ٰ

سرى الليل وانا أرقبك يا بارد الذعذاع و صدري حزين و سيرة النوم مرفوضه ماغير اجتلد و أقوم و أهدّي الأوضاع ورغم الهدو أحس في داخلي فوضه اشك الجبال احيان ماهيب فوق القاع تقول انها بين السراجيف معروضه صدوف الدهر تأخذ من الراحه استقطاع مثل بنك الإنماء يوم يستقطع قروضه أنا فاقد من ضلوع صدري ثلاث ارباع و نفسي من اللي شفت ماهي بـ محظوظه ياوجدي على عمر فقدته و حلم ٍ ضاع ومن ضاع حلمه مستحيل احدٍ يعوضه ياليت الزمن نقدر نسوّي له استرجاع لكن دبرة الله فوق الإنسان مفروضه سمحنا من اللي عايش ٍ جو الاستلكاع و عقليته عقلية الطفل فـ الروضه ما ندري طويل لسان ولا طويل ذراع اليا صار فـ أعراض البشر يعلن عروضه قواعد سلوم الناس من راي و استطلاع عسى من سعى في كسرها ينكسر حوضه اشوف الجفاء يشرى واشوف الجميل يباع وانا اخاف بكره لا يصير الردى موضه :)