Sabitlenmiş Tweet

أودعت قلبي في يدينك وهالحين
عساك ماتشكي علي من ضياعه !
ليه الكلام يجيبك يسار و يمين
وأنا احسب ان عندك لمثله مناعة
ماكنت أصدق فيك حتى الصدوقين
وشلون عاد مروّجين الإشاعة
ماكانت الهقوة تعرّضني البين
وتترك هوى قلبك وتجفا متاعه
الله كم داريت مابيننا البين
خوفي على مبنى يهيل ارتفاعه
اللي بنيته لك من سنين وسنين
ماهو بحق يروح في ظرف ساعة
أصبحت مثل مسدد الدين بالدين
ماعاد يملك غير صبره .. و باعه
يوم المحبة قسّمتني لنصفين
نويت أحدد موقفي عن قناعه
وقناعتي هذي تخيّرك بأمرين
أما وصالٍ زين .. ولا قطاعة
ان جاز لك ؟ جعلت ترحّب ملايين
وان ماحصل دوك الفضا واتساعه
قد قلت لك بتحبني حبّني زين
ولا كثر خيرك و ردّ الوداعة
العربية

























