علي بن هادي

أمس أخوي عزمني أنا وعيالي على فطور رمضان، وجا بنفسه أخذني من البيت، الله يرضى عنه. أول ما وصلنا، زوجته فتحت الباب وهي مبتسمة ومبسوطة، ورحبت فينا بحرارة كأني بنتها اللي جاية لها بعد غياب طويل. بصراحة حسّيت بدفء كبير من أول لحظة. أخوي بنفسه صار يحط الأكل قدامي، ويقطع الدجاج بيده ويقول لي: “كلي يا أختي، والله الجلسة معك على الأكل تفتح النفس.” وزوجته تضحك وتقول: “والله ما بقى إلا يلقمها بيده.” الموقف أثر فيني مرة، وحسّيت دموعي بتطيح من الفرح. حسّيت كأني رجعت لبيت أبوي مرة ثانية. ولما رجعت، حط في يدي مبلغ بسيط، وصار يحلف إني آخذه وأنا أحلف إني ما أبغاه، لكنه أصر لين أخذته غصب عني. وقعدت طول الليل ماسكة الفلوس وأشم فيها ريحة عطره، وما قدرت أصرفها من كثر ما الموقف لمس قلبي. بعد الفطور جلسنا شوي نسهر على شاي وبزر وفاكهة وضحك، ولما رجعني البيت فتح شنطة السيارة وطلع أكياس فيها تمر وقطايف وعصير ولقيمات وخبز وفاكهة. أنا أرملة، لكن والله عمري ما حسّيت إني مكسورة أو لحالي، لأن بعد ربنا أخوي هو سندي، وزوجته عمرها ما ضايقتني يوم، بالعكس دايم تقول لي: “يا وجه الخير علينا.” الحين هم يبغون يجون يفطرون عندي، لكن يقولون بيجيبون الفطور معهم. وأنا ودي هالمرة أطبخ لهم بيدي من قلبي وأكرمهم مثل ما أكرموني. كيف أقنعهم يخلوني أنا اللي أسوي الفطور هالمرة؟ وبالمناسبة، ادعوا لهم الله يجازيهم خير، الأخ الحنون وزوجة الأخ الطيبة فعلًا رزق كبير من الله… وأقدر أقول إنهم العوض الجميل في حياتي ❤️.