Sidra Humayun #educategirls

پریس ریلیز اقوامِ متحدہ میں پاکستان کی میزبانی میں تقریب، خواتین کو بااختیار بنانے کے لیے تعلیم اور مالی شمولیت اہم قرار اقوامِ متحدہ، 13 مارچ 2026: اقوامِ متحدہ میں خواتین کی حیثیت سے متعلق کمیشن کے 70ویں اجلاس کے موقع پر منعقدہ ایک سائیڈ ایونٹ میں مقررین نے اس بات پر زور دیا کہ تعلیم کو کبھی بھی تنازعات یا سیاسی اختلافات کی نذر نہیں ہونا چاہیے۔ انہوں نے کہا کہ ہر بچے کو، چاہے وہ کہیں بھی ہو، سیکھنے، خواب دیکھنے اور ایک ایسے مستقبل کی تعمیر کا حق حاصل ہے جو مواقع سے بھرپور ہو، نہ کہ محرومیوں سے محدود۔ مقررین نے اس بات پر اتفاق کیا کہ تعلیم اور معاشی مواقع کے ذریعے خواتین کو بااختیار بنانا محض سماجی ترقی کا ہدف نہیں بلکہ کسی بھی معاشرے کے مستقبل میں کی جانے والی مؤثر ترین سرمایہ کاریوں میں سے ایک ہے۔ ان کے مطابق وہ ممالک جو اپنی لڑکیوں کو تعلیم دیتے ہیں، وہاں معاشی ترقی زیادہ مضبوط، معاشرے زیادہ مستحکم اور ترقی زیادہ جامع ہوتی ہے۔ یہ خیالات اقوامِ متحدہ کے ہیڈکوارٹر میں منعقدہ ایک سائیڈ ایونٹ کے دوران اظہار کیے گئے جس کی میزبانی اقوامِ متحدہ میں پاکستان کے مستقل مشن نے مسلم امریکن لیڈرشپ الائنس (MALA) کے تعاون سے کی۔ “پاکستان میں خواتین کو بااختیار بنانا: انصاف اور مساوات کے فروغ میں تعلیم اور مائیکروفنانس کا کردار” کے عنوان سے منعقدہ اس تقریب میں ماہرینِ تعلیم، سفارت کاروں، سول سوسائٹی کے نمائندوں اور قانون سازوں نے شرکت کی۔ تقریب سے خطاب کرنے والوں میں اقوامِ متحدہ میں پاکستان کے مستقل مندوب سفیر عاصم افتخار احمد، سینیٹر بشریٰ انجم بٹ (چیئرپرسن سینیٹ قائمہ کمیٹی برائے وفاقی تعلیم و پیشہ ورانہ تربیت)، مس ماہا خان (چیئرپرسن MALA)، ڈاکٹر بیورلی بیریٹ (گلوبل ایڈوائزری اینڈ اسٹریٹجک پلاننگ، لومین ویریٹاس ایل ایل سی)، مس آفرین مشتاق (فلبرائٹ اسکالر اور ہارورڈ یونیورسٹی کی سابق طالبہ) اور وزارتِ انسانی حقوق پاکستان کے سیکریٹری عبد الخالق شیخ شامل تھے۔ تقریب کی نظامت پاکستان مشن میں قونصلر سائمہ سلیم نے کی۔ سینیٹر بشریٰ انجم بٹ، جو سی ایس ڈبلیو کی تقریبات میں شرکت کے لیے پاکستانی وفد کی سربراہ کے طور پر نیویارک میں موجود ہیں، نے کہا کہ تعلیم کے ذریعے خواتین کو بااختیار بنانا پاکستان کے لیے آئینی عہد بھی ہے اور قومی ترقی کی ترجیح بھی۔ انہوں نے بتایا کہ پاکستان کے آئین کا آرٹیکل 25-اے ہر بچے کے لیے مفت اور لازمی تعلیم کی ضمانت دیتا ہے، جو لڑکیوں کے لیے تعلیمی مواقع کو وسعت دینے کے عزم کی عکاسی کرتا ہے۔ انہوں نے کہا کہ گزشتہ دہائی کے دوران وفاقی اور صوبائی حکومتوں نے تعلیم تک رسائی بہتر بنانے کے لیے متعدد اقدامات کیے ہیں، جن میں پسماندہ علاقوں میں اسکولوں کا قیام، طالبات کے لیے وظائف میں اضافہ اور تعلیمی اداروں کے بنیادی ڈھانچے کی بہتری شامل ہے۔ انہوں نے بتایا کہ پنجاب ایجوکیشنل اینڈومنٹ فنڈ اور بینظیر انکم سپورٹ پروگرام کے تحت وسیلۂ تعلیم جیسے پروگرام مشروط مالی معاونت کے ذریعے خاندانوں کو اپنی بیٹیوں کو اسکول بھیجنے کی ترغیب دیتے ہیں۔ انہوں نے مزید کہا کہ نیشنل ووکیشنل اینڈ ٹیکنیکل ٹریننگ کمیشن جیسے ادارے تعلیم میں فنی، تکنیکی اور ڈیجیٹل مہارتوں کو شامل کر رہے ہیں تاکہ خواتین کی ملازمت کے مواقع اور ابھرتے ہوئے معاشی شعبوں میں ان کی شرکت بڑھائی جا سکے۔ سینیٹر بشریٰ نے اس بات پر زور دیا کہ پائیدار معاشی خودمختاری کے لیے تعلیم کے ساتھ مالی شمولیت بھی ضروری ہے۔ انہوں نے کہا کہ پاکستان میں مائیکروفنانس کا پھیلتا ہوا نظام اور کامیاب جوان پروگرام جیسے اقدامات خواتین کو قرضوں تک رسائی فراہم کر رہے ہیں جس سے وہ چھوٹے کاروبار قائم کر کے روزگار پیدا کر رہی ہیں اور اپنی برادریوں کی معاشی مدد کر رہی ہیں۔ انہوں نے اس بات کی بھی نشاندہی کی کہ شدت پسند گروہوں، خصوصاً تحریک طالبان پاکستان، نے بعض علاقوں میں اسکولوں اور تعلیمی ڈھانچے کو نشانہ بنایا ہے جس سے لڑکیوں کے تعلیمی مواقع متاثر ہوئے۔ تاہم انہوں نے کہا کہ ان چیلنجز کے باوجود پاکستان لڑکیوں کی تعلیم کے فروغ، تعلیم کو مستقبل کی ملازمتوں کے تقاضوں سے ہم آہنگ کرنے، خواتین کی مالی رسائی بڑھانے اور جامعات میں کاروباری سرگرمیوں کے فروغ کے ذریعے خواتین کو بااختیار بنانے کے لیے پُرعزم ہے۔ اپنے افتتاحی کلمات میں سفیر عاصم افتخار احمد نے کہا کہ عالمی سطح پر کئی شعبوں میں پیش رفت کے باوجود دنیا بھر میں لاکھوں لڑکیاں اب بھی تعلیم اور مواقع سے محروم ہیں۔ انہوں نے کہا کہ غربت، امتیاز، بے دخلی اور تنازعات کے باعث بہت سی لڑکیوں کو سیکھنے اور محفوظ مستقبل بنانے کے مواقع نہیں مل پاتے۔ انہوں نے کہا کہ تنازعات اور بیرونی قبضے کی صورتِ حال میں یہ مسائل مزید سنگین ہو جاتے ہیں کیونکہ اسکول بند ہو جاتے ہیں، معاشرے عدم استحکام کا شکار ہو جاتے ہیں اور خاص طور پر لڑکیوں کی تعلیم سب سے پہلے متاثر ہوتی ہے۔ سفیر عاصم افتخار احمد نے مقبوضہ فلسطینی علاقوں کی صورتحال کا حوالہ دیتے ہوئے کہا کہ وہاں جاری تنازعے نے بے شمار بچوں، خصوصاً لڑکیوں، کی تعلیم کو شدید متاثر کیا ہے اور انسانی بحران نے ان کے تعلیمی خوابوں کو دھندلا دیا ہے۔ انہوں نے اسی طرح بھارت کے غیر قانونی زیر قبضہ جموں و کشمیر کی صورتحال کا بھی ذکر کیا جہاں طویل پابندیوں، کرفیو اور عدم استحکام کے باعث خصوصاً لڑکیوں کی تعلیم شدید متاثر ہوئی ہے۔ انہوں نے کہا کہ بھارتی افواج کی بھاری موجودگی، مواصلاتی بندشیں، نقل و حرکت پر پابندیاں اور غیر یقینی صورتحال نے بارہا اسکولوں اور جامعات کے معمولات کو متاثر کیا ہے۔ انہوں نے کہا، “بہت سی نوجوان لڑکیوں کے لیے اسکول جانا — جو امید اور مواقع کی علامت ہونا چاہیے — اکثر عدم تحفظ، صنفی تشدد کے خدشات اور مستقبل کے بارے میں مسلسل غیر یقینی کیفیت کے سائے میں رہا ہے۔” انہوں نے کہا کہ پاکستان اس بات کو تسلیم کرتا ہے کہ تعلیم کو معاشی مواقع سے جوڑنا ضروری ہے تاکہ تعلیم حقیقی معنوں میں بااختیار بنانے کا ذریعہ بن سکے۔ ان کے مطابق فنی و پیشہ ورانہ تربیت، ڈیجیٹل مہارتوں کے پروگرام اور جامعات میں قائم اختراعی و انکیوبیشن مراکز نوجوان خواتین کو ٹیکنالوجی سے چلنے والی عالمی معیشت میں مؤثر کردار ادا کرنے کے قابل بنا رہے ہیں۔ انہوں نے مزید کہا کہ مالی شمولیت خواتین کو بااختیار بنانے کا ایک اہم ستون ہے اور پاکستان نے مائیکروفنانس اور کاروباری معاونت کے ایسے پروگراموں کا متحرک نظام تشکیل دیا ہے جو خواتین کے لیے معاشی مواقع کو وسعت دے رہا ہے۔ استقبالیہ کلمات میں ماہا خان، چیئرپرسن MALA، نے لڑکیوں کی تعلیم کے نسلی اور معاشرتی اثرات کو اجاگر کرتے ہوئے کہا کہ جب ایک لڑکی تعلیم حاصل کرتی ہے تو اس کے اثرات آنے والی نسلوں تک پہنچتے ہیں۔ انہوں نے کہا کہ تعلیم صرف فرد نہیں بلکہ خاندانوں اور معاشروں میں بھی مثبت تبدیلی لاتی ہے۔ انہوں نے اس بات پر بھی زور دیا کہ تعلیم کے فروغ کے لیے حکومتوں، اداروں اور کمیونٹیز کے درمیان تعاون ضروری ہے، اور تعلیم اس وقت حقیقی تبدیلی لاتی ہے جب وہ معاشی خودمختاری کا ذریعہ بھی بنے۔ انہوں نے کہا کہ انہیں اس تنظیم کی نمائندگی پر فخر ہے جو امریکہ میں مسلمانوں کے لیے ایک قابلِ اعتماد پلیٹ فارم فراہم کرتی ہے اور افراد کو اپنی شناخت اور ورثے پر فخر کرتے ہوئے سماجی اور عوامی زندگی میں بھرپور شرکت کی ترغیب دیتی ہے۔ ڈاکٹر بیورلی بیریٹ نے خواتین کو بااختیار بنانے کے لیے ایک جامع حکمتِ عملی کی ضرورت پر زور دیا جس میں تعلیم، طرزِ حکمرانی، ٹیکنالوجی اور ثقافتی تبدیلی شامل ہوں۔ انہوں نے خواتین کی تعلیم اور معاشی خودمختاری کے فروغ میں ورلڈ بینک، یو ایس ایڈ اور برطانیہ کے محکمۂ بین الاقوامی ترقی جیسے اداروں کے کردار کو سراہا۔ انہوں نے کہا کہ پاکستان میں تعلیم کے اندراج اور خواتین کی افرادی قوت میں شمولیت میں بہتری آئی ہے، تاہم اب بھی نمایاں خلا موجود ہیں جنہیں پُر کرنے کے لیے مسلسل سیاسی عزم ضروری ہے۔ آفرین مشتاق نے اورنگی ٹاؤن کراچی سے انسٹیٹیوٹ آف بزنس ایڈمنسٹریشن اور ہارورڈ بزنس اسکول تک اپنے تعلیمی سفر کی کہانی بیان کرتے ہوئے بتایا کہ تعلیم کس طرح زندگی بدل سکتی ہے۔ انہوں نے کہا کہ خواتین کے لیے اپنے حقوق اور انصاف کا دعویٰ کرنے سے پہلے یہ یقین ضروری ہے کہ وہ ان کی مستحق ہیں — اور یہ اعتماد اکثر کلاس روم سے شروع ہوتا ہے۔ انہوں نے کہا کہ تعلیم غربت سے نکل کر خوشحالی کی طرف بڑھنے کا راستہ ہے، خصوصاً پسماندہ علاقوں کی لڑکیوں کے لیے۔ انہوں نے تھرپارکر میں اپنے تجربات کا حوالہ دیتے ہوئے کہا کہ ایک لڑکی کی تعلیم پورے خاندان اور معاشرے میں مثبت تبدیلی کی لہر پیدا کر سکتی ہے۔ اپنے اختتامی کلمات میں وزارتِ انسانی حقوق پاکستان کے سیکریٹری عبد الخالق شیخ نے کہا کہ تعلیم خواتین کو بااختیار بنانے کا سب سے مؤثر ذریعہ ہے۔ انہوں نے اس بات پر زور دیا کہ تعلیم کو معاشی مواقع سے جوڑنا ضروری ہے تاکہ خواتین معاشرے میں بھرپور کردار ادا کر سکیں۔ انہوں نے مائیکروفنانس اور مالی شمولیت کو بھی خاندانوں اور معاشروں کی خوشحالی کے لیے اہم قرار دیا۔ تقریب کی نظامت کرنے والی صائمہ سلیم نے گفتگو کا آغاز کرتے ہوئے کہا کہ تعلیم اور مالی شمولیت خواتین کی غیر معمولی صلاحیتوں کو بروئے کار لانے کا ذریعہ بن سکتی ہیں۔ انہوں نے کہا کہ معاشی مواقع خواتین کو خود مختاری، فیصلہ سازی کی طاقت اور اپنے مستقبل کو خود تشکیل دینے کی صلاحیت فراہم کرتے ہیں۔ تقریب کے اختتام پر سوال و جواب کا سیشن ہوا جس میں طلبہ نے خواتین کے بااختیار بنانے سے متعلق چیلنجز، مواقع اور مستقبل کے امکانات پر پینل سے سوالات کیے۔

AI innovation is outpacing our collective ability to fully understand it – let alone govern it. If we want AI to serve humanity, policy cannot be built on guesswork, hype or disinformation. We need facts we can trust and share across countries and sectors.