
انا ياوليفي فيك كيف اوفي التوصيف !
لو اني من اقصى عمق بحر الشعر غارف
يكفيك عن شعري خفوقٍ ماجاه الزيف
عطيتك خفوقي ماعطيتك من الطارف
وانا لو ظروفي كل ليله تجي بالكيف
ماخليت دمعك من سبب ضيقتك ذارف
مقابلك ريف وغيبتك مثل عج الصيف
ومحبتك مع طول الزمن غصنها وارف
عشقتك وعن غيرك حديت الركاب معيف
لو ان المشاعر سيلها بالهوى جارف
ابا اموت من يمي ماجاك الجفا والحيف
ولا انساك لو اني على موتي مشارف
اداريك مثل اللي ببيته يداري ضيف
عن الجاهل اللي كلمته تجرح العارف
تفاخر بي اليا حل عند الوفاء تعريف
مثل فخر روس مطير في فيصل الهارف
ــــ سالم الطريسي
العربية





