Tariq Awan

پنجاب کا سیاسی شعور اور پاکستانی وفاق کی بقا کا سوال! پاکستان کا سب سے بڑا سیاسی اور نفسیاتی مسئلہ شاید یہ نہیں کہ یہاں مختلف قومیں آباد ہیں، بلکہ یہ ہے کہ پاکستان کی سب سے بڑی قوم، یعنی پنجابی قوم، اپنی قومی شناخت کے معاملے میں سب سے زیادہ غیر حساس ہو چکی ہے۔ اگر پاکستان کی مختلف اکائیوں اور قوموں کا تقابلی جائزہ لیا جائے تو واضح محسوس ہوتا ہے کہ سندھی، بلوچ، پشتون، کشمیری، سرائیکی، گلگتی یا بنگالی اپنی قومی شناخت، زبان، تاریخ اور جغرافیے کے ساتھ ایک جذباتی اور سیاسی تعلق رکھتے ہیں، جبکہ پنجابی قوم کا اجتماعی شعور اپنی شناخت کے معاملے میں نسبتاً کمزور بلکہ بعض اوقات معدوم دکھائی دیتا ہے۔ یہی خلا پاکستان کی وفاقی سیاست کو مسلسل بحران میں مبتلا رکھے ہوئے ہے۔ یہ مسئلہ محض ثقافتی نہیں بلکہ تاریخی، سیاسی اور نفسیاتی نوعیت کا ہے۔ پنجاب کی تاریخ کو دیکھا جائے تو یہاں مسلمان، سکھ اور ہندو پنجابی ایک طویل سیاسی کشمکش میں شریک رہے ییں۔ پنجاب میں قومیت کی بنیاد زبان یا جغرافیہ نہیں بن سکی، بلکہ مذہب سیاسی شناخت کی بنیاد بنتا گیا۔ مسلمان پنجابیوں نے اپنی سیاسی بقا اسلام کے تصور میں تلاش کی، سکھوں نے سکھ مذہبی شناخت میں، جبکہ ہندو پنجابیوں نے اپنی مذہبی و تہذیبی شناخت میں۔ نتیجتاً پنجابیت ایک مکمل سیاسی فلسفے کے طور پر کبھی ترقی نہ کر سکی۔ یہی وجہ تھی کہ برصغیر کی تقسیم کے وقت پنجابی مسلمان اپنی قومی شناخت سے زیادہ اسلامی شناخت کے ساتھ وابستہ تھے اور ایسا ہی ہندو پنجابی اور سکھ پنجابی اپنے مذہب کے ساتھ وابستہ تھے۔ پاکستان بننے کے بعد یہ رجحان مزید گہرا ہوتا گیا۔ پنجابی مسلمان اشرافیہ، خصوصاً بیوروکریسی، ملٹری، عدلیہ، اکیڈمیا اور ٹیکنوکریسی میں آگے بڑھی، مگر ان کے سیاسی شعور میں وفاقیت، قومی تنوع اور شناختی حساسیت کا عنصر کمزور رہا۔ اس کی کئی وجوہات تھیں؛ پنجاب میں نسبتاً بہتر تعلیمی مواقع، نوآبادیاتی دور کی انتظامی ترجیحات، اور ریاستی طاقت کے مراکز کا پنجاب کے قریب ہونا ان میں شامل تھے۔ تاہم مسئلہ اس وقت پیدا ہوا جب ریاستی طاقت پر غالب آنے والا یہی پنجابی ذہن پاکستان کو ایک وفاقی ریاست کے بجائے ایک مرکزیت پسند ریاست کے طور پر دیکھنے لگا۔ پنجابی اشرافیہ نے شاید یہ تصور قائم کر لیا کہ تمام قومیں آہستہ آہستہ اپنی الگ شناختیں ترک کر کے ایک یکساں “پاکستانی قوم” میں تبدیل ہو جائیں گی۔ مگر دنیا کی کوئی بھی کامیاب فیڈریشن اس اصول پر قائم نہیں ہوتی۔ امریکہ، کینیڈا، بھارت، سوئٹزرلینڈ یا بیلجیم میں ریاستی شہریت مشترک ہوتی ہے، لیکن قومیتی شناختیں اپنی جگہ برقرار رہتی ہیں۔ پاکستانی ہونا ایک آئینی اور ریاستی شناخت ہے، مگر سندھی، بلوچ، پشتون، پنجابی یا کشمیری ہونا ایک تاریخی اور قومی حقیقت ہے جسے مٹایا نہیں جا سکتا۔ پاکستان میں یہ تجربہ سب سے پہلے بنگال میں ناکام ہوا۔ مشرقی پاکستان کی اکثریت نے جب اپنی زبان، ثقافت اور سیاسی حقوق کے تحفظ کا مطالبہ کیا تو اسے ریاستی بیانیے کے خلاف سمجھا گیا۔ اردو کو واحد قومی زبان بنانے کی کوشش نے بحران کو مزید گہرا کیا، حالانکہ اردو پاکستان کی کسی بڑی اکائی کی مادری زبان نہیں تھی۔ نتیجہ یہ نکلا کہ بنگالی قومیت نے خود کو ریاست سے الگ محسوس کیا اور بالآخر پاکستان ٹوٹ گیا۔ لیکن پنجاب نے اردو کو پنجابی کی جگہ نافذ کردیا، کیونکہ پنجابی مسلمانوں کے لاشعور میں پنجابی قومیت کا تصور سرے سے بڑھوتری نہ پا سکا۔ ہاں، مالی مفادات تک پنجابی پنجابیت کا استعمال کرتے چلے آئے ہیں۔ بدقسمتی سے اس تاریخی سانحے سے بھی مکمل سبق نہیں سیکھا گیا۔ آج بھی سندھ میں شدید احساسِ محرومی موجود ہے، بلوچستان میں علیحدگی پسند تحریکیں موجود ہیں، خیبر پختونخوا میں شناخت اور وسائل کے سوالات موجود ہیں، جبکہ گلگت بلتستان اور کشمیر کی اپنی سیاسی پیچیدگیاں ہیں۔ ان تمام بحرانوں کی جڑ میں صرف وسائل کی تقسیم نہیں بلکہ شناخت کا سوال بھی شامل ہے۔ پنجابی ذہن کی سب سے بڑی پیچیدگی یہ ہے کہ وہ خود اپنی شناخت کے معاملے میں ابہام کا شکار ہے۔ پنجابی زبان، تاریخ، ثقافت اور جغرافیے کے ساتھ وہ جذباتی تعلق پیدا نہیں ہو سکا جو دوسری قومیتوں میں موجود ہے۔ یہی وجہ ہے کہ پنجابی سیاسی شعور اکثر اپنی ہی تاریخ سے کٹ جاتا ہے۔ پنجاب کے انقلابی کردار، صوفی روایت، ثقافتی ہیروز اور تاریخی جدوجہد اجتماعی قومی شعور کا حصہ نہیں بن پاتے، جبکہ مذہبی یا بیرونی تاریخی حوالہ جات زیادہ طاقتور ہو جاتے ہیں۔ نتیجتاً پنجابی اشرافیہ ایک ایسی ریاستی نفسیات پیدا کرتی ہے جو شناختی تنوع کو شک کی نگاہ سے دیکھتی ہے۔

بلوچستان اور وفاق پاکستان! بلوچستان کا مسئلہ صرف سکیورٹی کا مسئلہ نہیں بلکہ ایک گہرا سیاسی، سماجی اور نفسیاتی مسئلہ ہے۔ بلوچ عوام کے سامنے آج دو راستے موجود ہیں: ایک وفاقِ پاکستان کے ساتھ رہنے کا راستہ، اور دوسرا علیحدگی پسند تحریکوں کا راستہ۔ مگر اصل سوال یہ نہیں کہ ریاست اور علیحدگی پسندوں میں کون طاقتور ہے، بلکہ اصل سوال یہ ہے کہ بلوچ عوام کی اکثریت کس کے ساتھ کھڑی ہے۔ یہی وہ بنیادی نکتہ ہے جس پر پاکستانی ریاست کو سنجیدہ اور دیانتدارانہ بحث کرنی چاہیے۔ حقیقت یہ ہے کہ بلوچستان کے بہت سے بلوچ علاقوں میں عوام کی ایک بڑی تعداد ریاست سے مایوس ہو چکی ہے۔ جب سیاسی نمائندگی کمزور ہو، جب لوگوں کو یہ محسوس ہو کہ ان کی حکومتیں ان کی اپنی نہیں بلکہ طاقت کے مراکز کی پیداوار ہیں، جب وسائل، شناخت اور اختیار کے مسائل حل نہ ہوں، تو پھر خلا کو علیحدگی پسند بیانیہ پُر کرتا ہے۔ صرف طاقت کے استعمال سے اس مسئلے کو ختم نہیں کیا جا سکتا، کیونکہ تشدد اکثر مزید تشدد کو جنم دیتا ہے۔ اگر کسی ایک خاندان کا ایک فرد مارا جاتا ہے تو ممکن ہے اسی خاندان کے کئی دوسرے افراد مزاحمت یا عسکریت کی طرف چلے جائیں۔ یہی وجہ ہے کہ محض عسکری حل وقتی ہو سکتا ہے، مستقل نہیں۔ پاکستان کا وفاق ایک حقیقت ہے اور بلوچستان اس وفاق کی اکائی ہے۔ ریاست کسی صورت بلوچستان کو الگ نہیں ہونے دے گی، اور نہ ہی ایسا ہونا چاہیے۔ لیکن وفاق کو مضبوط کرنے کا راستہ طاقت کے یکطرفہ استعمال سے نہیں بلکہ سیاسی اعتماد سازی سے گزرتا ہے۔ جب تک بلوچ عوام کو یہ امید نہیں دی جائے گی کہ پاکستان ان کی شناخت، حقوق اور سیاسی آواز کا احترام کرتا ہے، تب تک فاصلے بڑھتے رہیں گے۔ ڈاکٹر مالک بلوچ کے دور میں ایک حد تک بلوچ عوام میں یہ احساس پیدا ہوا تھا کہ شاید وفاقِ پاکستان کے اندر رہتے ہوئے بھی سیاسی راستہ ممکن ہے۔ اٹھارویں ترمیم کے بعد بھی ایک امید پیدا ہوئی تھی کہ صوبوں کو زیادہ اختیار اور شناخت ملے گی۔ لیکن اگر بعد میں انتخابات ایسے ہوں جن میں حقیقی نمائندگی نہ ہو، یا ایسی حکومتیں بنائی جائیں جو عوامی مینڈیٹ کے بجائے مفادات کی بنیاد پر قائم ہوں، تو پھر عوام کا اعتماد ختم ہو جاتا ہے۔ یہی خلا علیحدگی پسند قوتوں کو مضبوط کرتا ہے۔ بلوچستان کے پشتون علاقوں کی صورتحال نسبتاً مختلف ہے، مگر بلوچ اکثریتی علاقوں میں محرومی، شناخت، وسائل، لاپتہ افراد، سیاسی بے اختیاری اور ریاستی تعلقات کے مسائل بہت زیادہ گہرے ہیں۔ ان مسائل کو صرف سکیورٹی کے زاویے سے دیکھنا ایک بڑی غلطی ہوگی۔ بلوچ عوام کو سیاسی امید دینا ہوگی۔ انہیں یہ احساس دینا ہوگا کہ وہ پاکستان میں برابر کے شہری ہیں، ان کی آواز سنی جاتی ہے، اور ان کے ووٹ کی حقیقی حیثیت ہے۔ اس کا آغاز آزاد، شفاف اور نمائندہ انتخابات سے ہوتا ہے۔ اگر ایک صوبے میں لوگوں کو حقیقی نمائندہ حکومتیں ہی نہ ملیں، اور اقتدار ایسے طبقات کے پاس رہے جو عوام کے بجائے اپنے مفادات کے لیے کام کریں، تو وہاں ریاستی بیانیہ کمزور ہوتا جائے گا۔ بلوچستان کا مسئلہ تبھی حل ہوگا جب بلوچ عوام خود یہ محسوس کریں کہ ان کا مستقبل پاکستان کے ساتھ زیادہ محفوظ، باعزت اور بااختیار ہے۔ بلوچ عسکریت پسندی کوئی وقتی مسئلہ نہیں۔ یہ کئی دہائیوں سے موجود ہے اور اگر سیاسی حل نہ نکالا گیا تو آنے والی دہائیوں تک بھی چل سکتی ہے، کیونکہ یہ صرف بندوق کا مسئلہ نہیں بلکہ ایک تاریخی احساسِ محرومی، شناختی بحران اور سیاسی نفسیات سے جڑا ہوا مسئلہ ہے۔ اسی لیے بلوچستان میں ایک حقیقی سیاسی انقلاب، نمائندہ سیاست، آئینی عملداری، اور عوامی اعتماد کی بحالی ناگزیر ہے۔ یہی وہ راستہ ہے جو پاکستان کے وفاق کو مضبوط بھی کر سکتا ہے اور بلوچستان کو پائیدار امن بھی دے سکتا ہے۔

ریپبلک پالیسی کی کتاب دی بیروکریٹک کو کا بیوروکریسی کے بارے یہ incident ضرور سنیں ، اس سے آپ کو بیوروکریسی کے سسٹم کو ہائی جیک کرنے کی صلاحیت کا اندازہ ضرور ہو گا۔ پاکستان میں بیوروکریسی کی اصل کردار کا جاننا ضروری ہے جو کہ silent player کے طور پر کام کرتی ہے۔