Anton Sveinn McKee@anton_mckee
Gervigreindin og vélmennin eru að koma og ég held að Ísland sé í stakk búið til að nýta sér þá byltingu betur en flest önnur ríki. Ég hef lengi verið þeirrar skoðunar að íslenskt hugvit, kjarkur og dugnaður sem hafa þróast í gegnum aldirnar á klettinum okkar í ballarhafi sé það sem sker okkur úr.
Þessi umbylting mun leysa úr læðingi eitt mesta hagvaxtarskeið í sögu landsins ef rétt er haldið á spilunum. Lykilinn í allri velsæld á Íslandi er hagvöxtur á mann, sem hefur því miður setið eftir á undanförnum árum. (Engar áhyggjur, ég veit að hluti af því er stytting vinnuviku sem leiddi til þess að við þurftum að reiða okkur á erlent vinnuafl til að fylla upp í skarðið)
Nýverið birti ríkisstjórnin atvinnustefnu til 10 ára og 2 ára aðgerðaráætlun. Vissulega var snert á gervigreind í opinberri þjónustu (efast samt um að hagræðingar muni fylgja þessu af núverandi ríkisstjórn) en ekki nærri því af þeim slagkrafti sem maður vonaðist til að sjá, og hefur maður áhyggjur af því að við verðum ekki í fararbroddi þegar kemur að innleiðingu á þessum lausnum.
Menn eins og @dadikr hafa bent á að við séum að sofa á verðinum, ásamt hópi sérfræðinga hjá HR sem hafa gagnrýnt áform um uppbyggingu íslensks mállíkans í samstarfi við einkafyrirtæki í stað þess að byggja upp lausn með opnu leyfi. Að auki var ekkert snert á breytingum sem þessi bylting mun hafa á vinnumarkaðinn og innflytjendastefnu.
Gervigreindarvélmenni, eins og þau frá Figure (einnig mjög þróuð eintök sem eru að birtast úr Asíu), munu vera leikbreytir þegar kemur að því að mæta eftirspurn eftir vinnuafli hér á Íslandi og munu að öllum líkindum breyta dýnamíkinni á vinnumarkaði og viðskiptamódelum. Þar að auki mun að einhverju leyti fylgja minna álag á samfélagslega innviði sem ella kæmi með þessum breytingum, án þess að fórna hagvexti og lífsgæðum.
Svo er það gervigreindin sjálf sem mun gera einstaklingum kleift að afkasta á við marga. Allt í einu mun smæð Íslands ekki vera jafn hamlandi þegar kemur að uppbyggingu og vexti fyrirtækja.
Þess vegna er svo mikilvægt að þessi málaflokkur sé efstur á baugi. Það er ástæða fyrir því að öll stærstu gervigreindarfyrirtækin eru í USA og Asíu en Evrópa er eftirá (USA innovates, China imitates, EU regulates), og því mikilvægt að við förum ekki sömu leið og ESB þegar kemur að íþyngjandi regluverki og kvöðum á þjálfun og þróun gervigreindar. Við megum ekki missa af lestinni og sitja á bremsunni þegar kemur að þessum málaflokki.
Því miður hef ég ekki mikið traust til núverandi ríkisstjórnar sem virðist bara vera í nýsköpun þegar kemur að skattpíningu borgarans og sýndi ekki þá framtíðarsýn sem þörf er á í atvinnustefnunni. Ekki heldur til Katrínar Jakobsdóttur sem leiðir gervigreindarmiðstöðina New Nordics AI fyrir okkar hönd og virðist stefna að því að vinna eftir leiðbeiningum ESB. Við þurfum að gera frumkvöðlum hér heima kleift að nýta þessa tækni og ekki standa í vegi þeirra.
Bjartir tímar framundan.
