار بري أصلا! دي أخبار ترجمتها الوحيدة إن الأمريكان بيغرزوا بكل قوتهم في وحل الشرق الأوسط من جديد، والتاريخ بيقول إن كل خسايرهم بتبقى كوم، والمصايب اللي بتحل على دماغ سكان المنطقة الجميلة دي كوم تاني خالص.. كفاية نقول إن داعش هو الابن الشرعي لغرزة العراق.. الغرزة الجديدة دي معناها إن الحكاية مطولة، وغالبا مش هتقف عند الـ١٠ آلاف، وده هتكون له تداعيات خطيرة على أمن واستقرار المنطقة، وعلى الخطط التنموية في أغلب دولها، أو حتى على مشروع زي طريق الحرير الصيني.. في أول ٣ أسابيع، لبنان والعراق اتسحبوا للحرب من غير ما الدولة تعلن إنها داخلة الحرب، لكن من خلال ميليشيات على أرضهم، ده غير دول الخليج اللي بتتهاجم يوميا من غير ما يكون ليها علاقة بأي حاجة، ومع تطور الأمور ممكن الحوثيين يدخلوا، وافتح سيناريوهات زي ما تحب، ولكن كلها سيناريوهات كارثية اقتصاديا.. الآثار والتداعيات ممكن تقعد لسنين، تحديدا مع تضرر كبير للدولة الإيرانية يهدد وجودها، وده هتكون له تداعيات أمنية خطيرة، خصوصا مع احتمالية نشوب صراعات طائفية أو عرقية داخل/حول ايران.. المشاهد البائسة دي حقيقي تخلينا نحمد ربنا ألف مرة على الشغل اللي اتعمل في البلد طول السنين اللي فاتت، بكل ضغطه وتعبه، لكن تخيل كده وسط المدعكة دي، هتعرف تعمل أكتر من ٢٠ مدينة جديدة؟ هتعرف تطور البنية التحتية والمرافق؟ هتعرف تحدث الجيش؟ طيب هو حد فايق لك علشان يديك تمويلات ميسرة تعمل بيها كل ده؟ بلاش.. حد هيسمح لك أصلا؟ ربنا يعديها على خير

التصريحات اللي نقلتها يديعوت أحرونوت عن تحذير رئيس الأركان الإسرائيلي من انهيار الجيش، هي -على الأرجح- جزء من حملة تضليل بتسبق أي تحرك، فهو متسرح من نتنياهو بالبوقين دول بنسبة كبيرة، لإن لو حقيقي مش هيتنشر في الصحافة الخاضعة للرقابة العسكرية.. بديهيا يعني.. لكن، مستحيل التطرف المجنون اللي مسيطر على الحكومة الإسرائيلية، وفتح كل الجبهات دي مرة واحدة، يمر كده من غير تمن، وآثار اللي حصل كله هتفضل موجودة لسنين وهتعاني منها كل المؤسسات الإسرائيلية.. مفيش حد عنده قوة غير محدودة، وحتى اللحظة دي إسرائيل ما واجهتش جيش قوي فعلا، جيش حقيقي يتعمل له حساب، يعني كل الاستنزاف ده أقرب لحروب عصابات ومواجهات مع ميليشيات هنا وهناك، وده أغبى قرار استراتيجي ممكن دولة تاخده مهما كانت مدعومة، لكن طبعا التطرف والهلاوس الدينية أقوى من أي منطق.. يالا بالشفا

طبيعة الدعم المصري لأي دولة جارة دايما بتشمل بُعد إنساني، تحس كده كإنه إرث حضاري وطبع بيخلي الدعم مش مجرد سياسي أو حتى اقتصادي جاف.. الصورة من زيارة الدكتور بدر عبد العاطي لبيروت، وتحديدا مركز إيواء النازحين "روضة عمر الأنسي"..

لو عايز تشوف ازاي الإعلام الأمريكي بيتم استخدامه ضمن الحرب بشكل مباشر، ممكن تقرا تصريحات المسؤولين الأمريكيين اللي نشرتها وول ستريت جورنال، عن شطب اسم "قاليباف" و"عراقجي" لمدة ٤ أو ٥ أيام من قائمة الاستهداف.. انت متخيل إن في وسيلة إعلامية بتنشر تهديد مباشر بالقتل لمسؤولين في دولة تانية علشان يتفاوضوا؟ حرية إعلام واستقلال وكده..

عادة أنا مابحبش أبرر أو أوضح كلام بقوله، خصوصا لما بلاقي إن ناس كتير فهمته واستوعبت هدفه، لكن المرادي أنا مضطر أوضح علشان اللي بيحصل نفسه استثنائي وضخم وهيبقى له تداعيات هتستمر لسنين.. هو أنا لما بقول -من وجهة نظري على الأقل- إن إيران في وضع صعب جدا، وده بخلاف تحليلات كتير لها كل الاحترام، هل بقول ده علشان في صف إسرائيل؟ حضرتك متصور إن ده ممكن يبقى وارد أصلا؟ طيب هل لما بقول إن التقديرات الكارثية الخاطئة اللي وقع فيها النظام الإيراني هي السبب في المصيبة اللي الدولة الإيرانية كلها فيها، هل بقول ده علشان في صف إسرائيل؟ حضرتك متصور إن ده ممكن يبقى وارد أصلا؟ المصيبة اللي بتحصل دلوقتي، وده من وجهة نظري على الأقل، هي إن في دولة جديدة من دول المنطقة بتتدمر وبتقع، وده بيحصل بإيد إسرائيل، يعني نقطة جديدة في رصيد المشروع الإسرائيلي اللي حقق مكاسب مذهلة خلال السنتين تلاتة اللي فاتوا، وكل المكاسب دي سببها سوء التقدير من أطراف قررت تدخل مواجهات انتحارية غير محسوبة، من غير حتى ما تنفذ الأمر الديني "وأعدوا".. هل مطلوب إني أقعد أقول لك إن إيران بتنتصر، أو إن أمريكا في مأزق ومحتاسة زي ما بيتقال، فانت تنبسط وخلاص؟ ولا نتعامل كلنا مع حقيقة كارثية وهي إن في دولة كمان على وشك السقوط بأسوأ سيناريو ممكن، في منطقة بتتغير بشكل غير مسبوق؟ أنا الحقيقة اخترت اني أتعامل مع الحقيقة الكارثية، وهي مش كارثية علشان احتمالية سقوط النظام الإيراني اللي كان شريك في تخريب المنطقة كلها لسنين، لكن علشان سقوط وانهيار دولة إضافية في المنطقة بكل تداعيات السقوط ده، وعلى إيد إسرائيل! التعامل مع الحقيقة دي بتجرد، هو اللي يخلي في احتمال ولو ١٪ لإنقاذ ما يمكن إنقاذه، ومانبقاش قدام سقوط كامل بإيد إسرائيل.. لو الكلام ده مش عاجبك تقدر تتخطاه عادي، وياريت أطلع غلطان وتكون الصورة جميلة فعلا زي ما بيتقال..

قريت بوستات لناس كتير مقتنعين إن في حرب نووية أو تسرب إشعاعي محتمل علشان كده المدارس بكرة أجازة! لأ وبيتكلموا على أساس انهم كشفوا الخطة..

الدولة المصرية عندها قدرة استثنائية على التواصل مع كل الأطراف المتناقضة أو حتى المتحاربة، لكن الكلام اللي قالته وول ستريت جورنال عن فتح المخابرات العامة لقناة تواصل مع الحرس الثوري، وإن مد المهلة لـ٥ أيام اللي قرره ترامب كان أصلا مقترح مصري، دي تفاصيل تستحق التوقف قدامها.. مصر من اللحظة الأولى أعلنت انحيازها لدول الخليج ضد الهجمات الإيرانية، والعلاقات بين مصر وإيران كانت لسنين علاقات توجس واضطراب على أفضل تقدير باستثناء آخر سنة ونص مثلا، فلما وسط كل الظروف دي تقدر تتواصل وتتسمع وتكون وسيط، دي خبرة وقدرة مذهلة.. ممكن كلام زي ده يتوصف بإنه مبالغة أو تطبيل، لكن الحقيقة مش احنا اللي بنقول، دي وول ستريت جورنال، بتطبل هي كمان؟

المعلومات المتداولة عن وثيقة المطالب الأمريكية من إيران، بتقول إنها وثيقة استسلام، وده شيء طبيعي في إطار المفاوضات، كل طرف بيعلي السقف لحد ما المناقشات تخلق مساحة مشتركة مقبولة.. لكن اللي مهم نتابعه خلال الساعات الجاية هو مدى استجابة إيران أو أجنحة داخل السلطة في إيران لنقل المفاوضات من مرحلة الاستكشاف الحالية، لمرحلة المناقشة الجادة حوالين البنود.. ده هيقول كتير عن: مين اللي سايق؟ مدى الاستعداد لتقديم تنازلات؟ وهيكون انعكاس وترجمة إلى حد كبير لحجم الضرر الفعلي اللي تعرضت له إيران.. واضح إن ترامب ماكنش بيكذب لما قال إنهم بيتكلموا مع حد في إيران، وواضح تماما إن كلام ترامب عن الخسائر الكبرى في إيران مش بعيد عن الواقع خالص، علشان كده العقل يقول إن إنقاذ ما تبقى من الدولة الإيرانية، وتجنب إشعال المنطقة، هيكون اختيار حكيم لأي حد هيقعد على ترابيزة المفاوضات.. والدرس الأهم: "الاستعداد" قبل "الاستعداء"..

الدولة المصرية اتحركت ضد مقال المدعو فؤاد الهاشم، من خلال الآتي: (١) تواصلت الخارجية المصرية مع نظيرتها الكويتية.. (٢) بناء على التنسيق بين الوزارتين، تم إبلاغ وزير الخارجية المصري بإحالة الموضوع للنائب العام في الكويت.. (٣) يتم التنسيق حاليا بين وزارتي الخارجية فى مصر والكويت بشأن ما يمكن اتخاذه من إجراءات قضائية وفق القوانين الكويتية تجاه كاتب المقال.. (٤) اتصل وزير الدولة للإعلام بنظيره الكويتي للتأكيد على رفض مصر للمقال.. (٥) تم تقديم مذكرات رسمية لجهات صحفية (جمعية الصحفيين الكويتية، اتحاد الصحفيين العرب، نقابة الصحفيين المصرية) لاتخاذ إجراءات مهنية.. ده اللي اتقال في بيان وزارة الدولة للإعلام عن الموضوع، لكن المهم بردو إن البيان أكد إن ده سلوك لا يعبر تماما عن الشعب الكويتي الشقيق وبالتالي لا يصح الخلط، مع التأكيد على دعم مصر الكامل للكويت في مواجهة الاعتداءات الإيرانية.. تحرك مهم وحاسم وياحتراف شديد..

كلام وول ستريت جورنال عن تمكن المخابرات المصرية من فتح قناة اتصال مع الحرس الثوري، وإن ده السبب في مد مهلة الـ٤٨ ساعة، هو إشارة مهمة لقدرة وكفاءة جهاز المخابرات العامة، لإنه بيقدر يتكلم مع كل الأطراف المتناقضة ويطرح حلول ممكن تبقى بارقة أمل للخروج من الكوارث.. طبعا مفيش حد يقدر يعرف المحادثات هتكمل ولا لأ، لكن المعلومات دي هي استكمال لتقرير أكسيوس عن الدور المصري امبارح، وانعكاس لثقل مصر في منطقة مزعجة ومعقدة لأقصى درجة.. الدول الكبيرة بتظهر في المواقف الصعبة..

بيان الخارجية المصرية بعد تصريحات ترامب، معناه وجود دور مهم للقاهرة في المفاوضات بين أمريكا وإيران، ونفس الكلام أكدته أكسيوس.. الدول الكبيرة بتبان في المواقف الكبرى، وربنا يكملها بالخير..

رغم النفي الإيراني، إلا إن كل الأخبار خلال الأيام اللي فاتت كانت بتأكد إن في وساطة بتتم من بعض دول المنطقة زي مصر وتركيا، وبالتالي كلام ترامب عن وجود محادثات صحيح، تكمل أو لأ ده موضوع ماحدش يقدر يحسمه، مع مراعاة إن إيران مابقتش دولة بقيادة واحدة موحدة، وبالتالي المفاوضات دي وارد جدا تكون بتتم مع جناح أكثر اعتدالا داخل مجموعات السلطة الحالية.. هيبان.. ربنا يعديها على خير

#مصر_مع_أشقائها_العرب بالفعل مش بالكلام

اللي فات على كاتب المقال "الركيك"، هو انه يكلمنا عن ذكاء الكلاب -أو أي حيوان- اللي هو ذكاء مش عند الكاتب نفسه! يعني مثلا أنا ماشوفتش أي كلب -أو حيوان عموما- كتب مقال "ركيك" ضد مصالح بلده هو شخصيا، اللي بتقول إن ده وقت الاصطفاف مش الفُرقة.. ومن هذا المنطلق أكيد مش هنتعامل مع الشعب الكويتي الشقيق من منطلق مقال تافه زي ده، لإنهم أكبر من كده واحنا أكبر من كده، وماحدش فينا هينزل لمستوى مفيش كلب حتى ينزل له!

جهاز المخابرات العامة هو واحد من أذكى وأمهر وأكفأ أجهزة المخابرات على مستوى العالم، وده مش كلام مرسل أو عام، لإن بفضل الله جزء معتبر من استقرار مصر في إقليم مشتعل ومعقد ومعقرب زي اللي احنا فيه، يرجع لكفاءة جهاز المخابرات العامة اللي تأسس زي النهاردة سنة ١٩٥٤.. المخابرات العامة مش بس بتقدر توصل للمعلومة بكفاءة، لكن كمان بتحللها وبتصنع تقديرات دقيقة جدا بناء على المعلومات دي.. كفاءة المخابرات العامة اللي كانت ولا زالت واضحة جدا في ملف زي غزة، موجودة بردو في باقي الملفات ولكن طبيعة عمل الجهاز بتمنع ظهور التفاصيل إلا في حالات استثنائية زي غزة، ومش كل التفاصيل بردو.. يحق لكل مصري الفخر والاعتزاز بجهاز وطني عظيم زي المخابرات العامة..

أنا كان بودي أسقف وأزيط على الضربة الإيرانية في ديمونة، لكن الحقيقة هي استمرار لمسلسل العبث والهمبكة اللي بتفيد العدو أصلا! يعني انت لما تسمع ديمونة للوهلة الأولى ييجي في دماغك مشاهد رأفت الهجان والمفاعل وكده.. بس عادي جدا تكتشف إن اللي اتضرب حي سكني في مدينة ديمونة، يعني هدف مالوش أي تلاتين لازمة استراتيجيا.. في المقابل، الإعلام الإسرائيلي اللي عادة بيداري أي خساير حتى ولو محدودة، بل الخارجية الإسرائيلية نفسها بيتناقلوا صور الدمار، علشان يقول لك بيضربوا المدنيين، فماتلومنيش بقى لما أمحي إيران كلها! ولسه في ناس بتسقف.. #همبكة_بكميات_وفيرة ❤️

🇪🇬 🇸🇦 #مصر_مع_اشقائها_العرب

لما مصر قالت "مسافة السكة"، كانت بتتكلم عن دعم حقيقي مش مجرد كلام أو شعارات.. تحركات الرئيس السيسي بعد الأزمة أثبتت معنى الدعم الحقيقي ده، لإنه دعم عاقل واعي هدفه الأول والأهم هو إنهاء الحرب، مش صب الزيت على النار لإثبات الحضور.. #مصر_مع_اشقائها_العرب قولا وفعلا.. بوصلة واضحة من أول يوم..

آخر ٣ أيام: الريس زار الإمارات ومنها لقطر، تاني يوم احتفل مع أبناء الشهداء وافتتح المونوريل والنهر الأخضر، النهاردة راح البحرين ومنها للسعودية.. ٣ أيام منهم يومين عيد بيعمل فيهم كل المجهود ده علشان أهله وبلده، وكلنا عارفين إن جهده كله للتهدئة والسلام.. قائد عظيم في توقيت صعب وخطير.. ربنا يباركلك ويحفظك ويجازيك كل خير يا فخامة الرئيس ❤️🇪🇬