مُعـاذ بن مَدشل

12:40 am أيا عويد البان يميّلك الهوى وتميل .. وأنتي عشان عيوني الثنتين ما ملتي ؟ وفقاً لعقرب ساعتي منتي قريبه حيل بسّ ف خيالي واقفة للحين ما غبتي يا مريم القرآن .. ولّا مريم الإنجيل يا طاهرة بالله وش باقي وما صرتي؟ دايم ومن بينك وبين الورْد حطّ وشيل ومترجّحة ميزان «أريجك»كان وقّفتي عذراً على التّشكيك بس يحتاج لك تحليل أنتي بشر لكن من الطّبيعة آخذتي ! وعلى خطى رجليك ياما أولوا تأويل بين الشّموخ وبين خطواته تمثّلتي وعلى نسايم صوتك الدّافي صديق اللّيل أحتاج تزميلتْه كثر لـْ حاجة لوقتي وسولفي عن القمِر والشمْس والإكليل حباك ربّي وجْه فيه كلّ .. ما قلتي انكانها في نجْد أو ذريّة اسماعيل يا نخبة النخبة والأوّل وين مارحتي .. شفايفِك هذي؟ خلقها الله للتقبيل حتّى لو إنّك من خلالها .. تكلّمتي داخل ضلوعي العوج لك مركى ولك قنديل ووسط موق العين باقية // ولا هنتي على كثِر ما طاحت دموعي من التّعليل على كثِر ما يهمّني لو بعدها " طحتي " دموعي إن طاحت مصير يشيلها المنديل بس المصيبة لو يكون .. الطّايحة " إنتي "

يا فاتنة ، تستحقين ، المقام الرفيع طاريك ، مع موكب العشاق قام وقعد لا تسأليني تقولين أوجد الفرق ! اضيع فالصورة إللي قبل و الصورة إللي بعد مكعبات الثلوج البيض عيّت تميع رغم أنها عضّت الجمرة و قالت تَعد وش عندة الرمش لا وقّف يوقف جميع؟ ادوخ لا من نزل ، و افيق لا من صعد

" ميّاده وأبو نوره " فتور القلب .. نشوتْه القصيد وسيد خلاني ومسباحٍ ضعف خيطه بيمناي وخلص دوره اجيب من الكلام العذب وازرع فيه بستاني وغيري لو يغني ليله الساجي طفى نوره مشاويري مع الافراح تستأذن من احزاني مثل طفلٍ يتيم وبسمته بالفقد مأجوره تعبت ارسم ملامح وجهك الي حسنه أحياني قبل لا يذبل الورد وتروح الروح مقهوره لقيت بوجهك بلادي قبل يشحب ويجفاني انا ذاك الكسير الي وقاره يجبر كسوره اشوفك في زوايا الذاكره ماشفت احد ثاني مثل نجمه تشع النور وسط الليل مذعوره انا المجني عليه وقافي بـ صداتك الجاني خيال ينصّ بالهوجاس لائحّته ودستوره حبيبي قلبك الحساس يوم انّه تناساني بقى عنده مشاعر ولا عاده ناسي شعوره؟ انبّش كل زلّه من جروحك يمكن القاني! ويباغتني شعور التيه والهفوات مغفوره وانا لو بشكي من الوصل تغريبي وحرماني لقيت الناس من فرقاك مرتاحه ومسروره تسرّع في مجيّك ياحبيبي ثم تحفاني مادام ان الشغف يزداد والاحوال مستوره وغريافك يوم انّك مقبل وخطوتْك تنصاني انا ماقد ذبحني كود هي وعينك الحوره تشوّف بالطيوف وشوف طيفك وين وداني يعنّيني غيابك وانت من " يعْنيني حضوره " بعد ثار الشعور وسَرّ جمهوري وسرّاني خذوني من زحام الناس ميّاده وأبو نوره

أهديكم هالدُره المُشتركه والي بيجيب على الاقل ٥ ابيات صح هديته عند دونت🏃🏻‍♂️ والي بيجيب بيتي بينهم له منيّ الي يطلبه🏃🏻‍♂️ الأسامي تحت ؛