♡

اللهم أيام حلوة ترضي قلبي♥️.

ماعلى حسنك كلام ولا على جرحي حسافه ما خلق ربي جمال الا ولك منه حلايا ايه يا ملح القصيد انتي ويا عذر ارتجافه لو عذاريبه تجيب بسيرتك صارت مزايا

١٤ فبراير وش ضيعك مابين عين وبين جيد يا قلبي اللي لك سنين اتدلها لو انتثرلك دمع واشعل لك قصيد باقي سيوف العشق كيف اسلها ؟ حبيبي اللي ضاق ما عيّن جديد شاعرك عذبات الحروف يهلها وشلون احدد يوم حب ويوم عيد وانت الهنا واعياد عمري كلها .

اهيم بـ غلاه اللي خذاني ولا ادري منين ومن قبلها فـ الحُب ما اطري التوبه مرادي من الدنيا وغاية مرادي لين اشيب بـ هواه اللي تملكني عذوبه تكابر غلاه وجعل يكبر معاي امين انا اموت واحيا في مشارقه وغروبه

يكذب المجروح لو قال لك جرحه بري الجروح احيان تبقى على شكل امنيات

لابد الأيام تذكرنا .. وتنبت صدف وتعيد من ذكرياتي معك اجمل شريط ويطيب جرحي القديم وقلبي اللي نزف أخيّطه من مشارق ضحكتك خيط خيط

مدامي في ذرى قلبك عن الصدمات والتقصير ماعاد اخاف من طول الطريق وضيقة المسرى

تراخت من يديك حبال وصلك والهجر مشدود اجي لك ضاميّ يسحب خطاه وقلبه يجرّه ماعاد اعرف وين القى هواي ويومي الموعود وصلت لـ مرحله ما عاد اشوف لـ ناظري قرّه فقدتك ما دريت اني بصير الفاقد المفقود اشوف اشباهك توّزع فـ وجهي وين ما افرّه

وين اروح من الشعور اللي كثير اسألته دام اشوف الواقع يضيع جميع أوهامي والله اني قد عطيتك قلبي .. ودللته للطريق اللي من يمره يعود ضامي الحمل لو ما قدرت اني اشيله .. شلته والعُمر ما عاد يسوى لو خسرت احلامي الكلام اللي اخاف انك تقوله ، قلته والوداع اللي يضايقني حصل قدامي

ضحكت بـ وداعك ولا ادري من جهل ولا غرور ؟ بس ادري ان نفسي لـ لحظات الجفى .. متكبّره

يا عل الدروب اللي تضمّك حيا وأزهار لو إنك تعيش ايامك البيض - من دوني

اخاف من ليلةٍ يضوي سناها بعيد واشوف نفسي مع الاحزان متوالفه انا ادري ان الحزن فاللي مضا مايفيد لكنّي اشعر بإني لـ الدمع حالفه ابي معك باقي ايامي مثل صبح عيد وان شفتني ضايقه ضحكني بـ سالفه تعطيني من الهوى واقول هل من مزيد قلبي معك .. وانت اكثر واحدٍ عارفه

تمنّيتك وانا يا كم لي اتمنى شموسك ظلّ وعلى رفّ الأماني باتت الاحلام مهجوره بعد ما دارت الايام واحساس الوله ما قلّ هنا خلف الضلوع العوج قلبٍ تربكه صوره

كل عيد وكل فكره تستجيب وكل طاري لك نصيب من الشعور ولك نصيب من القصايد سمّني حبٍ قديم اجدد احساسه واداري المحبه ما تدوم الا ليا جدّت جدايد كيف ابصبر والغرام اقوى من حدود انتظاري وانت عينك مالها الا جبر قلب وشوق زايد كل عام اشوف في بسمة محيّاك انتصاري كل عام ولك علامه فارقه واحساس كايد كل عام ولو يجوعك شعر تضماك الصحاري منهزم مثل انهزام الدمع في صدر الوسايد كل عام ولك وفاي ولك مساي ولك نهاري كل ما نكتب جديد وكل ما تزهى قلايد سو كل اللي تبيه ولا تخاف من انكساري جعل تفداك السنين وجعل عمرك لي مدايد كل عام ووجهك المملوح ينبض في يساري لو يمر مْن المحبه شك حبي لك وكايد دام قلبك يا حبيب العمر مدهالي وداري لا يمر العيد هذا قبل اعايدْك وتعايد .

تساؤلات الليله : ليه حال القلب في غيبتك ماهو قوي ؟

بقى ذنب واحد من ذنوبي عجزت أنساه بعد ما هداك الله ياقلبي على التوبه لك الشوق ٫ يا ذنبٍ تركته لـ وجه الله عسى سيئات الشوق ماهي بـ محسوبه

يا أقرب لي من اللي في يديني وأبعد من سهيل أخاف أجبر عليك الخاطر اللي مت من كسره أنا أول من وقف لك في طريق العمر صبح وليل یاشین الانتظار إن صار مابه شي .. تنتظره عزاي إني على قيد الأمل لو السنين تميل مثل شمسٍ تعدّاها المغيب ٫ وتنتظر بكره

قِس الحُب بالاشواق والعمر بالارقام تشوف السنين اقلّ من واحدٍ تغليه الاحباب لو يحييون فالحب ميّة عام وش الفايده لو ما يموتون بين يديه خِذ اللي تبيه من الطموحات والاحلام وانا باخذ الباقي من الهمّ ومن التيه احبك .. ولا فكرت في يوم من الايام يجي يوم من الايام ماعاد احبك فيه

رجعت أدوّرك بين الرسايل والصور وأدعيك وانا مدري وش اللي من يد النسيان رجّعني معي كلمة عتاب اكبر من اني فاقدك وابغيك ذرفت حروفها اول ما عرفت انك ما تسمعني

انا الوحيد اللي عشقتك بـ الإنصاف مرّيت في حُبك .. جميع المراحل

وقفّي لين الزمان يمرّنا بـ أربع فصوله الثواني مستحيل انها تكون اللي بقى لي يوم جيتي كان يا كثر الكلام اللي بقوله ويوم رحتي مالقيت من الكلام الا تعالي يا ثمر قلبٍ وهبك الله مرابيه وميوله انتي الدنيا واهلها كلهم ٫ وانا لحالي ان ذبحتيني جعل روحي فدا العين الخجوله وان عتقتيني جعلت الليله اعز الليالي ما بعد هز الندم قلبي على شيٍ يطوله لين شفت النظره المتكلمه ترثع بحالي جعل يسقى يوم كان الوقت ينساب بسهوله ودقة الساعة تمر اسماعنا .. ولا نبالي سلميني صوتك الممسوك انا سيد وصوله من متى والصمت يغلب نبرتك على وصالي ؟ واسأليني ليه اهاب بطلتك وانتي جفوله وليه لا مني تباطيتك طرى لي ما طرى لي وجهك اللي مستعد اعيش له واموت حوله يا كثر مافي تفاصيله وجودي ٫ وانعزالي والعيون اللي قبل شوفك من الدنيا ملوله صار يملاها الشغف حتى وانا اشوفك قبالي لا تغرك كلمة مرت على سمعك عجوله ما بعد من النسم صدري ولا جيتي ببالي الحظيظ اللي لقى بـ عيونك النجلا قبوله من يلومه لا زهد في الامنيات وفي الليالي