/

ياشينها لا قيل حظ وتوافيق والحظ سيء والتوافيق قلّه تتعب على حاجه ولا فيه تحقيق وتزرع جميلك مايظللك ظلّه

لك منزل بين الرجى والتمني ولك دعوةٍ ما فارقت قلب ولسان أدعي عساك تكون فيني ومني عل وعسى ما يملكك غيري انسان لا ياخذك وجه الجفا غصب عني ولا يردك عن دفى صدري أزمان انت الاماني والمنى والتمني وانت الكمال بعيني وان خالطك نقصان

أمان الله على قلبٍ ذخر كل الكلام سكات وأمان الله على جفنٍ حفظ حر الدموع وبات

نشب ضارين على الطيب ونشيَب متجملين ولا الجميل يعسرنا واليا وردنا صافيات المشاريب في جمة الماء مارمينا حجرنا وان طاحتَ الهقوات مثل المشاهيب حنا مثل ولد الكحيله طمرنا

اشرب قبل تقفي عليك المشارب ما للحسايف فالمقابيل راحه السم دايم في ذيول العقارب والحر دايم رفعته من جناحه

النفس تقبل مثل ماتقبل الخيل وتصد لو إن النعم مستديمه شيٍ تخافه من عقوبه وتنكيل وشيٍ تعافه من كرامه وشيمه

يالله بجاهك من ترداي النصيب وبحماك يالله من مقاشير الصدف

كأني على يدين الصبر مولود مهما حصل ، ماعلي خلاف

لابارك الله في البعير الشرود قليّل الفود اللي ليا منّي لحقته يتعّبني لحوقه

كم طموح ماتجيبه جهود ولا سنين تدركه دعوات الأسحار في ركعة وتر

غديت مثل الغريب اللي جفاه المكان في ديرة ساقه الحظ الردي صوبها

أنا في رجاء الله لو ما تنصفني الأقدار اوّقف وانا متسامي وخاطري راضي تهون الحياه من وين ماشفت لطف البار لو يروح حلمي من يدي عشت متغاضي تمنيت شيء وقدّر الله شي و صار يعيض الله اللي راح حلمه شقاوي

اخذ من خَضار الوقت صبرًا على غَبراه ترى احلى ليال العمر ماهيب منعاده

لو يردك دمع سيلنا لك بحور ولو يردك صوت صرنا لك رعود يرحمك ربي عدد قطر المطر وعدد ما كبّر على القبله بشر

احذر من اللي لا زعل ينكر الطيب اللي تقلّب عشرته مع مزاجه أن راق رقاها طوال المراقيب وان ضاق ضيقها على أدنات حاجه

سقى اللهُّ ليالي عشت فيها مع الأحباب ليا جيتهم ضايق رجع خاطري سالي عليهم عيوني دمعها دايماً صباب وانا ما خبرت العين تبكي على الخالي

رحت مثل طهّر السحاب المراويح يالي فراقك ما يمّر بسهُوله كنت لنا وقت الظلام المصابيح وحلمٍ تباكينا على أخر فصوله وش عاد باقي غير صوتك مع الريح وجرح الغياب وذكريات الطفُوله

ذكرياتٍ تعبر العمر طرقيّه وذكريات ٍفي وطنها ومرباها وصورةٍ في متحف البال مطوّيه كل يوم أفلّها و أتهجاها

عسى مقابيل الليالي تباشير  علمٍ يسر الخاطر .. ولا يضره يالله طلبتك وانت ولي التدابير اجعل لي في كل خطوة مسره