Rohit Pawar

राष्ट्रवादी काँग्रेस पार्टी शरदचंद्र पवार पक्षाच्या कोल्हापूर जिल्हा शहर, ग्रामीण कार्यकर्ते-पदाधिकारी मेळाव्याला उपस्थित राहून संवाद साधला. यावेळी जिल्हाध्यक्ष व्ही. बी. पाटील, शहराध्यक्ष आर. के. पोवार, राष्ट्रीय सचिव बाजीराव खाडे, युवक जिल्हाध्यक्ष रोहित पाटील, रावसाहेब भिलवडे, अनिल घाडगे, मा.आ. राजीव आवळे, मुकुंदराव देसाई, पद्मजाताई तिवले, विक्रमसिंह जगदाळे, मकरंद जोंधळे आदी पदाधिकारी व कार्यकर्ते उपस्थित होते. यावेळी पदाधिकारी व कार्यकर्त्यांच्या भावना जाणून घेण्यासोबतच पक्षवाढीबाबत सांगोपांग चर्चा केली.

कोल्हापूरमध्ये पुरोगामी संघटनांच्या वतीने "छत्रपती शिवाजी महाराज सन्मान परिषदे"चं आयोजन करण्यात आलं होतं. या परिषदेला उपस्थित राहून संवाद साधला. ही केवळ एक परिषद नव्हती, तर महाराष्ट्राच्या अस्मितेचा जागर मांडणारा ठोस आणि जाज्वल्य प्रयत्न होता. यावेळी इतिहासकार इंद्रजीत सावंत, अभिनेते किरण माने, कॉ. प्रकाश आंबी, माजी आमदार राजीव आवळे, व्ही. बी.पाटील, स्मिताताई पानसरे,आरतीताई रेडेकर, गिरीश फोंडे यांच्यासह विविध क्षेत्रातील मान्यवर उपस्थित होते. छत्रपती शिवाजी महाराज हे महाराष्ट्राचा स्वाभिमान आहे. मात्र, दुर्दैवाने समाजातील काही प्रवृत्तींकडून जाणीवपूर्वक त्यांचा अवमान करण्याचे प्रकार वारंवार घडताना दिसत आहेत. त्यामुळं महाराष्ट्राच्या स्वाभिमानाचा सन्मान राखण्यासाठी आपण सर्वांनी एकजुटीने उभं राहणं, ही खरी गरज असल्याचं यावेळी नमूद केलं.

मुंबईत जे. जे. हॉस्पिटलमध्ये शिपाई, कक्षसेवक, ग्रंथालय सेवक, सुरक्षा रक्षक, प्रयोगशाळा परिचर आदी गट-ड च्या पदांची काही महिन्यांपासून भरती परीक्षा होऊनही अद्याप नियुक्तीपत्र मिळालेले नाहीत. ही संपूर्ण भरती प्रक्रिया रखडत सुरु आहे. संदर्भात उप-अधिष्ठाता डॉ. चव्हाण साहेब यांच्याशी फोनवरुन चर्चा झाली असून नियुक्तीचा हा विषय लवकरात लवकर मार्गी लावण्याचं आश्वासन त्यांनी दिलं. त्यामुळं उमेदवारांनी यासंदर्भात निश्चिंत रहावं, ही विनंती!

कोल्हापूरमध्ये ‘कोल्हापूर जिल्हा व शहर राष्ट्रीय तालीम संघा’च्या बैठकीला उपस्थित राहून पदाधिकाऱ्यांशी संवाद साधला, त्यांच्या अडचणी जाणून घेतल्या आणि विविध स्पर्धांच्या नियोजनाबाबतही चर्चा केली. यावेळी कोल्हापूर तालीम संघाचे सर्वेसर्वा स्व. बाळ दादा गायकवाड यांच्या पुतळ्याला पुष्पहार अर्पण करुन अभिवादन केलं. तसंच राष्ट्रीय पातळीवरील विविध कुस्तीगीरांचाही यावेळी सत्कार केला. राजर्षी शाहू महाराज यांनी ज्या आखाड्यात कुस्ती खेळली त्या आखाड्यालाही भेट दिली आणि त्यांच्या पदस्पर्शाने पावन झाल्यामुळं या आखाड्यालाही मनोमन नमन केलं.

‘हॉटेल कामत’ हा एका मराठी माणसाने अत्यंत मेहनतीने उभा केलेला प्रसिद्ध ब्रँड आहे. येलूरमध्ये (ता. वाळवा) याच ‘हॉटेल कामत उपहार’मध्ये सातारा, सांगली आणि कोल्हापूर भागातील अनेक फूड ब्लॉगर यांच्या Influencer / Blogger Summit चं आयोजन केलं होतं. इथं भेट देऊन त्यांच्याशी चर्चा केली आणि ब्लॉगच्या माध्यमातून त्यांचं काम अधिकाधिक लोकांपर्यंत पोहोचवावं, अशा शुभेच्छा त्यांना दिल्या. यावेळी ‘जाधव ब्रदर्स उद्योग समूहा’चे निलेश जाधव, नितीन जाधव आणि ‘कामत फूड’चे अक्षराई कामत यांच्यासह स्थानिक पदाधिकारी व कार्यकर्तेही उपस्थित होते.

गेल्या २५ वर्षांहून अधिक काळ अध्यात्मिक आणि प्रतिकात्मक संकल्पनांवर आधारीत चित्रकार अशी ओळख असलेले कराड येथील तानाजी अवघडे यांनी त्यांचं असंच एक आशयगर्भ चित्र भेट दिलं. विश्वात अस्तित्वात असलेल्या प्रत्येक गोष्टीमधील 'मनमोहक बंध' प्रतीकात्मक रूपात व्यक्त करणे हे त्यांच्या कलेचं उद्दिष्ट आहे. त्यांनी आपल्या चित्रातून शारीरिक चक्रे, ध्यान आणि सूक्ष्म विश्व व विशाल विश्व यांच्यातील संबंध यांसारख्या संकल्पनांचा शोध घेण्याचा प्रयत्न केला. त्यांच्या या कलेला माझ्या मनपासून शुभेच्छा!

सांगली जिल्ह्यातील शेतकऱ्यांनी शक्तीपीठ महामार्गाच्या विरोधात एल्गार पुकारला असून यासंदर्भात ‘पलूस-कडेगाव तालुका शक्तीपीठ महामार्ग संघर्ष समिती’ने आयोजित केलेल्या सभेला उपस्थित राहून संबोधित केलं आणि शेतकऱ्यांच्या या लढ्याला पाठींबा असल्याचा विश्वास दिला. यापूर्वीही शक्तीपीठ महामार्ग हा शेतकऱ्यांसाठी आहे की कंत्राटदारांसाठी की कंत्राटदारांच्या माध्यमातून KickBack घेण्यासाठी याबाबत विधानसभेत आवाज उठवला होता आणि यापुढंही शेतकऱ्यांच्या हितावर बुलडोझर फिरवणाऱ्या सरकारविरोधात शेतकऱ्यांसोबत खंबीरपणे उभं राहू, असं आश्वासन दिलं. यावेळी शक्तीपीठ विरोधी संघर्ष समितीचे ॲड. दीपक लाड, रविराज साबळे पाटील यांच्यासह शक्तीपीठ महामार्गाच्या विरोधातील सामाजिक कार्यकर्ते, स्थानिक पदाधिकारी आणि मोठ्या प्रमाणात शक्तीपीठ महामार्ग बाधित शेतकरी उपस्थित होते. #शक्तीपीठ_महामार्ग_विरोध #शेतकरी_एकजूट #शेतकरी_आंदोलन #FarmersProtest #SaveFarmers

शोषित आणि गरीब जनतेसाठी ब्रिटिशांविरोधात त्वेषाने लढा देणारे आणि इंग्रजांचा खजिना लुटून तो दुष्काळग्रस्तांना वाटणारे वीर फकीरा रानोजी साठे यांच्या वाटेगाव येथील समाधीला भेट देऊन अभिवादन केलं. साहित्यरत्न अण्णाभाऊ साठे यांनी त्यांच्या ‘फकीरा’ या कादंबरीच्या माध्यमातून महानायक वीर फकीरा रानोजी साठे यांचा विचार, लढा आणि संघर्ष जगासमोर आणण्याचा प्रयत्न केला. या महानायकाला इतिहासाने म्हणावा तसा न्याय दिला नसला तरी गरीब आणि सामान्य जनतेसाठी त्यांनी केलेला संघर्ष हा कधीही झाकोळला जाणार नाही. #वाटेगाव #सांगली

तमिळनाडूमध्ये INDIA आघाडीतील DMK तर प. बंगालमध्ये TMC ची सत्ता येईल, अशी अपेक्षा होती, पण या दोन्ही राज्यांना anti incumbency चा फटका बसल्याचं दिसतंय. त्यातच गृहमंत्री अमित शाह साहेब यांनी निवडणुकीसाठी प. बंगालमध्ये १५ दिवस ठाण मांडलं होतं आणि SIR च्या माध्यमातून ९० लाख मतदारांना वगळून एकप्रकारे विजयाचा मार्गही मोकळा केला होता. यामुळं महाराष्ट्रासह केंद्रातील सत्ताधाऱ्यांना नक्कीच आनंदाच्या उकळ्या फुटल्या असतील, पण त्यांनी हे विसरु नये की, जर आज देशात आणि महाराष्ट्रात निवडणूक झाली तर या पक्षाविरोधातही तेवढीच anti incumbency असल्याने हाच निकष लावून जनता त्यांनाही सत्तेबाहेर हाकलल्याशिवाय राहणार नाही…! पण निवडणुकीत विजय होताच पश्चिम बंगालमध्ये भाजपाने TMC च्या कार्यालयाची तोडफोड करुन यापुढील काळात आपण कसा कारभार करणार, याचाच एक नमुना दाखवून दिला…! अजून संपूर्ण निकालही जाहीर झाले नाही तोच भाजपाने केलेल्या या राड्यामुळं पश्चिम बंगालमधील जनतेला भविष्यात आणखी काय काय बघावं आणि भोगावं लागेल, हे देव जाणं. या तोडफोडीच्या कृत्याचा तीव्र निषेध..! #WestBengalLegislativeAssemblyelection2026

महाराष्ट्र राज्य राखीव पोलीस दलाच्या भरतीत एका खाजगी प्रकाशकाच्या प्रश्नसंचातील ८५ प्रश्न जसेच्या तसे घेणे म्हणजे प्रश्नपत्रिका तयार करणाऱ्या तज्ज्ञाचा कामचुकारपणा आहे की तोडपाणी? गोरगरीब कष्टकरी विद्यार्थी जिवाचं रान करून अहोरात्र मेहनत करतात आणि अशाप्रकारे त्यांच्या स्वप्नांशी, त्यांच्या भविष्याशी खेळणं योग्य आहे का? यापूर्वी तलाठी भरतीसह अनेक भरती परीक्षेतही अशाच प्रकारे खेळ झाला होता आणि आजही तसाच खेळ होत आहे, हे अत्यंत दुर्दैवी आहे. हे प्रकरण अत्यंत गंभीर असून सरकारने तत्काळ चौकशी करून दोषींवर कठोर कारवाई करावी, ही विनंती! @Dev_Fadnavis @mieknathshinde @SunetraA_Pawar

देशातील आजवरच्या २.१४ लाख मताधिक्याचा विक्रम मोडीत काढून २.१८ लाख एवढ्या विक्रमी मताधिक्याने बारामती विधानसभा मतदारसंघातून निवडून आल्याबद्दल सुनेत्राकाकींचं मनःपूर्वक अभिनंदन! हा विजय म्हणजे अपेक्षेप्रमाणे बारामतीकरांनी दाखवून दिलेलं अजितदादांवरील प्रेम आणि त्यांना कृतज्ञतेने वाहिलेली आदरांजली आहे..! या विराट विजयाबद्दल समस्त बारामतीकर मतदारांचेही मनापासून आभार! #AjitdadaPawar #Baramati

शाहिरीच्या माध्यमातून आपल्या पहाडी आवाजाने संयुक्त महाराष्ट्राच्या लढ्यात प्राण फुंकणारे, आमचे प्रेरणास्थान साहित्यरत्न लोकशाहीर अण्णाभाऊ साठे यांच्या वाटेगाव (जि. सांगली) येथील निवासस्थानी भेट दिली आणि अण्णाभाऊंच्या प्रतिमेला अभिवादन केलं. यावेळी त्यांच्या वारसदार सावित्रीमाई साठे यांच्यासह त्यांचं कुटुंबिय आणि ग्रामस्थांसोबत विविध विषयांवर चर्चा केली. #लोकशाहीर_अण्णाभाऊ_साठे #वाटेगाव #सांगली

कराडमध्ये दर्शिल पवार या पाचवीतील विद्यार्थ्याने अजितदादा पवार यांचं श्रद्धांजलीपर आकर्षक पेन्सिल स्केच रेखाटून ‘आमच्या मनात तुमचं स्थान अढळ राहील’, असाच संदेश दिला. कराडमध्ये असताना त्याच्या या स्केचवर स्वाक्षरी करुन त्याचं कौतुक केलं आणि भविष्यात शिकून मोठं होण्यासाठी त्याला शुभेच्छा दिल्या. यावेळी स्थानिक पदाधिकारी व कार्यकर्ते उपस्थित होते.

ज्यांचे विचार हे आमच्यासाठी कायम दीपस्तंभासारखे आहेत त्या स्व. यशवंतराव चव्हाण साहेब यांच्या कराड येथील प्रीती संगम या स्मृतीस्थळाला भेट देऊन स्व. चव्हाण साहेबांना अभिवादन केलं. यावेळी स्थानिक पदाधिकारी व कार्यकर्ते उपस्थित होते.

तपासाच्या नावाखाली अहिल्यानगर पोलीस दलातील काही अधिकाऱ्यांकडून सराफ व्यावसायिकांचा छळ करण्यात येत असल्याची तक्रार सराफ सुवर्णकार संरक्षण समितीचे प्रदेशाध्यक्ष उमेश बुऱ्हाडे यांनी केलीय. पंचनाम्याशिवाय सोने ताब्यात घेऊन ते लगेच वितळवून टाकणे, बेदम मारहाण करुन एन्काऊंटर करण्याची धमकी देणे, खोट्या गुन्ह्यात गोवण्याची धमकी देणे असले प्रकार पोलिसांकडूनच होत असतील तर ही अत्यंत गंभीर बाब आहे. अहिल्यानगरचे एसपी हे नुकतेच बदली होऊन हजर झाले असून यासंदर्भात त्यांच्याशी फोनवर सविस्तर आणि सकारात्मक चर्चा झाली असून याप्रकरणी न्याय मिळेल, अशी अपेक्षा आहे! @NagarPolic #LawAndOrder #AhilyanagarPolice

नसरापूर इथं अत्याचार करुन खून करण्यात आलेल्या पिडीत चिमुकलीच्या धायरी येथील घरी भेट देऊन दुःखाचा डोंगर कोसळलेल्या या कुटुंबाला धीर देण्याचा प्रयत्न केला. त्यांचं दुःख हे सांत्वनाच्या आपल्या चार शब्दांनी कमी होणारं नाही पण या कठीण काळात त्यांच्या दुःखात सोबत असल्याचा विश्वास देण्याचा हा एक प्रयत्न होता. एका फुलासारख्या चिमुरडीसोबत आरोपीने केलेलं कृत्य हे हैवानी आणि विकृतीचा कळस आहे. या कृत्याबद्दल त्याला फासावर लटकेपर्यंत या विषयाचा सर्वांनी प्रयत्न करणं ही आपल्या सर्वांची जबाबदारी आहे आणि त्यासाठी आपण शेवटपर्यंत पाठपुरावा करु असा शब्द या कुटुंबाला दिला. राज्यात शक्ती कायदा नसल्यामुळं माणसातील जनावरांना कायद्याचा कोणताही धाक राहिलेला नाही. त्यामुळं भविष्यात अशा घटना पुन्हा होऊ नयेत यासाठी सरकारने तातडीने शक्ती कायद्याची अंमलबजावणी केली पाहिजे, अन्यथा भविष्यातही अशा अनेक कळ्या उमलण्याआधीच कुस्करल्या जातील आणि त्याची जबाबदारी सरकारला घ्यावी लागेल. @Dev_Fadnavis @mieknathshinde @SunetraA_Pawar