تساؤلات

#تساؤلات | بودي أن أشكر اخواني واخواتي الذين يقرؤون الشروط ويطبقونها بحذافيرها ، أنتم فعلاً تسهلون من مهمتي في خدمتكم وأنا ممتن جدا من التزامكم ، الحسابات الاباحية أو المتابعة لحسابات إباحية سيتم تجاهلها أو سيتم حظرها مباشرة ، اسأل الله بأن يوفقكم ويسعدكم ويسهل أموركم في الدنيا والآخرة 🤲💐😊

#تساؤلات | الحمدلله على تمام النعمة والحمدلله على البلاغ والحمدلله على الصيام والقيام ، اللهم اجعلنا ممن صام الشهر إيمانًا واحتسابًا وأدرك ليلة القدر وفاز بالأجر ، اللهم إنا نستودعك رمضان فلا تجعله آخر عهدنا به وأعده علينا أعوامًا عديدة ولا تخرجنا منه إلا مقبولين ومرحومين ومعتوقين من النار. عيدكم مبارك وكل عام وأنتم بخير 🌙✨

#تساؤلات | جارتنا ارملة عمرها بالثلاثين عندها ولد فقط وبالفترة الاخيرة لاحظت عليها حركات تطلع قدام زوجي من شقتها كنها ما تدري، وترسل لنا اكل!! اكيد حاطه عينها على زوجي واخاف انها تدخل الفكرة بنفسه ويتزوجها ايش اسوي فيها؟

#تساؤلات | انا بنت بالثلاثينات من كنت مراهقه اتمنى الزواج والاستقرار والاطفال وماكتب الله ، الان اتمنى تدعون لي بالغيب بالزوج الصالح والذريه الصالحه السليمه المعافاه وان الله يغنينا بحلاله عن الحرام بهالايام الفضيييله

#تساؤلات | السلام عليكم ورحمة الله وبركاته ابغى استشيركم...انا بنتي ان شاءالله تكمل ست سنوات وراح تدخل اولى ابتدائي...بس بنتي عندي مشكلة ماتتكلم زي الأطفال اللي في عمرها تقول كلمه كلمتين بس ماتركب جمل او تقول سالفة....انا دخلتها الروضة وممتازة الحمد الله اكاديميا تحفظ القرآن تجاوب على الأسئلة مثل من ربك مادينك...تعرف تكتب الحروف والاملاء تحاول الان تقرأ كلمات خطها حلو ومرتب ...وديتها تخاطب وقالي عندها ضعف تركيز استمريت معه ب جلسات بس احس مافادتها الاقليل ...افكر ادخلها اولى ابتدائي السنة الجاية عشان التفاعل مع الطلاب اكثر من الروضة ...شوروا علي محتارة كثيرة وادعوا لها يفك ربي عقدة لسانها

#تساؤلات | السلام عليكم تقدم لخطبتي رجل، غير موظف عنده مشروع شغال على تاسيسه، وعنده عقار الكل اثنى عليه من ناحيه الدين والاخلاق لكن لاحظت انه من شروطه مايبي موظفه اختلاط من الاساس ولكن اقتنع فيما بعد. كان دقيق بالسؤال عن وظيفتي بحكم انها اختلاط وكان يسال عن التفاصيل وحسيت انه متردد مره من ناحيه وظيفتي .. ولمحوا اهله انه ممكن تتركينها مستقبلا اذا جاك عيال ؟ الصراحه ترددت واخاف يكون موضوع الاختلاط محل نقاش ومشاكل مستقبل وش رايكم

#تساؤلات | السلام عليكم اقترحوا لي هدية اعطيها لزوجتي؟؟ لأن والله تعبت تطبخ وتربي بنتي و…….الله يجزاها خير

#تساؤلات | أنا مراهق وأواجه مشكلة مع أهلي أحس إنهم دايم يشكّون فيني أو يفسرون الأشياء بطريقة غلط. مثلاً إذا طلعت من البيت يكثرون الأسئلة: وين بتروح؟ وش بتسوي؟ مين معك؟ ووش معك؟ لدرجة أحس إنهم مو مرتاحين أو يتوقعون شي مو صحيح وحتى أحيانًا أشياء عادية يفسرونها تفسير غريب، مثل إذا رحت أتسبّح يقولون يمكن عليك جنابة أو شيء كذا، مع إن الموضوع عادي أنا صرت محتار: هل هذا طبيعي من الأهل مع المراهقين؟ وليه دايم يفسرون الأشياء كذا؟ وكيف الواحد يتعامل مع هالشي بدون ما تصير مشاكل بينه وبين أهله؟

#تساؤلات | سلام عليكم انا اخذت شقه من منتجات سكني وبعد ماسكنت بأقل من شهر الكهرباء كل شوي يطفي وصلحته وخرب مره ثانيه وانفجر الكهرباء صار التماس هذا بدون مكيفات بس ثلاجه ولمبات وش الحل

#تساؤلات | الوالدة مريضه قلب وسكر وضغط الشي الي يضايقنا تصرفاتها تهاوش الشغاله وتكلم في الناس وخاصه اذا كنا في جمعه ننحرج من الناس وهي تكلم على فلان او فلانه كلمناها ما فيه فايده حاولت في دكتورتها تعطيها علاج يهديها رفضت الدكتوره هل اوديها مستشفى خاص يكتبون لها مهدي ابي حلول الله يعطيكم العافية

#تساؤلات | بسال وين احصل كمرة تصوير القديمه الي تصورك وتنزل ورقة وتحطها في ألبوم صور ، غالباً وحنا كنا اصغار كانت موجوده ، ابي اشتريه وين احصلها ياليت احد يفيدني

#تساؤلات | ابي اخذ رايكم لمن اروح لامي دايما تعبي راسي على زوجي بطريقه مباشره او غير مباشره علماً انه اطيب واكرم رجل بهالدنيا وبحكم اني زوجه ثانيه الا انه والله انه يكرمني اضعاف ولا يقصر باي شي .. مااخفيكم صرت اذا رجعت من عند امي اكون طاقه سلبيه عليه وهالعيد قررت اعيّد مع اهله بحكم انه بمكه دوام وامي تتصل علي وتزن اني اعيد عندها ومحتاره افيدوني لو انتم مكاني الله يفرج همكم ويسعدكم

#تساؤلات | السلام عليكم اولا ارجو من الجميع يدعي لي ، أنا شخص تزوجت اعف نفسي بالحلال لكن الله ماوفقني بزوجه تفهمني على صعيد النظافه العامه والشخصيه ماحنا متفقين أبدا لا على نظافه شخصيه لا على شعر جسم ووجه لا على روائح جسم لمحت مانفع تكلمت بصراحه مانفع حجزت مواعيد نفس كل المشاكل ترجع أنا تعبت أنا نفسيتي تأثرت من هالشيء دلوني للتصرف الصحيح يشهد الله ضاق الكون فيني

#تساؤلات | فيني غصة والم وقهر من وحدة ظلمتني في الدوام يشهد ربي ماسويت لها شي كنت واثقة فيها ثقة عمياء فجاة انقلب وجهها وطلع الوجه الحقيقي الي كله مكر وحقد ماادري وش قلبها علي والا هذي اصلا حقيقتها كانت تتهمني اني مااشتغل ولا افهم بالشغل فيني ضيم وقهر مارحت اشتكيت عليها ولاسويت لها شي وندمانة لاني تركت حقي يضيع ايش اسوي مررة مقهورة

#تساؤلات | السلام عليكم تقدملي شخص عمره ٤٥ يبغى زوجه ثانية متعلم عنده دراسات عليا معاه ٣ اطفال اخلاقه كويسه شكله جدا عادي دخله فوق المتوسط يسكن بمدينه غير مدينتي وانا لم يسبق لي الزواج و موظفه اسوق عمري ٣٤ جميله تقدمولي كثييير لكن ماكانو مناسبين وانا ارغب بالامومه اكثر من الزواج نفسه وكمان اهلي نوعا ما متشددين و ابغى حريه اكثر طلعات واستقلاليه هو موافق على جميع شروطي لكن محتاره لانه معدد وبعيد عن اهلي يعني مراح اشوفهم كثير بسبب عملي لو نقلت و ايش الشروط اللي اكتبها بالعقد وتحفظ حقي بما انه معدد غير السكن المستقل والوظيفه والقياده بليييز رايكم وتجاربكم خاصة اللي ماخذه معدد

#تساؤلات | السلام عليكم كيف الاوضاع مستقره في #الإمارات ؟ لان ناويه اروح #دبي سادس العيد وخايفه احجز بدري وكل شيء يتكنسل

#تساؤلات | اللهم احفظ بلادنا وقادتنا وأمننا و جميع بلاد المسلمين ، اللهم أدم علينا نعمة الأمن والأمان و الرخاء و الاستقرار ، اللهم رد كيد الكائدين وحسد الحاسدين و اضرب الظالمين بالظالمين و اخرجنا من بينهم سالمين

#تساؤلات | خالتي ترسل بناتها عندنا برمضان هذي ثالث سنه اكبرهم عمرها ١١ واصغرهم عمرها ٦ بحكم انها موظفه وتتحجج ان ماعندها احد يساعدها امي بعد موظفه وانا وخواتي كلنا طالبات نرجع من الجامعه ٤ العصر وعلى المطبخ على طول وغير انها تكون فتره ميدات ولخبطة نوم تبينا نطبخ لهم ونراكض وراهم وندرسهم ونتابع صلواتهم ونغسل ملابسهم وكل ما اقول لامي بكلمها بالموضوع ترفض وتقول عيب هذي خالتك مع العلم انها صغيره بالعمر بداية الثلاثين وامي كبيره وتعبانه وسكوتها خلاها تتمادى معانا نخلص فاينلات قبل المدارس ومانصدق نأجز ترسلهم لنا بداية اجازتنا (اسبوع اختبارات المدارس) ندرسهم كيف اتصرف معاها بدون مازعل امي ولا اخليها تشيل علي

#تساؤلات | أنا امرأة عمري ٣٠ سنة، سبق لي الزواج، وانفصلت بعد زواج استمر ثلاث سنوات بسبب إدمان طليقي للمخدرات، والحمد لله على كل حال. ليس لدي أطفال. تقدم لي مؤخرًا شخص قريب من عمري، سبق له الزواج ولديه طفلان صغار يعيشان مع والدتهما و مع خادمتهم الإنسان يبدو محترمًا وجادًا، ولدي مسكن مستقل تماما لكن لدي مخاوف حقيقية وأفكر بعقلانية قبل اتخاذ أي خطوة. أخشى أنه في حال علمت زوجته السابقة بزواجه، قد ترمي الأطفال عليه فجأة، أو تحاول الرجوع إليه، أو تحدث مشكلات تؤثر على استقرار حياتنا. لا أريد أن أبدأ تجربة جديدة وأنا قلقة أو غير مستعدة لما قد يحدث. أطلب منكم مشاركة تجاربكم أو نصائحكم بوعي واحترام، دون تجريح أو أحكام مسبقة. أحتاج أن أسمع آراء ناضجة تساعدني أرى الصورة بشكل أوضح وأتخذ قرارًا مطمئنًا. جزاكم الله خيرًا مقدمًا

#تساؤلات | استفسار عندي صالون نسائي له 8 سنوات وابغى اطلع قرض عقاري اسوي عماره خاصه فيني هل يعطيني البنك واذا يعطيني هل لازم كفيل وكم يعطيني

#تساؤلات | عندي آيبادات أطفال وساعات نسائيه ابي اسوق لها ماني عارف أنقذوني بحلول متخسر كثير فيها