Чинбатын Ундрам@UndramChinbat
Соёл, спорт, аялал жуулчлал, залуучуудын салбарын хамт олон, эрхэм түншүүд ээ,
Миний бие Монгол Улсын Засгийн газрын гишүүн, Соёл, спорт, аялал жуулчлал, залуучуудын сайдын хариуцлагатай албан үүргийг хүлээн авснаас хойш өнөөдрийг хүртэл хугацаанд хичээл зүтгэл гарган ажиллалаа. Өнгөрсөн 10 сарын хугацаанд салбарын бодлогыг шинэчлэн боловсруулж, соёлын өвийг дэлхийд таниулж, түүхэндээ хамгийн олон жуулчдыг эх орондоо хүлээн авч, аялал жуулчлалын салбарт шинэ сэргэлтийг авчирч, спортын салбарын тасралтгүй хөгжлийн суурийг тавьж, залуучуудын идэвх оролцоог нэмэгдүүлэх чиглэлд олон ажлыг салбарын хамт олны хамт санаачлан хэрэгжүүлээд байна.
Засгийн газрын бүрэлдэхүүнд хамтран ажилласан салбарын сайд нар болон ССАЖЗЯ, харъяа газрууд, ЗГХЭГ-ын нийт хамт олондоо талархал илэрхийлж, цаашдын ажил үйлсэд нь амжилт хүсье.
Төрийн ажлын залгамж халааг хүндэтгэн албан үүргээ хүлээлгэн өгч буйтай холбогдуулан богино хугацаанд хийж хэрэгжүүлсэн ажлынхаа үр дүнг тоймлон хүргэж байгааг хүлээн авна уу.
Монгол Улс анх удаа Дэлхийн өвийн хорооны гишүүн улс боллоо. Дэлхийн соёлын болон байгалийн өвийг хамгаалах хамтын ажиллагаанд манай улсын оролцоо, хувь нэмэр улам бэхжив. Салбарын төсвийг анх удаа олон нийтээр хэлэлцүүлж, иргэдийн хяналттай, ил тод, хариуцлагатай засаглалын суурийг тавилаа. Мөн соёл, спортын салбарын хөрөнгө оруулалтыг хувийн хэвшилтэй нягт уялдуулснаар төсвийн хамаарлыг бууруулж, эдийн засгийн бие даасан цоо шинэ хөшүүргийг бий болголоо. “Нүүдэлчин” дэлхийн соёлын фестивалд түүхэн дээд хэмжээ буюу 260 мянган хүний эргэлт бий боллоо. “Байгалийн шинжлэх ухааны үндэсний музей”-г шинэчлэн байгуулж, Палеонтологийн олдворыг Франц Улсаас эх орондоо албан ёсоор авчирч, соёлын дипломат ажиллагааны хүрээнд зөөлөн хүчний бодлогыг амжилттай хэрэгжүүллээ. МУЗГ-аас хэрэгжүүлсэн төрийн үйлчилгээг хүн төвтэй болгох, бүтээмжийг нэмэгдүүлэх, процессын дахин инжинерчлэл хийх бодлогын хүрээнд Соёлын үйлчилгээний анхан шатны нэгж байгууллага болох “Соёлын төв”-ийн үйл ажиллагааны менежментийг шинэчлэх зорилгоор олон улсын хүний хөгжлийн төвийн жишигт нийцүүлэн хөгжүүлэх үзэл баримтлалыг шинэчлэн боловсрууллаа. Насжилт өндөртэй 35 соёлын байгууллагад 122 тэрбум төгрөгийн хөрөнгө оруулалт шийдвэрлэж, уран бүтээлчдээ дэмжсэн бүтээлч орон зайн шинэчлэлүүдийг хийж, хэрэгжүүллээ. Биеийн тамир, спортын салбарт олон улсын болон тив, дэлхийн аварга шалгаруулах тэмцээнийг 8 төрлөөр Монгол Улсад зохион байгуулах шийдвэр гарч, боксын насанд хүрэгчдийн Азийн аварга шалгаруулах тэмцээнийг эх орондоо амжилттай эхлүүллээ. Соёл, спортын салбарын хөрөнгө оруулалтыг хувийн хэвшил, бизнесийн үйл ажиллагаатай нягт уялдуулан холбосноор салбарын тогтвортой хөгжилд бодит түлхэц өгч, төсвөөс хараат бус, эдийн засгийн бие даасан эргэлт бүхий шинэ тогтолцоог бүрдүүллээ. Мөн иргэдийн идэвхтэй амьдралын хэв маягийг дэмжих эрх зүйн орчныг бэхжүүлснээр спортын арга хэмжээнд хамрагдагчдын тоо 1.6 саяд хүрч, 1.5 дахин өссөн байна. Аялал жуулчлалын салбарт түүхэн дээд амжилт тогтоож, 854 мянга гаруй жуулчин хүлээн авч, салбарын эдийн засгийн үзүүлэлтүүдэд мэдэгдэхүйц өсөлт гарлаа. Аялал жуулчлалын салбарын чанар, хүртээмжийг сайжруулах зорилгоор 2026 онд 250 тэрбум төгрөгийн хөнгөлөлттэй зээлийн хөтөлбөрийг эхлүүллээ. Мөн аялал жуулчлалын бүсүүдийг тогтоож, дунд хугацааны бодлого, төлөвлөлтийг баталснаар олон улсын үнэлгээгээр өндөр өсөлттэй орнуудын нэгт эрэмбэлэгдлээ. Залуучуудын хөгжил, оролцоог дэмжих чиглэлээр эрх зүйн орчны шинэчлэлийг эхлүүлж, холбогдох хуулийн төслийг боловсрууллаа. Эх орныхоо нэр хүндийг олон улсад өндөрт өргөсөн соёл, спортын уран бүтээлчид, тамирчдыг төрөөс алдаршуулан урамшууллаа.
Эдгээр ололт амжилт нь салбарын хамт олон, уран бүтээлчид, тамирчид, залуучууд, төр, хувийн хэвшлийн түншлэл, ард иргэд Та бүхний итгэл, дэмжлэгийн үр дүн юм. Итгэл хүлээлгэж, хамтран ажилласан бүх хүнд чин сэтгэлийн гүн талархал илэрхийлж, эрүүл энх, аз жаргал, амжилт бүтээлийн дээдийг хүсэн ерөөе.
Хүндэтгэсэн,
ЧИНБАТЫН УНДРАМ
