Nourva ai | نورفا

مشروع كرانل من المشاريع اللي أغبط مؤسسينها عليه، لأنه مشروع واعد جداً. أشوفهم مظلوم إعلامياً حالياً و ممكن حسب نظرتي البسيطة يا إما يستحوذون عليهم 😅أو راح يدخلون قائمة اليونيكورن في المستقبل. هذا والله مب إعلان لهم وما جربت منصتهم للآن بنفسي، لكن مجرد إعجاب بالأشياء اللي يقدمونها ، الله يبارك لكم فيها ونشوف اسمهم في كل مكان. كرانل باختصار هي منصة سحابية سعودية أسسها @Hajajn200، وفكرتها توفر للمطورين استضافة للتطبيقات وقواعد البيانات وخدمات الذكاء الاصطناعي بدون تعقيد وبأقل إعدادات ممكنة. المنصة مبنية عشان تعطيك سهولة خدمات عالمية مثل Vercel و Railway، لكن بميزة أن سيرفراتهم موجودة في السعودية ومصر وأمريكا وألمانيا والهند، وقريباً بيتوسعون أكثر. هذا الشيء يحل مشكلة توطين البيانات للشركات المحلية ويتوافق مع الأنظمة المحلية. يقدمون رفع الكود مباشرة من Github، قواعد بيانات جاهزة، مساحات تخزين، وشبكة توصيل محتوى CDN. مؤخراً أطلقوا خدمة CranL BaaS اللي تعطيك قواعد بيانات BackEnd مثل Supabase و Convex مدارة بالكامل وتجهز في دقايق. بضغطة زر يعطونك قاعدة بيانات ونظام تسجيل دخول وتخزين ملفات، وعندك Convex اللي تفيد المطورين اللي يحتاجون backend تفاعلي للتطبيقات اللي فيها دردشة وألعاب مثلاً مبني على التايب سكربت في العموم، خدماتهم تناسب المطورين المستقلين والشركات الناشئة اللي يبون يطلقون مشاريعهم بسرعة وبدون ما يوجعون راسهم بإدارة السيرفرات. صحيح أن المنصة تعتبر في بداياتها وممكن يكون فيه اخطاء او مشاكل لكن واثق انهم بيحسنونها. اللي يقدمونه واللي أشوف وين رايحين له يذكرني بسلة، كيف إنها بسطت التجارة الإلكترونية للتجار محلياً وخلت أي شخص يفتح متجر بدقايق لين كبرت وصارت يونيكورن. كارنل جالسة تسوي نفس الشيء بالضبط بس للمطورين، تبسط لهم البنية التحتية وتوفر لهم أدوات بضغطة زر وبسيرفرات محلية. صحيح الفئة تختلف لكن مع هبة الـ AI والتعطش اللي حاصل لاطلاق منتجات تقنية، وجود منصة بهذا المستوى من الفهم لاحتياجات السوق التقني شيء يوسع الصدر. تركيزهم على خدمة مطوري الذكاء الاصطناعي وتوطين البيانات بأسعار في متناول الجميع راح يكون هو المفتاح اللي ينقلهم لمرحلة مختلفة تماماً في السنتين الجاية ويخليهم خيار أول لكثير من المشاريع.