راشـد

عليك السلام المرسل بنفحات النود ياراع العيون السود والمستوى الراقي ترا طيفك الموجود لو مانته بموجود تهادى طيوفك كل حزه على أحداقي أنا أسج عن طاريك واسلا عنه واعود مع كل طاري جابك أكشف عن أوراقي أشوف الحياه إللي يهذري بها مولود علشانها ماصخيت من دونك أشواقي وأشوف البشر حولي تزاحم تقول وفود وأشوفك لحال وموطنك داخل أعماقي ولو حاولت سود الليالي تحط حدود تجاوزتها و ارخصت لك عمري الباقي -

لين العود ليتك لينٍ .. مثل عودك لو تمرّه .. نسانيس الهبايب تذير عاد انا كل ماشفت القسى في ردودك وقف الحكي بـ لسان الملام و تحير كل ما ضعت يا ريم الفلا ، من يقودك غيري ان قلت لك عان البيوت وتخير انت لو تدري اني يوم اركز .. بـ سودك كنت اشوف السنين المقبله و اتطير شرعت كل هقوة في مفالي جعودك وانت سيّر عليها كان ودك تسير الهوى البارد اكثر .. ما يحره برودك يوم وقف على لحن القصيد القصير كلمةٍ من شفاك و قطعةٍ من خدودك تجبر الشمس تغرب و الصباح يتنير جيرني من عيونك مثل عادة جدودك يا سبب كل جرح و يا زبون المجير علم الغيمه اللي طامعه في رعودك وبلها وين ما ودك ، يسير .. يسير شاعرك كثر ما اعتاد الجفى من صدودك لو يحاول .. يغيره الزمن .. ماتغير -

أعرف القصيد الزين وأدري يقال لمن مايستاهله غير انت ياملحي و قوتي تدلل و اخذ ماتشتهي من الكلام وغن عن الاشقر المنثور والمبسم التوتي تفنن بعودك جعل يفداك عود الفن أبعزف ملامحك الجميله على صوتي قبل يربطون الشاعريه مع اهل الجن يشوفون زولٍ بين .. نجدي وبيروتي عيون المها خلت سليط اللسان يحن تغاربني الجمهور .. من رقة بيوتي أحب العطور الثابته والمطر والبن وأحب الشعور الي يتوارى ورى سكوتي قديم الشعور يناسبك ياصغير السن أنا مت فيك وقلت لك وش سبب موتي -

@althahebah12 صح بدنك

@_RH89_ ياسلام صح السانك 👏🏻👏🏻👏🏻

الصدق يكشف للقلوب الحقيقه و الكذب يستر .. لكن الكذب نقصان من يعترض دربك .. ترى ما يعيقه يعيقه اللي عارفٍ سِر الأحزان عهن القنوف العاليات الشهيقه على طهارتها ، توسخ ب الانسان وش عاد لو بار الرفيق بـ رفيقه و تخالفوا عن ودّهم حتى الأخوان كل ماتعمق فالحياه العميقه بتكشف انك طول هالوقت غلطان راحت سنه .. ماكنها الا دقيقه ياسرع عمري بس من دون عنوان مليت ادور ف الطرايق طريقه لاطارقٍ طرقه ، ولا مسرج حصان يا سيّديٰ و ظروفنا في حريقه كلٍّ شكى من غابر الوقت زعلان ليت الصدف مثلك تجينا رقيقه ان كان ما كنا ، ولا كان ما كان يا وردةٍ .. تغار منها الحديقه أول ضحاياها من الود ، بستان النحل ياخذ من شذاها رحيقه والكون ياخذ من تفاصيلها ألوان ( أنتي ، مثل حاجه ثمينه عتيقه أو صحبةٍ فيها معاريف و إحسان) كنك قصيده نخبويه .. عريقه تعاونو فيها حروبٍ و عتبان -

تخيّر أيات درب لـ خطوته تستريح أنا ما احب اجبر الغالي ولا احايله الوصل وجهه قبِل ، والهجر وجهه قبيح وهذا مانيب قايله وهذا مانيب قايله جرحتني بـ الصدود وبـ الكلام الشحيح في ساعةً كان صوتك فرحةً هايله وانا على كل حال ان كان تبغى الصحيح مانيب زعلان من جرحك ، لكن شايله -

غريب أكثر من اني عايش بغربه وفاقد خل وحيد أكثر من اني في زحام الناس وحداني اشوف ان المفارق مشكله .. وانت تشوفه حل مثل ما الحب اشوف انه غنى وتشوفه اغاني تمر احلى مواعيدي معك مثل العمر و تزل واخاف انك تجي في موعد وماعاد تلقاني صبااح الخيرر

ماني ب ناسي جميلك يا فريد الجمال مدام لك ف المحاني طلةٍ باهيه اشوف ف عيونك الثنتين ساحة قتال لاصارت اسمن معاذير الغلا واهيه اسهبت لك ف الغزل إلين غار الغزال وسهابتي لجل اشد النعّس الساهيه لو ما خذاك الغرور وما ملاك الدلال ما كان لهّيت فيك العالم اللاهيه جفاك كبريت وفوادي سريع إشتعال تعال .. خل الليالي فيك متباهيه طيوفك احلا ما يمكن ينوجد ف الخيال وعيونك الامره ف القلب و الناهيه وشلون اشوفك وأعامل لهفتي ب آعتدال والداهيه .. لو يشوفك راح في داهيه -

تنتهي كل النقاشات يالفكر العقيم بابتسامة عفو ماهي نفاق ولاريا والله ان القلب باقي على العهد القديم من وفاه يحسب كل المخاليق أوفيا قد خذيت من الليالي جروح فالصميم كثر ما اخذت من يديني حبايب واخويا آتغافل بعض الاحيان عن هرج الغشيم وأستحي لو أكثر الناس مافيها حيا -

تلاشا للوصل ضي وتبدد للفراق صروح وصارت دمعة الفراق على حرف الشعر لوحه يوجه دون وصلك ماتت الفكره ممات الروح ذبحت الشعور اللي تجاوز فكرته نوحه يجيبك طاري اللهفه وصير الهايم المجروح يكثر م كابر على ضيقي وهمش غالي جروحه قدرت اصامد الدنيا وذبحني طاري انك تروح دخيلك يوم قلبي ف يدينك لاتصير اروحه اروحه -

تذكرين ، اللي جمع باقي شتاتك وانتي اجتمعتي لين صرتي ديرته واحبابه تذكرين ، اللي رقيتي في سماه وصنتي كل كلمه قالها في خاطره وكتابه ذاب قلبه في غيابك والبلا .. ما لنتي يا دموعٍ ما تخلّت عن حنين اهدابه قال وينك يـ ام روحي واصدقاي وبنتي وين صوتٍ من غلاه اموت به واحيابه -

الحزن لا شيّد صروحه داخل القلب الحزين يشوف تجديد الجروح الداخليه .. تسليه لو حاول الضايق يقاوم بـ اللسان وبـ اليدين مايقدر يقاوم ضغوط الذكريات المبطيه وش يملك الأنسان غير انه يقول الله يعين ولا أكثر الأمال بين المقبله .. و المقفيه إللي يدور لـ السعاده في وجيه العابرين ماهوب مثل إللي تلاشت من يديه الأمنيه على كثر ماتنقل الاخبار دورات السنين لا زال ما يرفع مقام الحب غير التضحيه وين انت ياللي يا ماشاءالله كل ما تكبر تزين أفنيت زين الجيل هذا بـ العيون المفنيه عودك ليانه كنه ماخذ من نسيم الصبح لين و على استقام الجيد تستاهل رسايل تهنيه من بينك و بين القمر قطعت شكي بـ اليقين متشابهين بـ كل شي الفرق .. فرق التسميه سبحان من سواك من نطفة و من ماءٍ مهين المغريات إللي بدونك ما تسمى مغريه تبين معك الفرحه إللي كم لها عيّت تبين و تصير لامن غبت مثل الحاجه المستعصيه صدري من غيابك بقايا من بقايا الراحلين و من الجفاف العاطفي مثل الديار المسنيه طال انتظاري و إنتظاري ممتلي شوق و حنين مافيه قدره لـ التحمل لو ثلاثه فـ الميه والله ما يقتل فرحة العشاق .. غير الغايبين إليا طرو مع كل غيبة شمس و أنغام أغنيه الشوق لو يقلط له إللي جاهه يفك السجين حقّه ما يقبل فيه لا حذفت عقال ولا ديه -

سارت اقدام القصيد وخلدت للقاف جره بين تصوير الخيال وبين تدوين المحابر والقصيد ..المختلف من لهجته ولا مقره ودك إنـه مايقال الا على افواه المنـابر يستلذ به اللبيب ، وتستنير به المجره منهجٍ فيه الكلام العايدي .. مقطوع دابر عاد انا الي ذاخرلي من بنات الريح حره لانكشف عبر الزمن فرق المظاهر والمخابر قد تحلويت المراره لين ذابت كل مره ماشكيت ظروف وقتي لو صبرت ومت صابر ادري ان الموت مره وادري ان العز مره وادري ان المجد مصنوعٍ من عزوم الاكابر التجارب وجهتني لـ الصواب ولـ المسره يهتدي قلبي لاشفت الذنب في قلبً يكابر وانت يـ الراس الشجيع الي محد يقدر يغره كل حيٍ يعتبر بين السما والارض عابر من معه رايً وجيه ومن حفظ للقلب سره يتقي .. ظلم العبيد ويتقي سلم الجبابر والحياه الي تسوق لك الملذه والمضره ماتساوى منزلتها غير في سور .. المقابر @3oi88

ماقدرت احتوي قلبي عشان اقنعه شاب وأنا ادعي الله يصلحه ويهديه الحقيقة ، ملامحها بدون أقنعه ما أحدٍ جت له الدنيا على ما يبيه وحشة ضلوع صدري والشيم تمنعه وحشة أسوار بيتٍ هاجروا ساكنيه عقب ماكان مليان حياة ، و سعه مابقى الا انعكاس النور منه و اليه في زوايا الغرف لقطات متوزعه من بقايا ابتسامات ، وملامح وجيه اقترب ، كل ما يأشر علي بـ أصبعه راحلٍ كل يوم اشتاق له ، واحتريه ينبلج مثل نور الشمس من مطلعه يوم يبسط على وجه الثرى راحتيه ويتوارى عن انظار الجميع اجمعه مثل حلم اليتيم اللي فقد والديه اه يا حزني اللي ماقدرت اردعه واه يا قلبي اللي ماقدرت احتويه رحت والحلم نجمٍ في سماي اتبعه وجيت بيّاع ، عندي حلم من يشتريه مرني في فصل واحد فصول اربعه أنتهي من فصل ، واطيح فاللي يليه اللي ودعني ، المفروض ما اودعه اتحلوى الطعون اللي تجي من يديه أكثر انسان سامعني ماكنت اسمعه واكثر انسان جارحني تمسكت فيه ضاع من يستحق اقضي حياتي معه في رجا واحدٍ ضيعت عمري عليه _

معك كان العمر فرحة ، وأيام الهوى ، عنوان معك كانت حياتي غير ، وإنصاعت لي ظروفي معك عشت السعاده ، في زمن مامد لي أحضان هقيتك لي أمان ، ولا هقيتك مصدر .. لخوفي حسبتك في سما روحي ، سحاب يروي الظميان وأثـرك البرق ، لامنـه سقط من صعقه ، وقوفي هويتك غصب ، وأسكنتك غلا في محجر الأجفان ولقيتـك خنجر يطعن بظهري من ورى كتوفي تهاوت أكبر أحلامي ، ومات الصبر والنسيان وملامح خيبتي ، ضاعت مابين الوجه وحروفي تعلمت إن أصدق حب ، يخفي خلفه الحرمان وتعلمت إن أجمل وجه ، يخفي خلفه حتوفي وشكرت الجرح من قلبي ، على كشف الذي قد كان ولا عاد أرتجي ضماد ، لجروحي .. ولنزوفي عزاي إني وفيت .. وكنت في وجه الجفا ، إنسان وأحبك رغم هذا .. والوجع ، مستوطن بجوفي -

لا تدانى المسا و الجرح فالصدر خافي زل نصفه دموع و زل نصفه .. كتابه ما درى عن دوافع غربتي و اختلافي غير من تنهش الغربه بـ زهرة شبابه عقد و اكثر مضى من عمر هاك السنافي ما تفانى عشاني ، صار انا بالنيابه كم نزلنا بلاد و كم قطعنا فيافي كنت الاكثر طموح و كان الاكثر رحابه لا تضايقت روح و قلب و احساس دافي اقرب انسان الاقي موطني في اغترابه ماقفه لا ارتكيت و وقفته من خلافي اعمق احساس بين العاطفه و المهابه بالفرح ، بالحزن ، او بالوصل ، و التجافي نفس الابعاد ، حتى بالشعور انتشابه كل حاجه تقربنا ، خطاي اعترافي نظرة الشوق في عيونه رضاه و عتابه اصدق من القصايد و انسجام القوافي لا لمحت العذوبه في نواحي عذابه -

مرني ليل لو مر العرب ما تباته في دواجيه هم وفي مواريه حيره واهني من تعيّشه المليحة حياته لو تبّكيه شوق ولو تموّته غيّره تمنحه ما ينسّي خاطره ذاهباته من ثغرها رضاب ومن شعرها ضفيره يا مبعثر فوادٍ كنت اجمّع شتاته ليه حطمّت من حبك بليا جريره شاعرٍ من عيونك تنهمر مفرداته زِيده من الجمال اللي يخليه اسيره لك عليه القصيد اللي تحفظه رواته شعرٍ تخلدّه الازمان ويكون سيره انت لهفة حشاه وبسملة ذكرياته منك الاشياء لو انها قليله كثيره صار هم النحيل اللي فتنته جماله من تولاه خصرك لا انثنى من يجيره اه يا قلبي اللي ضرته تضحياته ما لجرحه ضماد ولا لكسره جبيره مرهفٍ ذنبه ان غيث السماء من سماته الزهر يلهمه والقد الاهيف يثيره جعل الامال فيني ما تسوي سواته اكحلٍ ما ترك لي قلبٍ يحب غيره شفي العسر وابن ادم طموحه غناته والعسيره على جذب اهتمامي جديره من يعلق على جيد المهاة امنياته ماله الا سراب الجازي المستذيره عاجز الراي لا يندم على شي فاته لا رضى ان الحظوظ اللي تقرر مصيره يا وريث الندى عز الرجل في ثباته سل سيفك قبل يصدى وهو في جفيره التفت بس للي يستحق التفاته الرجل ودك ان حتى عدوه نظيره اعرف شعيل لا جف الحكي في لهاته من يعرف الجمل يعرف رغاه وهديره فارس يعجز اطراف الاسنه مماته ترعبه فكرة انه يحتضر في سريره الظفر يطلب من اللي يبيه استماته والهمم تطلب من اللي شحذها ذخيره بأذن من جلت اسماه وتجلت صفاته وبأمره الشمس يسفر نورها كل ديره يستجيب لـ رجا عبده ويقبل دعاته ما الله اختار شي الا جعل فيه خيره لو جفاك السحاب وشح في غادياته البحر لو يجافيه المطر وش يضيره الغلا عند خلك لا تدور اثباته كل نفسٍ لها عن كل نفسٍ سريره -

لو نشوف المحال .. و مانشوف الذريعه مستحيل اتركك لـ الناس و أعلن نزوحي ماعرفت الجمال ، إلا جمال الطبيعه و من جمالك تجملتي علي بـ جروحي كنت أشوف الوحيد أيام عمره مريعه لين شفت الغلا متمكنٍ : في وضوحي احمد الله على الوحده و أجله و أطيعه يوم فكرت احبك .. صرت احبك بروحي انا واحد من اللي ينصرون الشريعه ليه ما تنصرين اللي بقى من طموحي كان ودك تجوبين الحياه الوسيعه اخذي روحي وخليني لحالي و روحي -

بالكاد أصارعك يا جندٍ من اللّٰه مدار نسايمك تاسر الراحه من احلافها ذكّرتني بالشعور الصب والإنبهار يا وجد نفسي سببك ويا تلهافها شف ويني ووين كان احساسي ووين صار بعض النسايم تخلّي الواحد يخافها على كثر ما قنعت النفس بالإنتصار على كثر ما اتضح بالواقع خلافها سراقة الروح , ملاذ الطيور الصغار لا هاجرت تمّن العشّه على اكتافها لا شارفت نفسي الولهه على الإنهيار فكت روابط ضفايرها على أطرافها واسترسلت بالسوالف لين طل النهار سوالفٍ فاقد الأسماع ما عافها مسافة القرب ما بيني ، وبين الزرار ما تعطي النفس قدره تلزم أعرافها مرت سنيني معك مثل الليال القصار ليت السنين الجميله ترجع خلافها كثر الحزن في وداعك ، واتخاذ القرار أصعب على نفسي من الناس واجحافها آخر طلب دام صار الذنب فالإختيار لحظاتي اللي تبقت ودك اتلافها لوحة خشب ماهي بمتعلقه بالجدار منسيةٍ فوق الأرفف تطلب إسعافها ما ودي انك عليها تمسحين الغبار لين الحياه الجديده تاخذ اهدافها 🙏🏻

تبجحي بي واسرفي بي ما عليك من الكلام أنا معك ما قل مخزوني .. ولا بان تعبي -