راشـد

ماني ب ناسي جميلك يا فريد الجمال مدام لك ف المحاني طلةٍ باهيه اشوف ف عيونك الثنتين ساحة قتال لاصارت اسمن معاذير الغلا واهيه اسهبت لك ف الغزل إلين غار الغزال وسهابتي لجل اشد النعّس الساهيه لو ما خذاك الغرور وما ملاك الدلال ما كان لهّيت فيك العالم اللاهيه جفاك كبريت وفوادي سريع إشتعال تعال .. خل الليالي فيك متباهيه طيوفك احلا ما يمكن ينوجد ف الخيال وعيونك الامره ف القلب و الناهيه وشلون اشوفك وأعامل لهفتي ب آعتدال والداهيه .. لو يشوفك راح في داهيه -

تنتهي كل النقاشات يالفكر العقيم بابتسامة عفو ماهي نفاق ولاريا والله ان القلب باقي على العهد القديم من وفاه يحسب كل المخاليق أوفيا قد خذيت من الليالي جروح فالصميم كثر ما اخذت من يديني حبايب واخويا آتغافل بعض الاحيان عن هرج الغشيم وأستحي لو أكثر الناس مافيها حيا -

تلاشا للوصل ضي وتبدد للفراق صروح وصارت دمعة الفراق على حرف الشعر لوحه يوجه دون وصلك ماتت الفكره ممات الروح ذبحت الشعور اللي تجاوز فكرته نوحه يجيبك طاري اللهفه وصير الهايم المجروح يكثر م كابر على ضيقي وهمش غالي جروحه قدرت اصامد الدنيا وذبحني طاري انك تروح دخيلك يوم قلبي ف يدينك لاتصير اروحه اروحه -

تذكرين ، اللي جمع باقي شتاتك وانتي اجتمعتي لين صرتي ديرته واحبابه تذكرين ، اللي رقيتي في سماه وصنتي كل كلمه قالها في خاطره وكتابه ذاب قلبه في غيابك والبلا .. ما لنتي يا دموعٍ ما تخلّت عن حنين اهدابه قال وينك يـ ام روحي واصدقاي وبنتي وين صوتٍ من غلاه اموت به واحيابه -

الحزن لا شيّد صروحه داخل القلب الحزين يشوف تجديد الجروح الداخليه .. تسليه لو حاول الضايق يقاوم بـ اللسان وبـ اليدين مايقدر يقاوم ضغوط الذكريات المبطيه وش يملك الأنسان غير انه يقول الله يعين ولا أكثر الأمال بين المقبله .. و المقفيه إللي يدور لـ السعاده في وجيه العابرين ماهوب مثل إللي تلاشت من يديه الأمنيه على كثر ماتنقل الاخبار دورات السنين لا زال ما يرفع مقام الحب غير التضحيه وين انت ياللي يا ماشاءالله كل ما تكبر تزين أفنيت زين الجيل هذا بـ العيون المفنيه عودك ليانه كنه ماخذ من نسيم الصبح لين و على استقام الجيد تستاهل رسايل تهنيه من بينك و بين القمر قطعت شكي بـ اليقين متشابهين بـ كل شي الفرق .. فرق التسميه سبحان من سواك من نطفة و من ماءٍ مهين المغريات إللي بدونك ما تسمى مغريه تبين معك الفرحه إللي كم لها عيّت تبين و تصير لامن غبت مثل الحاجه المستعصيه صدري من غيابك بقايا من بقايا الراحلين و من الجفاف العاطفي مثل الديار المسنيه طال انتظاري و إنتظاري ممتلي شوق و حنين مافيه قدره لـ التحمل لو ثلاثه فـ الميه والله ما يقتل فرحة العشاق .. غير الغايبين إليا طرو مع كل غيبة شمس و أنغام أغنيه الشوق لو يقلط له إللي جاهه يفك السجين حقّه ما يقبل فيه لا حذفت عقال ولا ديه -

سارت اقدام القصيد وخلدت للقاف جره بين تصوير الخيال وبين تدوين المحابر والقصيد ..المختلف من لهجته ولا مقره ودك إنـه مايقال الا على افواه المنـابر يستلذ به اللبيب ، وتستنير به المجره منهجٍ فيه الكلام العايدي .. مقطوع دابر عاد انا الي ذاخرلي من بنات الريح حره لانكشف عبر الزمن فرق المظاهر والمخابر قد تحلويت المراره لين ذابت كل مره ماشكيت ظروف وقتي لو صبرت ومت صابر ادري ان الموت مره وادري ان العز مره وادري ان المجد مصنوعٍ من عزوم الاكابر التجارب وجهتني لـ الصواب ولـ المسره يهتدي قلبي لاشفت الذنب في قلبً يكابر وانت يـ الراس الشجيع الي محد يقدر يغره كل حيٍ يعتبر بين السما والارض عابر من معه رايً وجيه ومن حفظ للقلب سره يتقي .. ظلم العبيد ويتقي سلم الجبابر والحياه الي تسوق لك الملذه والمضره ماتساوى منزلتها غير في سور .. المقابر @3oi88

ماقدرت احتوي قلبي عشان اقنعه شاب وأنا ادعي الله يصلحه ويهديه الحقيقة ، ملامحها بدون أقنعه ما أحدٍ جت له الدنيا على ما يبيه وحشة ضلوع صدري والشيم تمنعه وحشة أسوار بيتٍ هاجروا ساكنيه عقب ماكان مليان حياة ، و سعه مابقى الا انعكاس النور منه و اليه في زوايا الغرف لقطات متوزعه من بقايا ابتسامات ، وملامح وجيه اقترب ، كل ما يأشر علي بـ أصبعه راحلٍ كل يوم اشتاق له ، واحتريه ينبلج مثل نور الشمس من مطلعه يوم يبسط على وجه الثرى راحتيه ويتوارى عن انظار الجميع اجمعه مثل حلم اليتيم اللي فقد والديه اه يا حزني اللي ماقدرت اردعه واه يا قلبي اللي ماقدرت احتويه رحت والحلم نجمٍ في سماي اتبعه وجيت بيّاع ، عندي حلم من يشتريه مرني في فصل واحد فصول اربعه أنتهي من فصل ، واطيح فاللي يليه اللي ودعني ، المفروض ما اودعه اتحلوى الطعون اللي تجي من يديه أكثر انسان سامعني ماكنت اسمعه واكثر انسان جارحني تمسكت فيه ضاع من يستحق اقضي حياتي معه في رجا واحدٍ ضيعت عمري عليه _

معك كان العمر فرحة ، وأيام الهوى ، عنوان معك كانت حياتي غير ، وإنصاعت لي ظروفي معك عشت السعاده ، في زمن مامد لي أحضان هقيتك لي أمان ، ولا هقيتك مصدر .. لخوفي حسبتك في سما روحي ، سحاب يروي الظميان وأثـرك البرق ، لامنـه سقط من صعقه ، وقوفي هويتك غصب ، وأسكنتك غلا في محجر الأجفان ولقيتـك خنجر يطعن بظهري من ورى كتوفي تهاوت أكبر أحلامي ، ومات الصبر والنسيان وملامح خيبتي ، ضاعت مابين الوجه وحروفي تعلمت إن أصدق حب ، يخفي خلفه الحرمان وتعلمت إن أجمل وجه ، يخفي خلفه حتوفي وشكرت الجرح من قلبي ، على كشف الذي قد كان ولا عاد أرتجي ضماد ، لجروحي .. ولنزوفي عزاي إني وفيت .. وكنت في وجه الجفا ، إنسان وأحبك رغم هذا .. والوجع ، مستوطن بجوفي -

لا تدانى المسا و الجرح فالصدر خافي زل نصفه دموع و زل نصفه .. كتابه ما درى عن دوافع غربتي و اختلافي غير من تنهش الغربه بـ زهرة شبابه عقد و اكثر مضى من عمر هاك السنافي ما تفانى عشاني ، صار انا بالنيابه كم نزلنا بلاد و كم قطعنا فيافي كنت الاكثر طموح و كان الاكثر رحابه لا تضايقت روح و قلب و احساس دافي اقرب انسان الاقي موطني في اغترابه ماقفه لا ارتكيت و وقفته من خلافي اعمق احساس بين العاطفه و المهابه بالفرح ، بالحزن ، او بالوصل ، و التجافي نفس الابعاد ، حتى بالشعور انتشابه كل حاجه تقربنا ، خطاي اعترافي نظرة الشوق في عيونه رضاه و عتابه اصدق من القصايد و انسجام القوافي لا لمحت العذوبه في نواحي عذابه -

مرني ليل لو مر العرب ما تباته في دواجيه هم وفي مواريه حيره واهني من تعيّشه المليحة حياته لو تبّكيه شوق ولو تموّته غيّره تمنحه ما ينسّي خاطره ذاهباته من ثغرها رضاب ومن شعرها ضفيره يا مبعثر فوادٍ كنت اجمّع شتاته ليه حطمّت من حبك بليا جريره شاعرٍ من عيونك تنهمر مفرداته زِيده من الجمال اللي يخليه اسيره لك عليه القصيد اللي تحفظه رواته شعرٍ تخلدّه الازمان ويكون سيره انت لهفة حشاه وبسملة ذكرياته منك الاشياء لو انها قليله كثيره صار هم النحيل اللي فتنته جماله من تولاه خصرك لا انثنى من يجيره اه يا قلبي اللي ضرته تضحياته ما لجرحه ضماد ولا لكسره جبيره مرهفٍ ذنبه ان غيث السماء من سماته الزهر يلهمه والقد الاهيف يثيره جعل الامال فيني ما تسوي سواته اكحلٍ ما ترك لي قلبٍ يحب غيره شفي العسر وابن ادم طموحه غناته والعسيره على جذب اهتمامي جديره من يعلق على جيد المهاة امنياته ماله الا سراب الجازي المستذيره عاجز الراي لا يندم على شي فاته لا رضى ان الحظوظ اللي تقرر مصيره يا وريث الندى عز الرجل في ثباته سل سيفك قبل يصدى وهو في جفيره التفت بس للي يستحق التفاته الرجل ودك ان حتى عدوه نظيره اعرف شعيل لا جف الحكي في لهاته من يعرف الجمل يعرف رغاه وهديره فارس يعجز اطراف الاسنه مماته ترعبه فكرة انه يحتضر في سريره الظفر يطلب من اللي يبيه استماته والهمم تطلب من اللي شحذها ذخيره بأذن من جلت اسماه وتجلت صفاته وبأمره الشمس يسفر نورها كل ديره يستجيب لـ رجا عبده ويقبل دعاته ما الله اختار شي الا جعل فيه خيره لو جفاك السحاب وشح في غادياته البحر لو يجافيه المطر وش يضيره الغلا عند خلك لا تدور اثباته كل نفسٍ لها عن كل نفسٍ سريره -

لو نشوف المحال .. و مانشوف الذريعه مستحيل اتركك لـ الناس و أعلن نزوحي ماعرفت الجمال ، إلا جمال الطبيعه و من جمالك تجملتي علي بـ جروحي كنت أشوف الوحيد أيام عمره مريعه لين شفت الغلا متمكنٍ : في وضوحي احمد الله على الوحده و أجله و أطيعه يوم فكرت احبك .. صرت احبك بروحي انا واحد من اللي ينصرون الشريعه ليه ما تنصرين اللي بقى من طموحي كان ودك تجوبين الحياه الوسيعه اخذي روحي وخليني لحالي و روحي -

بالكاد أصارعك يا جندٍ من اللّٰه مدار نسايمك تاسر الراحه من احلافها ذكّرتني بالشعور الصب والإنبهار يا وجد نفسي سببك ويا تلهافها شف ويني ووين كان احساسي ووين صار بعض النسايم تخلّي الواحد يخافها على كثر ما قنعت النفس بالإنتصار على كثر ما اتضح بالواقع خلافها سراقة الروح , ملاذ الطيور الصغار لا هاجرت تمّن العشّه على اكتافها لا شارفت نفسي الولهه على الإنهيار فكت روابط ضفايرها على أطرافها واسترسلت بالسوالف لين طل النهار سوالفٍ فاقد الأسماع ما عافها مسافة القرب ما بيني ، وبين الزرار ما تعطي النفس قدره تلزم أعرافها مرت سنيني معك مثل الليال القصار ليت السنين الجميله ترجع خلافها كثر الحزن في وداعك ، واتخاذ القرار أصعب على نفسي من الناس واجحافها آخر طلب دام صار الذنب فالإختيار لحظاتي اللي تبقت ودك اتلافها لوحة خشب ماهي بمتعلقه بالجدار منسيةٍ فوق الأرفف تطلب إسعافها ما ودي انك عليها تمسحين الغبار لين الحياه الجديده تاخذ اهدافها 🙏🏻

تبجحي بي واسرفي بي ما عليك من الكلام أنا معك ما قل مخزوني .. ولا بان تعبي -

لا ياخذك السفر مني .. وتجبرك الظروف تغيب وانا اكثر من عرف معنى الظروف وغيبة الغالي ترا اللي مكتفي بك .. تدري انه مكتفي تعذيب تفجّر صدره ينادي عليك بـ صوته العالي نقبت الارض ادور لـ الحياه وغرني التنّقيب اثر ما لي طريق .. الا الطريق اللي على بالي تعال الحق علي حتى ولو من باب فعل الطيب اشوف الموت شوف العين ماشوفه يورى لي فقدت البسمه اللي ماوراها الا صدى الترحيب مع اني ما افتقد طيفك مع حلي و ترحالي بعد ماصرت انا اكثر من يمر بـ مرحلة تغريب معاد يهمني .. حتى غروب الشمس من تالي توارت عبرتي لكن قدر يكشف عناي الشيب ما كني كنت ابدد حسرتي و اكبر امالي مادام انك حبيبي ياحبيبي إللي تسوي عيب طلبتك لا تخليني ضحيه و اللطف بـ حالي بدونك عمري الباقي لو انه طول عمر شعيب لايطري في خيالك لحظه اني صرت متشالي تذكرني لاصدو كل من غروك بـ الترتيب هذيك اللحظه بـ تلقاني إللي جنبك لحالي -

ضاق بالي و الطواري مؤسفه .. و الجو هادي وش يسوي من يعيش العمر بـ النفس الكريمه راحت أحلامي ضحيّه من سبب لحظة عنادي لين ما صارت حياتي كنها مسرح جريمه ودي أبلغ حلمي الزاهي .. قبل يوم التنادي خايف إن الحلم يصبح مثل نارٍ في هشيمه عند عزة نفسي أصدح .. لا شداد إلا شدادي العزيز يموت ما يترك غرام شداد ريمه كل شخص من البشر عنده قناعات و مبادي ليه آساوم من يشوف إن وجهة دروبه سليمه أدري إن الناس مابين التصاحب .. و التعادي بس عيب إللي ليا خاصم ينقص من خصيمه عشت بين الفوضويه .. و الشعور آللا إرادي و ذكريات العمر تجرح قلبي و تطعن صميمه الهنوف إللي خذت قلبي .. و خلتني مفادي آتركت نفسي تشوف من الفراق أكبر ظليمه ( يوم آنادي لـ المواصل .. لا حياة لـ من تنادي ما بقى لي غير صوره من ليالينا القديمه ) مستحيل إني أوقف فـ الهوى موقف حيادي كيف أعيش الحب من دون التفاني و العزيمه لو توريني طريق الموت فيها .. قلت عادي كل غالي لأجله نعيش الغلا بـ أجمل هزيمه مادريت إن ساعة الفرقى ، مثل سل الهنادي لين ماشفت الغرام يزيد و جروحي جسيمه إغتربت بـ عالم الذكرى .. و أنا داخل بلادي و كل لحظه عشت فيها تعتبر قصه عظيمه -

بتحدك مقادير الدهر ، والليالي العوج على جمرةٍ .. مالك على لمسها حاجه 👌🏼

كانك تبين الصدق عودت استخير ولقيت حبك لحظتين وفاصله من مولده في قلبي ، ليومه الاخير وهو سرابٍ ماقدرنا ناصله ماعاد ابي من خيره إذا فيه خير تعبت من هجماته المتواصله عن وجعتي ! بحاول انها ماتصير وعن رجعتي ؟ ماهيب والله حاصله أبتركك بين الحسافه والضمير دامك على درب الفراق مواصله وببقى في ذاكرتك مثل حلم الفقير الي بنى له حلم .. ماهب واصله -

القصيد اللي يسمّونه قصيد الله يديمه كنّ فيه الشاعريّه من يدورها وجدها ودي اعطيكم قصيده تعطي الموضوع قيمه للّي ايقولون اسلم و اللي ايقولون عدها قمت اراجع ذكريات الحب لو مافيه شيمه و جاتني بعض البيوت اللي تجي على وعدها فاقدٍ لي تحفةٍ نسيانها ذنب و ظليمه الوطن هذا وطنها و البلد هذا بلدها الشموخ اللي محبتها ولو غابت مقيمه بينها و بيني مقادير الزمن تبذل جهدها هي عظيمه بس و الله مادريت انها عظيمه لين قالو مايعرف الحاجه الاّ من فقدها قمت اشكّ انّ رمشها غيمه وهو ماهوب غيمه و قمت اشكّ ان الهوى و هو الهوى يوجع جسدهاا و قمت اشك ان ريحها ريح المطر ولا نسيمه و قمت أشكّ انها كذا من يوم كانت في مهدهاا من غلاها اعتبرها مثل الاحجار الكريمه ضعت بين أعظم مفاتنها و تسريحة جعدها في بعض الاحيان كنها ترتكب فيني جريمه بـ الدلع و الضحكه و بعض الامور امرّ و ادها ثوبها اللي تلبسه ذنبه مثل ذنب النميمه خلّ عاد ان مال مبريها من اللين و جحدها بنت رجالٍ مضريهاا على ذبّ الخريمه كثر مافيها حيا كنّ الحيا فيها وحدها كل يوم تقول ذالبنت امعزومه في عزيمه كل حاجه تلفت الانظار كنها تعتمدها إلتفاتتها غنيمه و ابتسامتها غنيمه من اللي باقي من بنات آدم و احوّ ماحسدها قدّ وصلت الـ مرحله فيها الطواري مستديمه اي شاعر لا تغزّل قلت يمكنّه قصدها حبّها نارٍ حياتي فيه و آكل من جحيمه عنده اصابع يديّ مانيب عارف كم عددها و الله ان حبي لها سليم و النيه سليمه من قبل لا تعرف ابو بنتها و ابو ولدها أول ايام الهوى كانت علاقتنا حميمه واخر الايام قامت تنتقدني وانتقدها رغم كل اللي كتبته فرحتي فيها يتيمه ماهو ابـ مرضيني الاّ قلبها من عند يدها في هواها ماكتبت الاّ غزليّه قديمه وحده و يمكن ماعاد اكتب غزليّه بعدها

@alotaibi_3 🙏🏻

كلّما يصلاك قلبك كان قلبك حامي حد ركبك لـ الضلوع المعشبات وسوقه الله عليك

يا أكثر أحلامي من الدنيا وزهر أيامي الهوى مانيب تحت أمره ولا آني فوقه لي متى بتكون مصدر ضحكتي و إلهامي للربيع ولـ المزون اللي تشوق بروقه ما حدٍ يرمي صوابي لو ما أنت برامي غيرك ، ولا غيرك يعل الحشا و يعوقه ترجع من الغيبه و تقصر معاك أقدامي و أمتثل لك عاشقٍ تشويه جذوة شوقه خل عنك الشاعر البناتي الأعلامي و أسمع اللي ترقص القمرا على طاروقه أنت فيك اللي يحرك راكدات أقلامي شيٍ الله حايفه بعنايته و وفوقه لا تعف ولا تشح بزينك الأجرامي كان لك خاطر يدور بالغرام حقوقه بالقوام اليعربي ولا البياض الشامي أسحب القلب الملدد عنك بمعلوقه ودي أعلق عقب طول الغياب أعلامي في نحرك المنقسم ورقبتك المنتوقه ولا آني براكد عليك ومعلن أستسلامي لين أعزل الشهد في راحة يدي وأذوقه خلّني دام الزمن للحين رهن إسهامي و خل نفسي تشبع من ملاوحك وتتوقه ما وراي أهم من وجهك ولا قدامي أبتسم وأضحك على غيباتك الممحوقه مستعد أضيع في مشوارك المترامي لين يفنى دمي اللي ما تجفّ عروقه ما مع وصلك وصال إلا وصال أرحامي يا بعد من يفتخر بإمجاده المسروقه لا تحشد وأنت ولاد الشعور النامي الليالي كلها مطرودةٍ ملحوقه كلّما يصلاك قلبك كان قلبك حامي حد ركبك لـ الضلوع المعشبات وسوقه 👌🏼