RANA TV (رڼا ټلوېزیون)

ځایي سرچینې وایي، چې د جوزجان ولایت په شبرغان ښار کې پر يوه کور د نامعلومو وسله‌والو په برید کې يوه ښځه او درې لوڼې وژل شوې او درې زامن یې ټپیان شوي دي. د سرچينو په وينا، وسله‌وال کسان د شپې پر مهال يو کور ته ننوتلي او د ډزو په کولو سره یې د کور مور او درې لوڼې وژلې او درې کم‌عمره زامن یې ټپیان کړي دي. د سرچينو د معلوماتو له مخې، د ټپیانو روغتيايي حالت هم نازک بلل شوی دی.

د افغان سولې لپاره د امریکا پخوانی ځانګړی استازی زلمی خلیلزاد وایي، چې هغه د پاکستان د امنیتي ځواکونو پر ضد د وروستي برید خبر ترلاسه کړی، چې پکې ۸ پاکستاني سرتېري وژل شوي او ګڼ شمېر نور ټپیان شوي دي. خلیلزاد پر خپله ایکس پاڼه لیکلي، چې دا ډول پېښې د افغانستان او پاکستان ترمنځ شته کړکېچ نور هم زیاتوي او د اړیکو د لا خرابېدو خطر رامنځته کوي. نوموړي ټینګار کړی، چې د دواړو هېوادونو ترمنځ د شخړې پر ځای د همکارۍ او اقتصادي مشارکت یو بدیل او غوره مسیر شته، چې کولی شي د دواړو ولسونو لپاره سوکالي او ثبات رامنځته کړي. هغه د یوې هوکړې وړاندیز کړی، چې له مخې به افغانستان او پاکستان ژمن وي خپله خاوره به د هېڅ داسې ډلې یا کسانو لپاره نه پرېږدي چې د بل هېواد امنیت وګواښي، او دا به د یوې باوري درېیمې خوا تر څار لاندې عملي کېږي. خلیلزاد په پای کې ویلي چې دواړه هېوادونه د یوه خطرناک مسیر پر لور روان دي او اړتیا ده چې ژر تر ژره یو عملي بدلون رامنځته کړي.

د رڼا لید سریزه

کاروان: د کډوالۍ له سختو شپو ورځو د فرانکفورت د شورا تر غړیتوبه... دا ځل مینه اکبري له ښاغلي پروېز امیري سره غږېدلې، ښاغلی امیري توانېدلی چې په فرانکفورت کې د ټاکنو له لارې د بهرنیانو د شورا غړیتوب تر لاسه کړي. هغه د کډوالۍ د لومړنیو ناهیلیو بیا د بریا تر دريځه د ستړي مزل کیسې کوي. دا په زړه پورې خپرونه په لاندیني لېنک کې کتلی شئ. youtu.be/qsR6Cm_KXKM?fb…

د هند لومړی وزیر نرېندرا مودي د خپل پنځه‌هېوادیز سفر په پیل کې متحده عربي اماراتو ته رسېدلی دی. مودي د رسېدو پر مهال د پوځي جنګي الوتکو له بدرګې سره مل و او د متحده عربي اماراتو ولسمشر محمد بن زاید آل نهیان له لوري یې رسمي هرکلی شوی. مودي د اماراتو له ولسمشر سره په لیدنه کې د هرمز تنګي اهمیت ته په اشارې ویلي: «د هرمز تنګی ازاد، پرانیستی او خوندي ساتل زموږ لومړیتوب دی، او په دې برخه کې د نړیوالو قوانینو پابندي اړینه ده.» د هند د بهرنیو چارو وزارت ویلي، هند او اماراتو د نفتو او ګازو په برخه کې پر ستراتیژیکو همکاریو هوکړه کړې او اماراتو ژمنه کړې چې په هند کې به پنځه میلیارده ډالره پانګونه وکړي.

د اوکراین په خرسون ولایت کې د ملګرو ملتونو د بشري مرستو پر یوه کاروان د بې‌پیلوټه الوتکو برید شوی دی. اوکرایني چارواکي وایي، دغه پېښه د خرسون ښار د کورابېلني ولسوالۍ په مربوطاتو کې رامنځته شوې، چې پکې د ملګرو ملتونو د بشري چارو د همغږۍ دفتر اړوند مرستندویه موټرونه په نښه شوي دي. د راپورونو له مخې، برید د لومړي کس له لید سره سم هدایتېدونکو بې‌پیلوټه الوتکو په وسیله ترسره شوی او اوکراین روسي ځواکونه د دې حملې مسؤل بولي. د اوکراین ولسمشر ولودیمیر زېلېنسکي ویلي، په دې برید کې چاته زیان نه دی اوښتی او د ملګرو ملتونو ټول کارکوونکي په خوندي ډول له سیمې ایستل شوي دي. خرسون هغه سیمه ده چې د جګړې له امله پکې بشري مرستو ته اړتیا زیاته شوې او نړۍ وال بنسټونه په کې له زیانمنو او بې‌ځایه شویو خلکو سره مرستې کوي.

د خوست او پکتیا ولایتونو په یو شمېر سیمو کې نن ماسپښین سخت باران او ږلۍ شوې، چې له امله یې په ځینو سیمو کې ناڅاپي سېلابونه راوتلي دي. ځايي اوسېدونکي وایي، شدیدو ورښتونو کرنیزو ځمکو او لارو ته زیانونه اړولي دي. تر اوسه د احتمالي تلفاتو او مالي زیانونو په اړه کره معلومات نه دي خپاره شوي. د افغانستان د هوا پېژندنې اداره نن د هېواد په ۲۶ ولایتونو کې د بارانونو، تالندې، برېښنا او د سېلابونو د راوتلو اټکل کړی و.

د امریکا د متحدو ایالتونو ولسمشر د چین له تاریخي دولتي سفر وروسته د بېجینګ له نړۍوال هوايي ډګر څخه د ولسمشرۍ الوتکې «ایر فورس ون» ته پورته شو او خپل سفر یې پای ته ورسوه. هغه د هوايي ډګر په الوتنه‌ځای کې له چینایي چارواکو سره مخه‌ښه وکړه او د خپل رسمي سفر د پای ته رسولو په موخه یې هغوی ته خدای پاماني وکړه. دغه دولتي سفر د امریکا او چین ترمنځ د ډیپلوماټیکو اړیکو د پیاوړتیا، اقتصادي بحثونو او نړۍ والو مسایلو په اړه د خبرو اترو له امله مهم بلل شوی.

منظور پښتین وایي، د خیبر پښتونخوا صوبایي حکومت د هر ډول ظلم پر وړاندې یوازې د دعا کولو توان لري او له عملي اقدام څخه بې‌برخې دی. نوموړي ویلي، چې په پښتونخوا کې رسنۍ، امنیتي ځواکونه او هر څه د پښتانو نه دي.

د امریکا ولسمشر ډونالډ ټرمپ فاکس نیوز رسنۍ ته ویلي، چې ښايي ایران هڅه کړې وي ځینې توغندي له ځمکې لاندې راوباسي، خو هغه څه چې په دې څلورو اوونیو کې ترسره شوي، په یوه ورځ کې له منځه وړل کېدای شي او له منځه به یوړل شي. ټرمپ زیاته کړې، چې دوی دا وضیعت په بشپړ ډول تر څارنې لاندې لري. د راپورونو له مخې، ایران له اوربند څخه د فرصت په توګه کار اخیستی او هڅه یې کړې، چې د ویجاړیو لاندې خښ شوي توغندي او د توغندیو توغولو وسایل راوباسي، او د خپلو توغندیزو او د توغندیو توغولو وسایلو یوه د پام وړ برخه یې ساتلې ده.

Manzoor Pashteen, the leader of the Pashtun Tahafuz Movement, said in his recent remarks that Pashtuns cannot achieve a peaceful and prosperous future under Pakistan. He argued that the ongoing conflicts in Pashtun regions are proxy and manufactured wars orchestrated by Pakistan. According to him, the Taliban were created to destabilize the region and provide the Pakistani military with a pretext to occupy territory and displace local populations. Read More on our website. ranatv.com/manzoor-pashte…

د پښتون ژغورنې غورځنګ مشر منظور پښتین په خپلو وروستیو خبرو کې ویلي، چې پر ملتونو بده ورځ راتلل تصادف نه وي، بلکې د اوږدې مودې د بې‌غوریو پایله وي. هغه زیاته کړې، چې له دغسې حالت څخه راوتل هم د یوې ورځې کار نه دی او اوږده مبارزه غواړي. هغه ویلي، چې د پي ټي ایم مبارزه د هرې ملي مبارزې په څېر په لنډ وخت کې ننګونې زیاتوي، خو له ستونزو د دایمي خلاصون لپاره ملي مزاحمت یوازینۍ لار ده. د هغه په وینا، د پاکستان ټولې رسنۍ او رسنوال د استعمار په خدمت کې واقع دي. پښتین پاکستان یو تش په نوم ریاست بللی او ویلي یې دي، چې هیڅ ریښه نه لري او اساسي کار یې د پښتنو بېوزله کول دي. هغه ادعا کړې، چې په تېرو دوو اونیو کې پاکستان پر پښتنو ولسونو سلګونه ډرون بمونه غورځولي او بې‌ګناه ماشومان، ښځې او سړي یې شهیدان کړي دي. نور د رڼا پر ویب سایټ لوستلی شئ ranatv.com

د مستعمره پښتونخوا د بنو اوسېدونکي وایي چې پاکستاني پوځ له خلکو سره ناسم او له زور زیاتي ډک چلند کوي. د هغوی په خبره، د نیونو پر مهال له خلکو سره سخت او سپکاوی کوونکی چلند کېږي او ملکي کسان د زور او فشار له لارې نیول کېږي.

د ګران وطن د سالنګونو طبیعي ښکلاوې. 🇦🇫 📷: جواد تیموري

ایراني رسنیو راپور ورکړی چې د ایران او چین ترمنځ د تفاهم او د ایران د مدیریتي اصولو په چوکاټ کې، د هرمز تنګي له لارې د یو شمېر چینایي بېړیو تګ راتګ پیل شوی دی. د راپورونو له مخې، دغه پرېکړه د چین د بهرنیو چارو وزیر او په تهران کې د چین د سفیر تر سلا مشورو وروسته، او د دواړو هېوادونو د ستراتیژیکو اړیکو په پام کې نیولو سره شوې ده. ویل شوي، هغو چینایي بېړیو ته د تګ اجازه ورکړل شوې چې د ایران له ټاکل شویو اصولو سره سمون ولري. راپورونه زیاتوي، دا اقدام د ایران د کورنیو اصولو له مخې ترسره شوی او ښيي چې تهران د دې مهمې سمندري لارې امنیت په بشپړ ډول تر خپل مدیریت لاندې لري.

د ایران د بهرنیو چارو وزیر عباس عراقچي متحده عربي امارات د ایران پر ضد په مستقیمو پوځي بریدونو کې په لاس لرلو تورن کړی او له ابوظبي یې غوښتنه کړې چې له اسرائیل سره د خپلو اړیکو بیا کتنه وکړي. عراقچي دا څرګندونې په نوي ډهلي کې د بریکس د بهرنیو چارو وزیرانو په غونډه کې وکړې. عراقچي ویلي: «متحده عربي امارات په مستقیم ډول زموږ د هېواد پر ضد په تېري کې دخیل و او اجازه یې ورکړې وه چې له خپلې خاورې څخه د ایران پر ضد د وسلو او پوځي تجهیزاتو د توغولو لپاره استفاده وشي.»

په پښتونخواه کې د پاکستاني پوځ بې رحمه عملیات روان دي، د پښتنو کلي کنډواله کيږي او ترهګریزو پروژو ته زمینه برابروي. پاکستان پوځي رژیم بیا د پښتنو خاورې ته ډالري جنګ راوړي. د پښتونخواه او د فرضي کرښې دېخوا سیمو ته یو واحد پلان او دسیسه جوړه شوې ده. د رڼا لید په دې خپرونه کې له پښتونخواه څخه ازاد خبریال شمیم شاهد او له لندن څخه پخوانی ډيپلومات عزیزالدین معارج پر دې موضوعاتو غږېدلي دي. بشپړه خپرونه youtu.be/iOR6DxVMXjo?fb…

افغانستان کې د ملګرو ملتونو مرستندویه دفتر (یوناما) د طالبانو حکومت لخوا د ناڅرګندو تورونو پر بنسټ د دریو خبریالانو د توقیف په اړه ژوره اندیښنه څرګنده کړې. یوناما وایي چې د دغو خبریالانو د نیولو قانوني بنسټ او پر دوی لګېدلي تورونه باید په واضح ډول روښانه شي، او ټینګار یې کړی چې د توقیف په بهیر کې باید د نیول شویو کسانو حقونو ته په هر وخت کې درناوی وشي. یاد دفتر زیاته کړې چې ازادې، خپلواکې او خوندي رسنۍ د روڼتیا، حساب ورکونې او د افغان ټولنې د هوساینې لپاره اساسي ارزښت لري. یوناما له واکمنو چارواکو غوښتنه کړې، چې د بشري حقونو د نړیوالو اصولو له مخې خپلو مکلفیتونو ته ژمن پاتې شي، او ډاډ ورکړي چې خبریالان وکولای شي له ډار، ځورونې او د غچ اخیستنې له وېرې پرته خپل رسنیز فعالیت ته دوام ورکړي.

د غزني لپاره د طالبانو حکومت د اطلاعاتو او کلتور ریاست چارواکو په یاد ولایت کې د بې‌پيلوټه الوتکو د احتمالي بریدونو په اړه خپاره شوي راپورونه رد کړي او هغه یې «بې‌ بنسټه اوازې» بللې دي. د غزني ولایت د اطلاعاتو او کلتور رئیس ملا حمیدالله نثار ویلي، هغه راپورونه چې ځینو رسنیو د تېرې شپې د پېښو په اړه خپاره کړي، حقیقت نه لري او د ده په وینا، د هېواد د امنیت، سولې او پرمختګ پر ضد تبلیغاتي هڅې دي. نوموړي زیاته کړې، چې ځینې غربي رسنۍ د هغه څه په خپرولو کې ښکېلې دي چې دی یې د «جعلي خبرونو» په توګه یادوي او هدف یې د خلکو د اندېښنو زیاتول او د افکارو اغېزمن کول دي. دا څرګندونې وروسته له هغه مخې ته راځي، چې تېره شپه یو شمېر رسنیو په غزني ولایت کې د بې‌پيلوټه الوتکو د بریدونو په اړه راپورونه خپاره کړي وو.

د پاکستان دولتي بانک د تازه شمېرو له مخې، د ۱۴۰۵ لمریز کال د وري میاشتې تر پایه د پاکستان د مرکزي حکومت ټول پورونه ۸۰ زره او ۵۲۴ میلیارده پاکستانۍ روپیو ته رسېدلي دي. د راپور له مخې، د روان مالي کال په لومړیو نهو میاشتو کې د حکومت پورونه ۲ زره او ۶۳۶ میلیارده روپۍ زیات شوي دي. د پاکستان دولتي بانک ویلي، حکومت د مالي کال تر وږي میاشتې پورې ۱ زره او ۲۸۳ میلیارده روپۍ پورونه بېرته ورکړي، خو له وږي څخه تر وري پورې یې ۳ زره او ۹۱۹ میلیارده روپۍ نوي پورونه اخیستي دي. د شمېرو له مخې، د حکومت ۷۱ سلنه پورونه کورني دي، چې ټول ارزښت یې ۵۷ زره او ۵۶۶ میلیارده روپۍ دی. د پاکستان حکومت په تېرو شپږو میاشتو کې له کورنیو سرچینو څخه ۴ زره او ۱۴۲ میلیارده روپۍ پور اخیستی دی. همداراز، د وري میاشتې تر پایه د حکومت بهرني پورونه ۲۲ زره او ۹۵۹ میلیارده روپۍ وو او حکومت په همدې موده کې خپل بهرني پورونه ۲۲۲ میلیارده روپۍ کم کړي دي.