عبدالله

🚬 كنت ادخن وادري التدخين طول منت صايم منغث وتبيه واذا افطرت ودخنت.. دخت ولاع كبدك ووالله ان هذا اجمل رمضان يمر علي من سنوات الحمدلله اللي انعم علي بالاقلاع عنه ٢٠ سنه وانا ادخن ومريت عيادة التدخين حجزت من صحتي واعطوني دواء اسمه شامبكس -وصفة- الدكتور يوم اعطاني الدوا قال ابيك تدخن بيديك ورجولك 😂 لا توقف بس خذ الدوا .. قلت تم بعد ٩ يوم طعم الدخان صار الله يكرمكم مثل الزبالة وشوي شوي بدت اكرهه والصدق اني صملت انا بعد بالبداية شوي غثيان وجاتني اغرب كوابيس تتخيلها!! اكون بمشكلة او مصيبة بالحلم وبعدين بالحلم اعصب واطلع الدخان وادخن 🤣 الكوابيس هذي يمكن جاتني مرتين او ثلاث وكلها كانت مقاومة من عقلي الباطن لقرار الاقلاع بسبب الادمان القوي على النيكوتين بعدها صرت انسى علبة الدخان بالبيت واطلع او احط الزقاره وما اولعها وانساها شوي شوي بديت اتقبل الفكرة خصوصاً لما بدا يظهر على وجهي وشهيتي والتنفس صار مريييح تجيني وقتها هفات ابي ادخن بس اقاوم خمس دقايق وتروح صرت ما اعصب ! يعني اكتشفت ان ٩٠٪ من اسباب النكد والهواش كانت الدخان والله ما ابالغ يعني الأصل الاصل ان مزاجي رايق كذا بدون شي وناادر شي يعكره غير كذا .. اطفالي ..!! صرت اقدر اقعد مع عيالي اكثر صرت اقرب لهم اول كنت منعزل بعالم لوحدي لاني مابي ادخن قدامهم كانوا يشتاقون لي بس اجي اسلك لهم واروح عشان ادخن 😥 الجمعات العائلية الاجتماعات الجلسات كل شي تغير ، صرت متواجد اكثر ومستقر اكثر وبصحة نفسية وجسدية افضل ولله الحمد يمكن انت مستغرب اني اقول لك هالكلام وهالاعتراف وانا مثلك مستغرب من نفسي لان مو عادتي اقول شي كذا لكن اقسم بالله اني احبك واحب لك الخير وادري انك تعاني وذقت اللي تذوقه شيشة ودخان وايكوس وكل ذا الطقة واقولك الحياة على الجانب الاخر من المعادلة عظييمة ماني بقايل لك اترك الدخان .. بقولك ارجع للحياة اللي تستحقها