بدر الدفيليج

مايجيك الا نصيبٍ عليه اسمك يلوح ان بغيت تعيش بالمدن والا بالقرى قابل اللي تجيب الايام بالوجه السموح دام منها ما سلم لا رعاه ولا اومرا التفاؤل ياخذك من طموح الى طموح والتشاؤم يحذفك انت واحلامك ورا وان نصحك اللي مخليته الدنيا نصوح اسمعه لو كان ما قد كتب والا قرى

من يحس بشعور الفوز قبل انه يجي بالماد هو اللي يلفت انظار العرب باسلوبه الهادي لو ان اغلب قرارات البشر مافي طرفها عناد ماشفت البعض ينزف جرحه ولا زال متمادي نفوس الناس في تالي الزمن ماهي على المعتاد تجي وتروح ماتدري من تحب ومن تعادي

على كبر الامانه ليش يوم يشيلها الانسان وهو في معظم الاوقات دوب تشيله عظامه

انا لي شهور اقوم الليل واغفى الصباح واحس في جرح ولا ادري متى بانزفه كيف التجي واتودد للقلوب الشحاح وانا ولد من يدينه بالعطا مسرفه اقسى المحطات مابين الفشل والنجاح كم ضاع فيها شجاع ورد عن موقفه ياجعلني في عيون الناس قصة كفاح لو كنت في عين نفسي حادثه مؤسفه

النفس تقبل مثل ماتقبل الخيل وتصد لو ان النعم مستديمه شيٍ تخافه من عقوبه وتنكيل وشيٍ تعافه من كرامه وشيمه لو كان تضحك من كلام المهابيل لابد تبكي من دموع اليتيمه والوقت نفس الوقت مافيه تبديل يمضي وينسخ لك جديده قديمه تكثر بركته بالدعاء والتهاليل وتقل من قل النوايا السليمه

كل شيٍ يهون الا مطيح العزوم انهض ووقف عزومك على حيلها اقهر النفس واضحك في وجيه العموم واعرف اللي عليها واعرف اللي لها ما يهزم الخصوم الا احترام الخصوم ولا يذل الصعاب الا رياجيلها ..

الصغار تطيح نظرتهم على الحلم الموالي والكبار يبعدون الحلم ويموتون دونه

اذا جفتك الحظوظ البيض هملها تاتيك بكره على الرجلين منساقه جمّل ماتقدر من ايامك تجمّلها ولا تشتكي للعرب حزنٍ ولا فاقه مشغوله الناس بانفسها لا تشغلها صدوف الايام .. جمّاعه وفرّاقه ماتوجع الحاجه الشينه سوا اهلها وما استاحش من الجفا الا واحدٍ ذاقه

اتغافل ماني مغفل وانا اعرف الحقيقه واخدع اللي يحسب انه بالزمن يقدر خداعي دبلوماسي في علاقاتي ونظراتي عميقه لاني انسان انطوائي لاني انسان اندفاعي نار عدواني علي اهون من النار الصديقه ما اتحملها واحاربها ولو يكثر نزاعي

اللي ماعنده كرامه شي اكيد انه ماعنده ضمير وانت الذي كنت تدهن لحية الشيطان واشنابها

اللقى جثه مكفنها الغياب والحقيقه بنت ماتلبس غطا لا تفلّت من مخاليب العتاب وانت ملح وجرحك الغاير بطا ليت فيني طبع ضبع وناب داب كانت احلامك مثل ريش القطا بس ماعندي ورا كذبك جواب انا ماني شاطر الا بالعطا والخطا اطول لسان من الصواب والصواب اطول يدين من الخطا

حبيبي وصرنا للعواذل محط انظار وانا نظرة العذال ماني باوطنها احبك وخايف من غدر وقتي الغدار ومن حب مثلك كيف الايام يامنها والاعذار ترخص قدر الاحباب بالتكرار وش الفايده باعذارك ان ما تبرهنها تغيرت واجد ليه صاير غريب اطوار وعود الغرام الماضيه وش بقى منها

كانت الدنيا تساهيل ومسره قبل اعرف اقصاه واعرف الحقيقه ليت قلبي سطحي ادنى ما يغره العميق جروح خذلانه عميقه الطواري ما وراها الا المضره تبدي السجه وتقفاها بضيقه اشغلوني فالحكي خيره وشره والا شفوا لي على السلوى طريقه ياوجودي والعمر ماغير مره اخذوا 10 سنين واعطوني دقيقه

عيّت تموت الفتنه اللي من فصيل الى فصيل اليا قطعنا راسها عيّت تموت رجولها

اضحك على نفسي وانا اقول قدام والمشكله قدام تبغى عزايم والادمي مايذبحه حب وهيام مايذبحه غير القهر والظلايم ياراسي ارتح من تفاكير الاوهام تراك قدوة لابسين العمايم تراك بالتفكير حطمت الارقام وخليتني في بحر الاوهام هايم اصبر لو انك تالي الوقت منضام ترى حلاة الفوز بعد الهزايم

الله اكبر وحده النافع الضار آمنت به حتى ولو مانظرته سبحانه اقرّب له بورد الاذكار لا ضاقت الدنيا عليّه ذكرته جل وتعالى مابتخفاه الاسرار يعلم خفي السر واللي جهرته فلا إله الا انت اجرني من النار وقتي بذكرك يا إلهي عمرته بانت على وجيه المصلين الانوار وجهٍ سجد لك وانت بالنور انرته

معه نفس لاعافت تفارق ماعاد تشين فلا تختبر صبره معك طالبك طلبه يحبك لكن ماوده انك تعرفه زين ولا وده تشوف الموازين منقلبه ليا صد ماعاده مع الذكريات يلين لو ان الهوى غلاب ماتقدر تغلبه ولو حن لك قلبه ورفت عليك العين يده سكرت عينه ورجله وطت قلبه

انا لازعلت حصان واليا رضيت حصان اعرف ادمح الزله واعرف امسك الزله لكن الضعوف اللي مافي عقلها ميزان تدور ضياع الراي وتجيك منتله ولا ينفع الاحسان يامدور الاحسان سوا فالقليل اللي من القله القله يخرّب على الرجال طيبه بعض الاحيان سوات المطر لا جا بحلٍ ماهو حله

الله يعين اللي ليا ضاق ما نام لولا حبوب النوم ماهو بنايم ماغير يحسب لليالي والايام من طول الغيبات جاب الغنايم اشيل لي همٍ بقلبي له اعوام من سبته ماني مع الناس دايم والله يا لولا حكم شيٍ بالاسلام اني لاموت ولا لي ان مت لايم لكن بصبر والصبر سيد الاحكام والله يجازي كل صابر وصايم

الا يالله إنا تحت هيبة سماك ضعوف ولا نعلم الخافي ولا نضمن الخيره تدور السنين وغيبها ماهو بمكشوف محاريفها مابين ضحكه وتكشيره وانا عبدك اللي يحتويه الرجا والخوف يقصر ويستغفر ليا شاف تقصيره تحت كف غيثك ما رجا للبشر معروف لو تنوشه صدوف الزمان ومقاديره