Mageeeeed

Cambridge, London UK🇬🇧

el talabat point system aktar haga useless fl donia

أكتوبر ٢٠١٧...فاكر كويس قد أيه كنت متلخبط...الناس شكلهم مختلف عن اللى انا متعود عليه. الجو كمان مختلف..هوا المطر مش هيقف؟ ألبس كام بنطلون علشان محسش إني بردان؟ الحمام مفيهوش شطافة ليه يا بشر؟ فاكر مكان عقارب الساعة وقتها...كانت بتشاور على رقم ١١ و فاكر كمان قد ايه الدنيا كانت ضلمة...معتقدش هينفع أنام و انا جعان قوي كده...نزلت في محاولة بائسة للبحث عن أي حاجه اسكت بيها أصوات "القرقرة" اللي بدأت تخرج عن السيطرة...أمشي ازاي في مدينة الأشباح دي؟ كل المحلات قافلة...مفيش حد غيري ماشي في الشارع. عربيات بتمشي بسرعة جمبي..معتقدش إن أحد احلامي كان إني استحمي بمياه كوتشات العربيات...لكني حققته على كل حال...الوقت ده بتحس قد أيه انت وحيد بائس و الأهم...جعان! و بتسأل نفسك أهم سؤال.."اللى عملته ده كان صح؟" . بعد أيام قليلة تستضيفني في بيتها السيدة Bea (أو كما سميتها الست نحلة)..ست أربعينية إنجليزية من اصول أفريقية٬ كانت ديماً مبتسمة و بتهزر علشان ترفع اي حرج. مسيحية الديانة و كانت مرتبطة بالكنيسة جداً. مش ناسي قد ايه صوتها كان حلو..كل يوم سبت بصحي عليه و هي بتتمرن مع فرقة الكورال على الغناء قبل صلاتهم يوم الحد في الكنيسة. في يوم طلبت مني اساعدها في تعليق زينة الكريسماس. فاكر جدا موسيقي الكريسماس اللى كانت شغالة في الخلفية وقتها..هتسمعها في كل بيت كل محل كل شارع في الوقت ده من السنة...السيدة نحلة كانت عارفة إني عربي مسلم و مع ذلك كانت ديماً تسألني لو انا محتاج حاجة..كانت صبورة. عرفتني إزاي اركب مواصلات٬ ساعدتني أشتري عجلة٬ علمتني أقص الجنينة٬ أقسم الزبالة...الخ. أشياء تبدو انها سهلة و بسيطة و بديهية لكن وقتها كانت أصعب من أن يستوعبها عقلي المسكين. مكنش ينفع أعدي الذكري السنوية دي غير لما اقولك "شكراً يا ست نحلة إنك كنتي متسامحة و مبتسمة و ديما موجودة علشان تجاوبي علي اسئلتي البدائية السخيفة!"...علمتني الست نحلة دروس كتير متعلمتهاش في المدرسة ولا من مشايخنا. . اشتريت باول مرتب ليا مكنة قهوة و تليفزيون كبير...وايه يصبرك في الغربة غير كوب قهوة ساخن و صوت ناس خارج من التليفزيون بيقولوا كلام مش مهتم قوي اعرف محتواه!..سنين قليلة تمر... الوضع بكل تأكيد أحسن و اكثر استقرارا...على الاقل عارف دلوقتي كيف تدار الأمور...عندي جنينة بعتني بيها من وقت للتاني..أي نعم ببوظها بس بقنع نفسي إني بعتني بيها...و عربيتي العجوز بتاخدني حيث أريد...الدنيا مش برد زي الأول غالباً لأني مشغل الدفايات طول الوقت...و الأهم..قل جداً صوت الـ "القرقرة" الخارج من أحشائي! . . البدايات قد تكون مؤلمة لكن خليك واثق إن النهايات أجمل و أصدق.. (الصورة من غرفتي في استضافة السيدة نحلة في خريف 2017)