Sabitlenmiş Tweet
مؤخرًا، الواحد أصبح بيفتقد طاقته -وربما قدرته كمان- على التعبير عن حاجات كتير، أو هكذا أعتقد يعني، ليونيل ميسي عمره ما كان من ضمن الحاجات دي، لأنه كان دايمًا بيفقدك القدرة على التعبير، حتى لو كان أكتر لاعب اتكلمت عنه، كان بيحسسك دايمًا إنك ماقولتش حاجة.
ميسي لو خِصم، فهو خِصم مُزعج لأقصى درجة، يمكن أكتر خصم مزعج في تاريخ اللعبة، تبقى شايف فرقتك قدامه بتقدم جيم نموذجي، وهو بقرار واحد بس -ماشمّش ريحة العدل- بينقل الأفضلية للناحية التانية تمامًا، وبشكل إعجازي ماتقدرش خلاله تلوم حد غيره هو، لأنه ببساطة بيقدر يعمل كل حاجة، وبمثالية مُزعجة، بيبقى صعب معاها لوم أي شيء كان بإمكانه تفادي الضرر اللي أحدثه. فضلًا عن صعوبة تقبُّل فكرة إن لاعبك المفضل يكون في قمة مستواه، لكن مشكلته الوحيدة إن فيه لاعب واحد بيعمل نفس الحاجة وبشكل أفضل، فضلًا عن جوانب تانية في الكورة وبشكل أفضل من أصحابها برضه، وده شىء مُزعِج قطعًا.
المشكلة الحقيقية، واللي السوشيال ميديا لعبت دور نموذجي في تعزيزها، في الكورة وغيرها، كانت دايمًا محاولات الانتصار لقناعة واحدة، موحَّدة الاتجاه، وبأي شكل، حتى لو الأشكال دي انحصرت في أغلب المناسبات على التدليس، أو اختراع منطق لحظي يتماشى مع اللي أنت عايز الناس تقتنع بيه، ومن ثمَّ، تجد فعلًا أنها حاجة مقنعة، وده مش شيء صعب، أي فكرة سهل تمنطقها طالما بتدور في إطار قناعة معينة عندها شعبية كافية لترويجها، حتى لو كان سهل ضربها كونها خارجة عن المنطق أو الإنصاف، لأن مش ده المهم، كان المهم دايمًا إننا كتير، ولو شايف اللامنطق اللي بنقوله مش منطقي، فده لأنك متعصب لقناعتك أنت كمان، مش عشان بتضع الأمور في نصابها الصحيح. ده كان الحل الوحيد لتدارك معضلة إن دايمًا فيه حد أحسن من لاعبك المفضل مهما عمل، لأنه ببساطة سقف اللعبة.
لو قارنته بهدَّاف، فالمقارنة هتبدأ وتنتهي عند التهديف، ولما تبدأ تقارن في صناعة اللعب هتستعين بطرف آخر للمقارنة، اللي دوره هو كمان هينتهى لما تبدأ وجه مقارنة تالت، وهكذا، الجميع بيبدأ دورهم وينتهي وقت مقارنة جانب بعينه من جوانب اللعبة، لكن دايمًا فيه طرف ثابت في المقارنة، بيتغيَّر قدامه الطرف التاني بتغيُّر وجه المقارنة، طرف بيعمل كل حاجة ليها علاقة بالكورة باستثناء حراسة المرمى بفارق خزعبلي عن أي حد، الطرف ده هو سقف اللعبة.
الصراع اللي خلقته الصحافة في فترة سابقة، ثم عززته السوشيال ميديا، حرم ناس كتير من حاجات كتير في اللعبة، كان ميسي في مقدمتها، لأن موجة "كراستي أحسن من كراستك" كانت بتحرمك دايمًا من الاستمتاع بيه، لأنك كنت مشغول في البحث عن منطق لحظي وأسباب هُلامية كافية بالنسبالك للتقليل منه، بشكل منافي للمنطق، ومناقض للواقع، كنت بتحط عقابك بإيديك وأنت أسير الموجة إياها.
مافيش ما يُبرر وجود لاعب بيعمل كل المهام دي بالجودة الخرافية دي، وبالتأثير ده، طول السنين دي، وبنفس القدر من المتعة كل مرة، وبالتالى فمن باب أولى مافيش منطق يُبرر إن الأفضل يكون هو اللي مابيعملش كل ده. ميسي هو الدليل على ما تبقَّى من عظمة كرة القدم على رأي خوانما ليو.
ميسي، لو مش بالنسبالك خِصم، فهو صديق عظيم، ميسي أوفى أصدقائك على الإطلاق، بيجيلك دايمًا في الوقت المناسب، بيشاركك لحظاتك السعيدة، أو بيكوِّنها هو لو مش موجودة، ويبدد أحزانك في لحظة.
بعينيك، بالأرقام، بعقلك، بالحد الأدنى من الإنصاف، بالذائقة الكروية، خِصم كان أو صديق، ميسي أعظم لاعب في تاريخ اللعبة.
يا وعدي ع الأيام، بتعدِّي بينا أوام
وبتدِّي ما بتدِّيش، نِدبل وهي تعيش
غَرورة، غَرورة ما بيَدِّيش.
.
٢٤ يونيو ٢٠٢١.
#Messi38
العربية
