Sayed Ahmed

«عمرى ما كنت أتخيل إن قرار أخدناه بحسن نية ممكن يغير حياة أمى بالشكل ده».. بهذه الكلمات بدأ محمد طه حديثه عن تجربة والدته مع «نظام الطيبات». وأوضح «طه» أن والدته كانت تعانى من قصور فى الكلى، وتتابع مع الأطباء وتتناول علاجًا منتظمًا بشكل طبيعى، حتى سمعت عن «نظام الطيبات»، وكيف أنه يمكن أن «يساعد فى تحسن الحالة». وأضاف: «فى البداية، الفكرة تبان مطمئنة، خصوصًا لما اتقال إن النظام طبيعى وبيعتمد على أكل معين ونمط حياة صحى، لدرجة أنا نفسى اقتنعت بالكلام، وبدأت أشجع أمى إنها تجربة، على أمل إن حالتها تتحسن، أو على الأقل تستقر بدل ما تفضل معتمدة على الأدوية طول الوقت». وواصل: «أصعب قرار خدناه كان لما تم إقناعنا بوقف أدوية الكلى والضغط، كنت متردد، لكن الكلام كان فيه ثقة كبيرة، وكأننا أخيرًا لقينا الحل اللى هيريّحها، أمى كمان كانت حابة تجرب، وبدأت فعلًا تلتزم بالنظام بشكل كامل». وأكمل: «عدّت الأيام الأولى عادية، لكن بعد حوالى أسبوعين بدأنا نلاحظ إنها بتتعب أكتر، الإرهاق زاد، وشهيتها قلت، وبقى فى أعراض غريبة ما كانتش موجودة قبل كده، ورغم ده كنا بنحاول نقنع نفسنا إن ده طبيعى والجسم بيتأقلم». وأكد أن «الأزمات بدأت فى الظهور مع الأسبوع الثالث»، موضحًا أن «حالة أمى اتدهورت بشكل مفاجئ، وبقت مش قادرة تتحرك، وتعبها بقى واضح جدًا، لدرجة إننا اضطرينا نروح بيها المستشفى بشكل عاجل، وهناك الأطباء أكدوا إن حالتها تطورت إلى فشل كلوى، وإنها محتاجة تدخل عاجل، ووصل الأمر لدخولها العناية المركزة». وتابع: «قالوا لنا هتحتاج غسيل كلى بشكل منتظم، حسيت إن الدنيا وقفت، وإن قرار واحد غلط قلب كل حاجة، ودلوقتى أنا بحكى اللى حصل مش عشان ألوم حد قد ما هو تحذير لأى حد ممكن يمر بنفس التجربة». واختتم بقوله: «أى علاج أو نظام لازم يكون تحت إشراف طبى حقيقى، ومينفعش أبدًا نوقف أدوية مزمنة من غير الرجوع لدكتور متخصص، اللى حصل مع أمى درس قاسى، وأنا لسه عايش مع تبعاته كل يوم».