المخرج . خالد عبدالرحمن

الاستثمار في الفنكوش … كيف تصير ملياردير قبل ما يطلع لك شنب.؟ في هالوقت العجيب البسيط النجاح ما عاد يبي له سهر ليالي .. صار يبي له بس تشغيل إضاءات البودكاست ، والثراء اللي يحتاج كرف سنين صار يخلص في دقيقة بتيك توك او سناب . صرنا نشوف بزران أعمارهم بين الطفولة والرجولة يطلعون لنا بزيادة واستهبال جدي عشان يعلنون للعالم إنهم خبراء استراتيجيين في زمن اللخبطة المنظمة. يتكلمون هالخبراء عن بداياتهم القديمة وهم توهم ما طلعوا من كراسي الدراسة ، يقول لك بتواضع شايف نفسه : كيف إنه بدأ من الصفر ، والصفر هنا مو فقر … لا .. هو بس رقم خيالي في حساب أبوه ، وهي عصامية مدعومة ، الواحد منهم يكافح عشان يتجاوز أزمة مالية لأن الآيس لاتيه تأخر عليه، ويقلبها في مقطعه الجاي ملحمة صمود ضد هوامير السوق. للأسف الشديد صرنا نشوف تلميع عيني عينك لواحد صغير في السن يتكلم بثقة مهزوزة عن الثراء السريع وكيف تجيب الملايين في غمضة عين صاحية ، والحقيقة المُرّة إن كل اللي يقوله هالخبير العبقري الجاهل مجرد أوهام حقيقية وتسويق مليان فضاوة. هذا المستشار اللي يوزع أحلام الثراء لا عنده شركة ولا حتى مؤسسة صغيرة تبيع برسيم ، والأدهى إنه ما يملك حتى رأس مال حقيقي غير لسانه اللي يلوط الآذان ، يبيعون للشباب قصور في الهواء فوق أرض صلبة، واقول للي يطبلون لهم: احترموا على الأقل عقول الناس قبل ما تطلبون منهم يحترمون خرابيطكم. تسمع كلمات مثل "استثمر في اللاشيء أو اترك وظيفتك المملة عشان تعيش حرية العبودية وراء الشاشات …. والنتيجة .؟ جيوش من الشباب يطيحون في فخاخ النجاة وينتهي فيهم المطاف بإفلاس كاش بسبب نصيحة من خبير ما قد جرب طعم الخسارة الصدقية في سوق العمل . حنا نعيش في عصر الجهل المتعلم ، صار فيه المستشار هو اللي ما عنده خبرة إلا هبال عاقل. إذا شفت طفل يلبس ساعة تقليد أصلية ويكلمك عن عصاميته وهو ما يعرف يسدد فاتورة جواله ، اعرف إنك قدام معجزة عادية من معجزات الفنكوش الاستثماري. ودايم تذكر انه في سوق السوشيال ميديا الربح خسارة مؤجلة، و الخبير هو مجرد شخص عرف يبيع لك الوهم الحقيقي بثوب وسيم وهو ما يدري وين الله حاطه.