Hazem

قال رسول الله ﷺ: [أَيُّما امرأةٍ ماتت و زوجُها عنها راضٍ دَخَلَتِ الجنةَ] رواه ابن ماجة والترمذي

إزاي راجل غريب يكون في البيت لوحده مع ست وإزاي راجل متجوز يسمح لمراته بحاجة زي كدا عشان مسحول في شغله. في أية وإحنا مين وأنتوا مين.

السلام عليكم ورحمة الله وبركاته، الشكل اللي بقى عليه مجتمعنا النهاردة يخلينا نخاف على بناتنا أكتر من الأول بمليون مرة، والأحكام الشرعية في الأصل بتحمي المرأة قبل ما تحمي الرجل. النبي ﷺ قال: "لا يخلونَّ رجلٌ بامرأةٍ إلا ومعها ذو محرم، ولا تسافر المرأة إلا مع ذي محرم" فقام رجل فقال: يا رسول الله، إن امرأتي خرجت حاجة، وإني اكتتبت في غزوة كذا وكذا، فقال ﷺ:"انطلق فحج مع امرأتك." المرأة لها مكانة عظيمة في الإسلام، وعشان كده الأحكام دي في صالحها، مش ضدها. والنبي ﷺ هنا قدّم خروج الرجل مع زوجته للحج على خروجه للغزوة، ودي دلالة عظيمة جدًا على أهمية حفظ المرأة ورعايتها وصيانتها. فيرد عليك حد يقول: طيب والراجل المتغرب نعمل معاه إيه؟ الجواب إن الغربة في حد ذاتها مش مبرر لترك البيت سايب ولا لإسقاط المسؤولية. لو الراجل مضطر يغترب، فدا ميرفعش عنه التكليف، بل بالعكس يضاعف عليه مسؤولية المتابعة والرعاية والسؤال والاهتمام. كلكم راعٍ وكلكم مسؤول عن رعيته. فلو هو متغرب وسايب الدنيا عايمة، لا يدري بحال بيته، ولا بحال زوجته وأولاده، ولا بيحاول يوفر لهم الأمان والضبط والبدائل المناسبة، فدا إثم كبير عليه قبل أي شيء. أما لو كان متابعًا، قائمًا بمسؤوليته على قدر استطاعته، ويبحث عن الأحسن والأصلح لأهله، فده باب آخر يُنظر فيه بقدره، لكن من غير ما يتحول التقصير أو التفريط إلى ضرورة، ومن غير ما تبقى الغربة شماعة نعلّق عليها كل اختلال. الأصل إن الراجل هو اللي بيوفر الأمان، والمأكل، والمشرب، وسائر أسباب الاستقرار. ولما غابت الرجولة، وبقينا في مجتمع مهزوز بالشكل اللي إحنا شايفينه، ظهرت حالات بتضطر فيها المرأة تقوم ببعض المهام اللي الأصل إنها من مسؤولية الرجل. وأنا هنا مش بتحامل على المرأة في الجزء ده، أنا بتحامل على الرجل اللي مش بيؤدي دوره. وطبعًا ظروف الناس مش زي بعض، وفي ضرورات، لكن في برضه أمور مينفعش تتفتح فيها الأبواب إلا عند الضرورة القصوى. ومينفعش نلوّي كلام الشرع عشان يوافق الهوى أو الواقع المختل. أنا عارف إن فيه أمور صعبة، لكن مش هنموت لما نقول: بنحاول. أو لما نقول: الصح صح، والغلط غلط. وخلي بالك برضه إن في حالات فعلًا خاصة، زي وفاة الزوج، أو الطلاق، أو عدم وجود رجل أصلًا في العائلة، أو غيرها من الظروف اللي بتفرض نفسها على الناس. وأنا مش بتكلم على الحالات دي، ولا بنكرها. لكن الكلام على إننا ناخد الحالات الاستثنائية دي ونحوّلها لأصل عام، أو نطلع منها أحكام تمشي على الكل، مع إن الأصل غير كده. فالضرورة موجودة، والظروف موجودة، لكن تفضل ضرورة تُقدَّر بقدرها، مش قاعدة نعيد على أساسها تشكيل الصح والغلط ولها أحكام شرعية وفتاوى خاصة. والغريب إن بعض الستات يشتكوا من الرجالة المتحرشين والمغتصبين، وفي نفس الوقت يجادلوا في دخول رجل أجنبي البيت عليهم وهُم لوحدهم. طيب أي منطق ده؟ يعني إنتِ خايفة منه في الشارع، لكن تدخليه البيت وتقولي "أنا فاتحة الباب"؟ وأنا هنا لازم أوضح حاجة عشان صيادين ما بين السطور ميشتغلوش: الكلام ده مش تبرير لا لتحرش ولا لاغتصاب، ولا نقل للذنب من الجاني إلى الضحية. المتحرش والمغتصب مجرم وآثم، ويتحاسب على جريمته كاملة. لكن منع الخلوة والتحوط في التعامل مع الرجال الأجانب هو واحد من صور الوقاية الشرعية من أبواب الفتنة والاعتداء، زي ما إن قفل الباب وقاية من السرقة، من غير ما ده يبرر للسارق سرقته. وفي مليون حل غير كده, نكلم حد من الجيران، نكلم أصحابنا، حد من الإخوات أو أزواجهم ييجي يقف مع الصنايعي، أو أي حل من الحلول الكتير الموجودة. لكن مش الوضع الطبيعي إن المرأة تكون لوحدها وتقف مع رجل أجنبي في البيت، وبعدين نحاول نعمم ظروف خاصة ونحوّلها لأحكام عامة. كل شيء له تفصيل، ولو الإنسان فعلًا بيدور على الحلال والحرام، وسأل أهل العلم اللي يثق في دينهم وعلمهم، هيلاقي إجابات. لكن إطلاق الأحكام بناءً على حالات فردية عمره ما كان صح. ومشكلة تانية إن ناس كتير بقت بتتصيد الفتاوى، وتتبع الرخص، وتلف على الكلام اللي يوافق هواها، وتسيب الأصول الواضحة، بل أحيانًا تسيب ما عليه جماهير أهل العلم، وتروح تتمسك بقول شاذ أو ضعيف لمجرد إنه أريح للنفس. وده مش طلب للحق، ده طلب لمخرج يرضي الهوى. ومش فاهم ليه ناس واخدة الكلام على إنه هجوم على المرأة أو حكم عليها عشان لوحدها، مع إن الكلام من الأصل في صالح المرأة، ومن باب الخوف عليها، لا التحامل عليها. هدانا الله وإياكم.