البارحة والخاطر اللي على ماش
دارو عليّه من الشياطين شلّه
اثنين جوني من ورا ديار الاحباش
أحدٍ يعقد الحبل والثاني يحلّه
واثنين لا بالله من هضاب عكاش
أهضاب نجد الشامخات المطلّه
صاهب وخادل ومعولش وعلّاش
كلٍ عليّه قام سيفه يســلّه
أحدٍ يبي يحرق خفوقي مع الجاش
ومافات من الماضي شريطي يهلّه
يسوقني في سكة الهم لا عاش
سوق السجين اللي بقيده مذلّه
ناديت للماضي وفي قلبي ارعاش
ارعاشة منها ضلوعي مخلّه
ذرفت منها مالح الدمع وانطاش
ولي هيبةٍ من موقفي مضمحلّه
والثاني الملعون يرسم ونقّاش
نقش على حدود السماء صورةٍ له
والثالث الأعور مخادع وغشاش
كافر ولا له بين الناس ملّه
يقول مستقبل حياتك على هشاش
كله كوارث سطّره في سجلّه
ويمكن تخش من المرض قسم الانعاش
والموت قرّب والمنافع مقلّه
والرابع المارد مسولف وهرّاش
نفات والتشكيك عنده جبلّه
يقول بك مستعصي الجن نهّاش
ينهش خلايا القلب ويحط علّه
ويوم استوى تكتيم الافكار وانداش
ارتاب قلبي ثم حسيت ذلّه
اسمعو يا معشر الجن الاوباش
العبد له مقسوم والله يدلّه
الآدمي لو يعلم الغيب ماعاش
وان عاش يفقد نعمة العقل كلّه
هذا #الشعر من #الاشعار اللي راقت لي الحقيقة
العربية
