Sabitlenmiş Tweet
انطباعي عن الموسم الاول من Succession
توقعت بداية تكون ثقيلة ومملة على كلام البعض، وقلت ممكن ما أندمج معه بسرعة لكن اللي صار كان العكس تمامًا، افتتاحية ممتازة للعمل، تعريف رائع بالشخصيات، واندماج سريع مع الحوارات، ومع أول ظهور لـ لوغان روي حسّيت بثقل حضوره، وأيقنت إني مقبل على عمل عظيم
لوغان روي مو مجرد أب أو رئيس شركة بل هو مركز القوة في كل شيء، حتى وهو مريض وفي أضعف حالاته، الكل يتحرك حوله، وأبناؤه يحاولون يستغلون سقوطه للسيطرة على الشركة خصوصًا كيندال، لكن الحقيقة إن وجوده لحاله كافي يربكهم، لأنه ما يفقد سيطرته بسهولة، ويرجع يثبت إنه هو الأساس واللاعب الحقيقي، والباقي مهما حاولوا يظلون في ظله، بالنسبة لي لوغان روي هو نجم الموسم الأول
كيندال روي (الابن العاق) الابن اللي يشوف نفسه الأجدر بقيادة الشركة، ويحمل قناعة إن وجود أبوه يعرقل تطورها لذلك يحاول بكل الطرق إبعاده والسيطرة، طول الموسم نشوفه يعيش صراع داخلي واضح، بين طموحه الكبير ومشاكله مع الإدمان والقلق والتوتر، وأحيانًا يفقد ثقته بنفسه، يحاول يشتغل من وراء ستائر ويسقط أبوه، لكن كل محاولاته تنتهي بالفشل، ومع نهاية الموسم يوصل لأضعف نقطة له بعد الحادثة، ويدخل في حالة انهيار نفسي واضحة، إلى أن يتدخل لوغان ويحتوي الموقف بطريقته، وهنا تظهر حقيقة العلاقة بينهم: مهما حاول كيندال يتمرد بالنهاية يرجع تحت ظل أبوه، بالنسبة لي هذه كانت من أقوى لحظات الموسم، لحظة خضوع كيندال لسلطة لوغان
شيفون روي (الابنة الوحيدة والمدللة) اختارت مسار السياسة بعيد عن العائلة، لكنها تظل قريبة من صراعاتهم أكثر مما تبين، تراقب من بعيد وكأنها تنتظر اللحظة المناسبة للدخول بطريقتها، فيها رغبة بالسيطرة رغم إنكارها، علاقتها مع توم مضطربة من طرفها فيها حب لكن أيضًا استغلال وعدم التزام، وتبقى شخصية ذكية وباردة ومثيرة للاهتمام
رومان روي الابن الأصغر (الابن الزاحف) وبهجة العائلة، وأحد أكثر أبناء لوغان غموضًا رغم خفته الظاهر، شخصية تحاول دائمًا تجذب الانتباه بطريقتها الخاصة سواء بسخريته أو استفزازه للآخرين، نشوفه كثير كأنه غير جدي أو غير مهتم، لكن في نفس الوقت فيه شيء داخله يخليه دائمًا قريب من قلب الأحداث أكثر مما يبان، صعب تتوقع موقفه هل هو مع إخوانه أو ضدهم أو حتى يسلك طريق مختلف تمامًا، أفعاله أحيانًا تكون عشوائية لكن تحمل في داخلها قراءة مختلفة للناس والمواقف، ومع ذلك يظل تحت ظل لوغان بشكل واضح سواء واعي أو لا، شخصيتي المفضلة من أبناء لوغان، ومتحمس أشوف وش يصير له في قادم المواسم
كونور روي الابن الأكبر (الابن المصلح) اللي يعتبر خارج صراع العائلة بشكل واضح، يحاول دايم يكون بعيد عن الخلافات داخل البيت وما يبي يدخل في أي مشاكل بين إخوانه أو مع لوغان، عايش في عالم موازي يفضل إنه يحافظ على مسافة ويشوف الأمور من برا أكثر من كونه طرف داخل الصراع، شخصيته هادئة ومسالمة مقارنة بالباقين، وما عنده نفس الطموح أو الحدة اللي عند إخوانه، لذلك تأثيره داخل العائلة أقل بكثير ويبان كأنه منفصل عن اللعبة اللي صايرة بينهم
توم و غريغ يعتبرون ملح المسلسل، ثنائي يضيفون جو خفيف ويضحك، توم شخص طيب وعلى نياته، متعلق بشيف ويحاول يرضيها حتى لو على حساب نفسه، ويبحث عن مكان له داخل العائلة بأي طريقة، أما غريغ فهو على نياته بعد ويتم استغلاله داخل العائلة، يدخل اللعبة بدون فهم كامل ويحاول يثبت نفسه تدريجيًا، ومعهم نشوف مزيج كوميدي بين السذاجة والطموح
شيء عاجبني في العمل إنه وضح لك إن كل الشخصيات رمادية، كلهم عندهم جوانب إيجابية وجوانب سلبية ويتصرفون حسب مصالحهم الشخصية، وهذا مو ضعف في الكتابة بل قوة، لأن كل شخصية لها مبرراتها اللي تخليك تفهمها حتى لو ما تتفق معها، وهذا يزيد من واقعية العمل ويخليه أقرب للواقع من ناحية الصراعات والدوافع
طريقة التصوير في سكسشن واقعية وقريبة، الكاميرا غالبًا متحركة وكأنها تتابع الشخصيات داخل المشهد بدل ما تكون ثابتة وهذا يعطي إحساس إنك داخل الأحداث، التركيز يكون على اللقطات القريبة وقت الحوارات لإظهار ردود الفعل أكثر من الكلام، مع إضاءة بسيطة وباردة تخدم جو التوتر داخل العمل
وركيزة العمل هي الحوارات، وهذا شيء صعب في عالم الفن، لأن المسلسل يعتمد عليها أكثر من الأحداث أو الأكشن، ومع ذلك يقدر يشدني بدون ما يحتاج أحداث ضخمة، وهذا يزيد من تقديري له لأنه متقن هذا الأسلوب، وبالنهاية العمل قائم على صراع الشخصيات والحوار أكثر من الأحداث، وقدّم قصة رمادية مليانة تناقضات تخليك تفهم الشخصيات حتى لو ما تتفق معها، وهذا اللي خلاه عمل مختلف وممتع
تقيم الموسم الاول 9/10
العربية
