يا غاية الاشواق في دربك شقيت
لك الغلا والولف ماني ناكره
مع كل يوم امر شارعكم لاجيت
في ساعة الست الصباح الباكره
رغم السنين اللي مضت بي مانسيت
احتاج لجل انساك فقد الذاكره
مانيب ناسي طول عمري ماحبيت
ذيك الملامح والعيون الساكره !
ممدوح بن سعود
دكتور لاتشرح عن ابوي بـ ايضاح
احسّ بأوجاعً يشاكي زهدها
في طاقم التمريض لاجيت ما أرتاح
احنّه امن الابره اللي في يدها
لو المرض ماهو قَدر كان ماطاح
ماقد سمعت بطيحتن قد عهدها
ودي اشيل الحزن واعطيه الافراح
من كلمةً باين في صوته جهدها
ممدوح بن سعود
لاصرت عن جمع الخلايق منعزل
من ضيقةً فالصدر ماتحتالها
اقر الكتاب الّي على محمد نزل
الّي حساناته بعشر امثالها
اخير من شعر الحداثه والغزل
ومن فايت الكلمه ومن نقّالها
ولا يخالف لاسمعت من الجزل
الّي بيوته مايشيّن فالها
راكان بن عايض
مال العلم الاخضر بعمره تنكّاسه
اللي شعاره بـ اسم ربي وتوحيده
وحنا على الحد اشاويسه وحراسه
فالشرق والشام واوساط الحديده
واللي رسم خطته خطتْه منحاسه
اخبار دولته تنقلها الجريده
في راس تنوره الله قاطعً راسه
من قبل ينوي على شب الوقيده
ممدوح بن سعود
ياموتري قرب حدود الدار
اشتقت لهلنا وشوف العود
الضيق ولع في ضميري نار
تشعم ليا من ذعذعن النود
همي يزود بكشحة الردار
ايزود والمخالفات اتزود
ماطار غير الطير والطيار
الا النبي اسليمان ابن داؤود
مدري لوين اتودي الاقدار
وانا مع الاقدار مابه زود
ممدوح بن سعود
