عبدالعزيز.

هذا النص قد يبدو كئيبًا لكنني أراه واقعيًا أوحى لي به أمران راوية لدوستويفسكي ، وأنه لم يبق في العمر أكثر مما مضى والعلم عند الله علام الغيوب.. ( نهايات القصص) في الظلام ..ناجيت ربي وشكيت.. وبحرقة بكيت .. وقبل انام .. بصرخة بلا صوت ناديت : ياللي بقالي من ايام.. ما أبي منّك فرح.. ولا شفا لقلب انجرح.. ماأبي منّك وفا.. أنا المفضّل للجفا.. ولا أبي .. منّك فُرَص.. حانت نهايات القصص.. ولا أبي منّك أمَلْ.. ولا ارتياح من الكلَلْ.. مرّي بسلام مرّي بهدوء.. مرّي بخجَلْ.. وخذي بيدي يم الأجل..بلا وجَلْ.. وعلى مهل .. أو بالعجل.. ضاق بي هالليل.. ومل مني الويل.. وما بقى بي حيل.. ياللي بقى لي من ايام.. مرّي بسلام.. خانني هذا الجسد.. وماعدت ذاك الشخص ابد.. اللي اذا ما طاح قام! ————————— ياللي بقالي من ايام سامحيهم.. العيب فيني ماهو فيهم.. عودتهم على العطا..قبل السؤال.. عودتهم صفح الخطا..في كل حال.. ما كان لي وجهين.. كل ماهو فيني يبين.. ان كنت احب .. اقول احب وعند الغضب.. ناري تشب.. واضح ..ومافي داخلي .. تعجز تخبيه الملامح.. ما كنت اشيل .. على احد.. وغير الجميل..ماعندي رد.. وغيثي يسيل.. للي جحد.. ابتديت بطيب.. وبنتهي بالطيب.. ما اشوف هذا عيب.. ياللي بقى لي من ايام.. مرّي بسلام.. خانني هذا الجسد.. وماعدت ذاك الشخص ابد.. اللي اذا ما طاح قام! ————————- عمري سرق حلوه مُرّهْ.. عشته بخيره وبشرّهْ .. سيّان راضي أو مُكْرَهْ.. بمضي وانا العاطر ذِكْرَهْ.. بالزهو ترويني الأيام .. ما سرني فتح ابوابي .. ولاسرني مر عتابي.. وداع يا أغلى احبابي.. صفحات باقي في كتابي.. وش عاد لو كانت آلام.. أسرد تفاصيل اوجاعي .. وكيف ابتلتني أطباعي .. وان قيل لي ماله داعي .. يأبى العظيم فإبداعي.. إلا تخّلدني الأقلام.. ابتديت بطيب.. وبنتهي بالطيب.. وما اشوف هذا عيب.. ياللي بقى لي من ايام.. مرّي بسلام.. خانني هذا الجسد.. وماعدت ذاك الشخص ابد.. اللي اذا ما طاح قام! ///////////////