میثاق | Misaq

بشپړ ځانګړی مستند! پیاوړي ملتونه د استعمار په منګولو کې! پاکستان څه ډول رامنځته شو؟ بنسټ یې چا کېښود؟ پوځ او استخباراتي اداره یې چا جوړه کړه؟ پاکستاني پوځ په خیبر پښتونخوا او بلوچستان ایالتونو کې کوم ډول وحشتونه ترسره کړي؟ پاکستان ولې په سیمه کې جنګ غواړي؟ دا او دې ورته پوښتنې په دې ځانګړي مستند کې ځواب شوې دي.

قالیباف ټرمپ ته: که امریکا داسې درې نورې بریاوې ترلاسه کړي په بشپړ ډول به له منځه لاړه شي د ایران د پارلمان مشر محمدباقر قالیباف په کنایي څرګندونو کې امریکا او د دغه هېواد ولسمشر ډونالډ ټرمپ ته په اشارې ویلي، چې که متحده ايالات درې نورې داسې بریاوې ترلاسه کړي، نو په بشپړ ډول به له منځه لاړ شي. قالیباف دا خبرې د روانو سیمه‌ییزو تحولاتو او د امریکايي پوځي الوتکې د نسکورېدو په تړاو کړي او ټینګار یې کړی، چې د امریکا پوځي او سیاسي اقدامات نه یوازې بریا نه ده، بلکې د هغه په وینا، د دغه هېواد لپاره د لا زیاتو ستونزو لامل ګرځي. دغه څرګندونې داسې مهال کېږي، چې د ایران او امریکا ترمنځ کړکېچ زیات شوی او دواړه لوري یو بل ته په تندو سیاسي او پوځي پیغامونو ځواب ورکوي. #ميثاق

راپورونه: د قاسم سلیماني لور په امريکا کې نیول شوې راپورونه وایي، چې امریکا حمیده سلیماني افشار، چې د ایران د قدس ځواک د پخواني قوماندان قاسم سلیماني له کورنۍ سره یې د تړاو ادعا کېده، له خپلې لور سره نیولې ده. د معلوماتو له مخې، دواړه اوس په توقیف کې دي او ښايي له امریکا څخه وایستل شي. خو د راپورونو پر بنسټ، د سلیماني لور دا ادعا رد کړې او ویلي یې دي چې له قاسم سلیماني سره هېڅ خپلوي نه لري. تر اوسه د دې پېښې په اړه نور رسمي جزییات نه دي خپاره شوي. #ميثاق

ګارډين: د ايران جګړې د امریکا اقتصاد فلج کړی د ګارډین ورځپاڼې راپور ورکړی، چې د ایران د جګړې له دوام سره په امریکا کې د بیو د لوړېدو نوې څپه رامنځته شوې ده. د راپور له مخې، اقتصادي کارپوهان خبرداری ورکوي چې دا بهیر ښايي ډېر ژر د اقتصاد بېلابېل سکتورونه هم تر خپل اغېز لاندې راولي. کارپوهان ټینګار کوي، چې د انرژۍ بیو لوړوالی، د عرضې ځنځیرونو ګډوډي او د نړیوالو بازارونو بې‌ثباتي هغه عوامل دي چې د امریکا پر کورني اقتصاد مستقیم فشار زیاتوي او د مصرفوونکو پر ورځني ژوند به هم ژور اغېز وکړي. #ميثاق

شکريه احمدي: هرات کې يې ۵۰۰ میرمنو ته د کار زمينه برابر کړې ده په هرات کې یوې مېرمنې د درملیزو بوټو د پروسس یو مرکز جوړ کړی، چې له لارې یې شاوخوا ۵۰۰ ښځو ته د کار زمینه برابره شوې ده. د دې تولیدي کارخونې مسؤولې شکریه احمدي ویلي، چې په مرکز کې له څه باندې ۴۰۰ ډوله بوټو څخه نږدې ۱۰۰ ډوله درمل تولیدېږي. د نوموړې په وینا، کارکوونکي د بوټو د پېژندنې او درملنې په برخه کې مسلکي روزنه ترلاسه کړې ده. د معلوماتو له مخې، د دې مرکز ډېری کارکوونکې هغه ښځې او نجونې دي چې د خپلو کورنیو سرپرستي پر غاړه لري او د همدې کار له لارې د خپلو کورنیو اقتصادي ملاتړ کوي. #ميثاق

ایراني رسنۍ: سپاه پاسداران په هرمز تنګي کې اسرائیلي کښتۍ ويشتلې د ایران دولتي رسنیو راپور ورکړی، چې د هرمز تنګي کې د اسرائیلو یوه کښتۍ د بې‌پیلوټه الوتکې له لوري په نښه شوې او اور یې اخیستی دی. د راپورونو له مخې، د ایران د سپاه پاسداران د سمندري ځواکونو قومندان ویلي، چې برید د ډرون له لارې ترسره شوی او پر یادې کښتۍ اور لګېدلی دی. تر دې دمه اسرائیلي چارواکو د دې ادعاوو په اړه رسمي غبرګون نه دی ښودلی. دا راپورونه په داسې حال کې خپرېږي، چې د سیمې امنیتي وضعیت له مخکې نه هم ترینګلی دی او د سمندري لارو د خوندیتوب په اړه نړیوالې اندېښنې زیاتې شوې دي. #ميثاق

کورنيو چارو وزارت: روان کال ۹۰ سلنه سرحدي ځواکونه له مسلکي زده‌کړو فارغ شوي د کورنیو چارو وزارت د سرحدي پولیسو ریاست ویاند عابدالله فاروقي ویلي، چې د روان کال په ترڅ کې نږدې ۹۰ سلنه سرحدي پولیسو ته مسلکي زده‌کړې ورکړل شوې دي. فاروقي زیاته کړې، چې په همدې موده کې سرحدي پولیسو د هېواد په هوايي ډګرونو، بندرونو او سرحدي دروازو کې د قیمتي ډبرو، تاریخي اثارو او نشه‌يي توکو د قاچاق مخه نیولې ده. د نوموړي په وینا، د یادو قضیو په تړاو یو شمېر کسان هم نیول شوي او د قانون منګولو ته سپارل شوي دي. #ميثاق

ډاکټر عبدالله عبدالله: د سیلابونو او زلزلې قربانیانو ته د تسلیت مراتب وړاندې کوم پخواني اجرائیه رییس ډاکټر عبدالله عبدالله د هېواد په بېلابېلو سیمو کې د وروستیو سیلابونو او تېرې شپې زلزلې له امله د اوښتو مرګ‌ژوبلو او زیانونو په اړه ژوره خواشیني څرګنده کړې ده. نوموړي ویلي، چې په دغو پېښو کې یو شمېر هېوادوال شهیدان او ټپیان شوي دي او د هغوی له کورنیو سره یې خواخوږي څرګنده کړې او ځان یې د هغوی په غم کې شریک بللی دی. ډاکټر عبدالله د پاک الله تعالی له دربار څخه شهیدانو ته د جنت فردوس، ټپیانو ته د بېړنۍ روغتیا او زیانمنو کورنیو ته د صبر او استقامت دعا کړې ده. هغه له نړیوالو سازمانونو او خیریه بنسټونو غوښتي چې له زیانمنو شویو کسانو سره د هغوی د اړتیاوو د پوره کولو لپاره بیړنۍ او اغېزمنې مرستې وکړي. #ميثاق

اشرف حق‌شناس: د ټولګټو وزارت وزير له کابل–جلال‌آباد لويې لارې لېدنه او د ژر خلاصون امر کړی د افغانستان ټولګټو وزارت ویاند محمد اشرف حق‌شناس ویلي، چې د دغه وزارت وزیر محمد عیسی ثاني د کابل–جلال‌آباد لویې لارې د تنګي غارو سیمې ته سفر کړی دی. د نوموړي په وینا، وزیر اړوندو تخنیکي ټیمونو ته سپارښتنه کړې چې د لارې د پاک‌کارۍ او ترمیم چارې ژر پیل کړي، څو د تګ راتګ ستونزه حل شي. له بلې خوا، خلکو ته سپارښتنه شوې چې تر هغه چې د لارې د پرانیستې رسمي اعلان نه وي شوی، له بدیلو مسیرونو څخه استفاده وکړي. #ميثاق

د افغانستان حکومت ویاند: د وروستیو ورښتونو له امله ۶۱ کسانو خپل ژوند له لاسه ورکړی د افغانستان حکومت ویاند ذبیح‌الله مجاهد ویلي، چې په هېواد کې د وروستیو ورښتونو او طبیعي پېښو له امله ۶۱ کسانو ژوند له لاسه ورکړی، ۱۱۶ نور ټپیان شوي او ۴ کسان نادرکه دي. هغه په خپله اېکس‌پاڼه لیکلي چې دغو پېښو پراخ مادي زیانونه هم اړولي، چې له مخې یې ۲۴۴۸ کورونه بشپړ یا جزوي ویجاړ شوي دي. د نوموړي په وینا، سربېره پر دې شاوخوا ۲۶ زره او ۸۴۱ جریب کرنیزه ځمکه تخریب شوې او له زر څخه ډېر څاروي هم له منځه تللي دي. مسؤولين وایي، د زیانمنو کورنیو سره د مرستو او بیړنیو اقداماتو هڅې روانې دي. #ميثاق

عاجل | فارس وایي د ایران هوايي دفاع امریکايي ډرون نسکوره کړې د فارس خبري اژانس راپور ورکړی، چې د سپاه پاسداران پرمختللو هوايي دفاعي سیستمونو د امریکا یوه بې‌پیلوټه الوتکه د اصفهان ولایت په فضا کې ویشتلې او نسکوره کړې ده. د راپور له مخې، یاد ډرون د ایران د مدغم هوايي دفاعي سیستم له لوري په نښه او له منځه وړل شوی دی . تر اوسه د دې پېښې په اړه د امریکا له لوري رسمي غبرګون نه دی خپور شوی، خو دا ډول ادعاوې د دواړو هېوادونو ترمنځ د روانو پوځي ترینګلتیاوو په ترڅ کې راپورته کېږي او د وضعیت د لا پراخېدو اندېښنې زیاتوي. #ميثاق

جيونيوز: متحده عربي امارات له پاکستان خپل ۲ ميليارده ډالر پور غواړي د پاکستاني رسنیو د راپورونو له مخې، متحده عربي اماراتو له پاکستانه غوښتي چې خپل ۲ میلیارده ډالره پور ژر تر ژره بېرته ورکړي او اسلام‌اباد هم د فشارونو له امله پرېکړه کړې چې دغه پور به د روانې میلادي میاشتې تر پایه تصفیه کړي. د جیو نیوز د راپور له مخې، د پاکستان د خزانې وزارت ویلي چې دغه هېواد اماراتو ته د یاد پور په بدل کې شاوخوا ۶ سلنه سود هم ورکاوه. وزارت زیاته کړې، چې اماراتو مخکې دغه پور هر کال تمدیداوه، خو د ۲۰۲۵ کال په ډسمبر کې یې لومړی د یوې میاشتې او وروسته د دوو میاشتو لپاره وغځاوه، چې اوس یې د بېرته ترلاسه کولو پرېکړه کړې ده. په ورته وخت کې، راپورونه ښيي چې چین هم له پاکستان غوښتي څو د انرژۍ اړوند یوه شرکت ته د ۲۲۰ میلیونه ډالرو پور ژر ورکړي. #ميثاق

راپورونه: هر پاکستانی وګړی ۳لک روپۍ قرضداری دی د راپورونو له مخې، د پاکستان ټول پور شاوخوا ۸۱ زره ټریلیون روپیو ته رسېدلی، چې له دې ډلې نږدې ۲۶ زره ټریلیونه بهرنی او ۵۵ زره ټریلیونه کورنی پور بلل کېږي. چارواکي وایي، د هېواد د شاوخوا ۲۵۰ میلیونه نفوس پر بنسټ، هر وګړی نږدې ۳ لکه پاکستانۍ کلدارې پوروړی دی. د معلوماتو له مخې، د پورونو دا لوړه کچه د پاکستان پر اقتصاد دروند اغېز کړی او د خلکو پر ورځني ژوند یې منفي سیوری غوړولی دی. راپورونه همداراز ښيي، چې پاکستان د خپلو پورونو د کمولو لپاره ځینې پوځي تجهیزات، لکه F-16 الوتکې هم لیلام کړې دي. #ميثاق

۲ | ځانګړی مستند پکيج کوم هېواد د تیلو له سخت بحران سره مخ دی؟ آيا پاکستان ريښتيا د دې بحران په درجه‌بندۍ کې لومړی مقام لري؟ په دې ځانګړي مستند پکيج کې د منځني ختیځ د روانې جګړې پراخ ابعاد څېړل شوي او دا روښانه شوې، چې دغه کړکېچ د نفتو پر نړیوال بازار څه ډول اغېز کړی دی. پکيج ښيي، چې د انرژۍ د بیو لوړوالی نه یوازې نړیوال اقتصاد متأثر کړی، بلکې د پاکستان په ګډون ګڼو هېوادونو کې یې مستقیم منفي اغېزې رامنځته کړې دي. په دې مستند پکيج کې همداراز د اقتصادي فشارونو، د سوداګرۍ د کمېدو او د ژوند د لګښتونو د لوړېدو هغه اړخونه هم څېړل شوي چې د جګړې له دوام سره ورځ تر بلې ژورېږي. #ميثاق

سرچينې: کونړ کې د فرضي کرښې هغې غاړې افغان ځواکونو د پاکستاني پوځ پوسته وسوځوله سرچينو ميثاق ته منلې، چې نن ماښام افغان ځواکونو د کونړ ولایت د سرکاڼو ولسوالۍ د ناواپاس سیمې کې د فرضي کرښې پورې غاړه د پاکستاني پوځیانو یوه مهمه پوسته په نښه کړې ده. سرچینو زیاته کړې، چې په دغه برید کې یاده پوسته په بشپړ ډول سوځېدلې ده. تر اوسه د پاکستاني لوري له‌ خوا د دې پېښې په اړه څه نه دي ویل شوي. #ميثاق

#عاجل خوست د پاکستاني پوځي رژيم او افغان ځواکونو ترمنځ نښته روانه ده ميثاق ته په رسېدلې ويډيو کې لېدل کېږي، چې د خوست غلام خان بندر کې د پاکستاني پوځي رژيم او افغان ځواکونو ترمنځ نښته روانه ده. تر دې مهاله د تلفاتو په اړه کره معلومات نه دي خپاره شوي. د نورو جزيياتو لپاره ميثاق سره پاتې شئ.... #ميثاق

ټرمپ اروپا ته: که د هرمز تنګي خلاصون کې مرسته ونه کړی، اوکراین ته وسلې نه ورکوم د فايننشل ټايمز د راپور له مخې، د امریکا ولسمشر ډونالډ ټرمپ اروپايي هېوادونو ته ګواښ کړی چې که د هرمز تنګي د امنیت لپاره له امریکا سره په ائتلاف کې ګډون ونه کړي، واشنګټن به اوکراین ته د وسلو لېږد ودروي. راپور زیاتوي، چې ټرمپ مخکې هم ویلي وو که ناټو د ایران په جګړه کې برخه وانخلي، امریکا به له دې پوځي تړون څخه ووځي. شنونکي وایي، دا ډول څرګندونې ښيي چې د واشنګټن او اروپايي متحدینو ترمنځ اختلافات مخ پر زیاتېدو دي او ښايي د دوی د ملګرتيا پايې له منځه لاړې شي. #ميثاق

عاجل | فنلنډ په پاکستان کې خپل سفارت وتاړه د فنلنډ د بهرنیو چارو وزارت اعلان کړی، چې په اسلام‌اباد کې به د دغه هېواد سفارت تر راتلونکي دوبي پورې وتړل شي. سرچینې وایي، دا پرېکړه د عملي، ستراتیژیکو او اقتصادي ملاحظاتو پر بنسټ شوې ده. دا په داسې حال کې ده چې سويډن هم په ۲۰۲۳ کال کې د امنیتي اندېښنو له امله په اسلام‌اباد کې خپل سفارت تړلی و. #ميثاق

راپورونه: بلوچ وسله‌والو نږدې ۵۰ بریدونه پر پاکستاني رژيم ترسره کړي راپورونه ښيي، چې د بلوچ ازادۍ غوښتونکي پوځ د پاکستان د بلوچستان ایالت په بېلابېلو سیمو کې نږدې ۵۰ جلا بریدونه ترسره کړي دي. د معلوماتو له مخې، دا بریدونه په کویټه، کیچ، مستونګ، سوراب، چاغي، جهل‌مګسي، نوشکي، خاران، واشوک، کمي او پنجګور کې شوي او هدفونه یې د پاکستان پوځ اډې او پوستې، پوځي کاروانونه او د پولیسو مرکزونه وو. راپورونه زیاتوي، چې په دغو بریدونو کې د واشوک په سیمه کې د شمسي هوايي اډه هم په نښه شوې، په کویټه کې د ګازو نل‌لیکه ښه ته چاودنه ورکول شوې او د اورګاډي پټلۍ په ۱۲ بېلابېلو ځایونو کې زیانمنه شوې ده. #ميثاق

سرچینې: د افغانستان حکومت پلاوی د سولې خبرو لپاره چین ته روانېږي سرچینو میثاق ته ویلي، چې له پاکستان سره د سولې خبرو په موخه د افغانستان حکومت یو پنځه کسیز پلاوی په راتلونکو څو ساعتونو کې د چین پر لور خوځېږي. د سرچینو د معلوماتو له مخې، په دغه پلاوي کې د بهرنیو چارو وزارت استازي محب‌الله وثیق او عبدالحی قانت، د کورنیو چارو وزارت استازی عارف‌الله، د دفاع وزارت استازی روح‌الله عمر او د استخباراتو لوی ریاست استازی یحی تکل شامل دي. ټاکل شوې، چې دغه خبرې د چین په کوربتوب د اورمچي ښار کې ترسره شي. #میثاق