Maher Razouk  📚 ماهر رزوق

❤️❤️😍🤣

فضائح الكُتب المكتوبة بالذكاء الصناعي زادت في الخارج زي ما هي زايدة عندنا، وفي غياب أي خطوات من الحكومات إنها تقنِّن الوضع وتفرض على شركات التكنولوچيا إنها تضع إشارات واضحة لأي منتج معمول بالذكاء الصناعي، جمعيَّة المؤلِّفين البريطانيَّة بالتعاون مع نقابة المؤلِّفين الأمريكيَّة عملت مبادرة Human Authored «مؤلَّف بشري»، اللي من خلالها أعضاء الهيئتين يقدروا يضعوا على كُتبهم اللوجو ده للتأكيد للقارئ إنها مؤلَّفة بشريًّا بالكامل. حسب بيانهم الصحفي، قريبًا الباب هيتفتح لغير الأعضاء، والمبادرة هتشمل الأعمال المترجمة كمان. خطوة كويِّسة، وقد تكون مفيدة إن القارئ يثق إن الكتاب اللي دفع فيه فلوس كاتبه أو مترجمه إنسان مش آلة، لكن اللي البيان مش موضَّحه: إيه اللي يضمن إن حد ميعملش كتاب كامل بالذكاء الصناعي ويلزق عليه اللوجو وينشره على أساس إن مؤلِّفه بشري؟ هل فيه خطوات تمنع ده؟ عقوبات بأثر رجعي إذا ثبت بعد نشر الكتاب إنه مكتوب أو مترجم بالذكاء الصناعي؟ ده اللي لسَّا هيبان، لكن الواحد يرجو إن المبادرة على الأقل تحد من غُثاء الأعمال المكتوبة آليًّا اللي ناس كتير بتتخدع فيها، ومن غير ضمان إن أمرها يتكشف في أي وقت. صحيح إن الواحد أحيانًا بيقدر يميِّز المكتوب/المترجم بالذكاء الصناعي، لكن ده مش دائم ومش مضمون يقدر عليه أي حد، وإذا استمر الوضع على ما هو عليه هنلاقي خلال كام سنة العنصر الآلي هو السائد في التأليف والترجمة وما زال بيتباع على إنه بشري.