مها

مر علي مقطع بالتيك توك، لبنت كانت تقول: تخيلي تجين يوم القيامة، وتنصدمين إن أمج وخواتج، صديقاتج، أقاربج، كل الناس اللي تحبينهم وتقعدين معاهم بالساعات وتسولفون، الناس اللي تطلعين معاهم وتشربين معاهم قهوة، واللي كنتِ لاهية معاهم. تخيلي تجين يوم القيامة، وكل واحد فيهم ميزانه ثقيل، لأنه لما يدخل غرفته ويختلي بنفسه، يتعبد الله، تخيلي إنهم كلهم امنوا نفسهم، إلا أنتِ ما أمنتِ نفسهم، وقتها راح يصير فيج: ليش ما علموني؟ ليش محد قال لي؟ أنا ما كنت أدري! هل تظنين إن الناس ما تقرأ القرآن إلا كل جمعة وتقرأ الكهف، وما تختمه إلا كل رمضان؟ بتكونين والله مسكينة، وشعورج بيكون، مثل اللي كانت مع رفيجاتها وتلعب وتستانس معاهم وتطلع، ولما يجي وقت الامتحان، كلهم دارسين ويحلون الامتحان، إلا هي! مو دارسه ومو قادره تحل الامتحان. فإذا ما كان عندج هدف، ما عندج هدف تشتغلين عليه سواء من دراسة أو سعي في الوظيفة أو سعي في الدراسة أو غير متزوجة ومو لاهيه بأمور منزل من زوج وأطفال أو غيره. وإذا ما كنتِ ترغبين بأي هدف، يا أختي فيه هدف أساسي وُوجدتِ عشانه! اشتغلي عليه. لا تقولين أنا غير محجبة، أنا متبرجة، أنا أسمع الأغاني، أنا أحش واجد، أنا أكذب، أنا عندي ذنوب وسوالف واجد، لا تحبطين نفسهم، زاحمي حسناتج بالسيئات! زاحمي كثر ما تقدرين، حتى لو كنتِ على معصية، لا تيأسين، منو فينا ما يعصي الله؟ ليش فيه أحد أصلًا معصوم؟ زاحمي، والله الطاعات راح تكرهج أصلًا بالمعازف والمعاصي. ((لجودة حياة أفضل: يُفضل تحطين لنفسج هدف دنيوي تشتغلين عليه، وهدف آخروي، بالنهاية احنا بنعيش الحياتين، بنعيش بالدنيا وعندنا أهدافنا وطموحاتنا وأمانينا، وبنعيش بالآخرة وأيضًا عندنا أهدافنا وطموحاتنا وأمانينا))