بندر

انطباعي عن الموسم الثالث من Succession بعد نهاية الموسم الثاني وعنصر المفاجأة في الحلقة الأخيرة، كانت توقعاتي عالية جدًا تجاه الموسم الثالث، وكان واضح إن الموسم داخل على تصعيد أكبر، وهذا اللي حصل لوغان في هذا الموسم يرجع يثبت ليش هو مركز القوة الحقيقي في العائلة، مهما تصير ضده مشاكل أو محاولات إسقاط يظل يعرف كيف يقلب الوضع لصالحه، نشوفه أكثر هدوء وثبات مقارنة بباقي الشخصيات، وكل واحد حوله يحاول يكسب رضاه أو يضمن مكانه عنده ومع تدهور حالته الصحية يبدأ يفكر بالمستقبل أكثر وإمكانية بيع الشركة كحل يضمن استمرار نفوذه ومستقبل العائلة، وبعد يخسر واحد من أقوى تحالفاته وهو الرئيس وهذا يبين إن حتى نفوذه السياسي بدأ يتأثر، ومع هذا لما تبدأ الأمور تخرج عن سيطرته يظل يعرف كيف يستخدم خوفهم وطمعهم عشان يرجع يمسك اللعبة من جديد، ومع نهاية الموسم يثبت مرة ثانية إنه ما زال اللاعب الأقوى داخل العائلة والشركة كيندال في هذا الموسم نشوفه داخل دوامة نفسية بعد لحظة صعوده في نهاية الموسم السابق لما فضح أبوه، لكنه سرعان ما يبدأ يفقد الزخم ويعيش صراع داخلي بين صورته كـ (منقذ) وبين ضعفه الحقيقي، ويحاول يثبت نفسه قدام الإعلام والعائلة لكنه ينهار أكثر مع الوقت، وكل مرة يحاول فيها يثبت أدلة ضد لوغان نشوفها تضعف تدريجيًا وهذا يزيد من ضعفه وضياعه، وبعد كل محاولة منه لكسب أي شخص في صفه غالبًا تفشل أو تنقلب عليه، وأهم لحظة فيه كانت اعترافه قدام إخوانه بحادثة قتل النادل، وهذا الاعتراف يكشف هشاشته أكثر ويزيد تعقيد وضعه النفسي، وكل ما يحاول يطلع من ظل لوغان يرجع يطيح داخليًا ويضيع بين الشعور بالذنب والرغبة في السيطرة، ومع نهاية الموسم يظل عالق في نفس الدائرة بدون استقرار حقيقي شيف في هذا الموسم نشوفها تاخذ دور مهم داخل الشركة كمديرة العمليات المحلية، وهذا يعطيها تأثير أكبر داخل القرارات والصفقات، ونشوف كيف قدرت تساعد الشركة فعليًا في أكثر من موقف وتعقد صفقات مهمة، لكنها في نفس الوقت أحيانًا تمشي خلف مصالحها الشخصية حتى لو على حساب مصلحة العائلة، وعلاقتها مع توم كانت متوترة طول الموسم وفيها عدم توازن واضح، وهذا التوتر وصل لمرحلة انفجار في النهاية وخلا توم يتحول ضدها ويتحالف مع لوغان، ومع كل هذا تبقى شخصية تتحرك بذكاء داخل الصراع وقراراتها كثير منها يكون مبني على المصلحة أكثر من أي شيء ثاني، وتعتبر من أبرز نجوم هذا الموسم رومان في هذا الموسم كان من أبرز نجومه وأكثر شخصية كان لها دور واضح، نشوف ثقة لوغان فيه واعتماده عليه بشكل أكبر داخل الشركة، وحتى نشوفه يعقد صفقات أكبر من السابق ويتحمل مسؤوليات حساسة في التواصل والاتفاقات، وأحيانًا كان لوغان يفضله على شيف وكيندال في بعض المواقف ويعطيه مهام مباشرة ومهمة، ومع جيري نشوف علاقة أقرب للتفاهم وفيها تأثير واضح على قراراته ونضجه داخل الشركة، ونشوف رومان يسوي كل شيء لابوه ويهتم في أمره ويحاول يرضيه بأي طريقة، لكنه في نفس الوقت يظل متذبذب بين ثقته بنفسه وتأثره بقرارات لوغان، ومع كل هذا نشوفه ينهار نفسيًا في أكثر من موقف لما تنقلب عليه قرارات لوغان أو يحس إنه مو في الصورة بشكل كامل وفي نهاية الموسم نشوف اتحاد الإخوان الثلاثة كيندال وشيف ورومان لأول مرة بشكل واضح ضد لوغان، ويحاولون يتفقون على منع الصفقة والسيطرة على الشركة مع بعض، وفي اللحظة الحاسمة تنقلب الأمور عليهم بشكل صادم بعد خيانة أمهم لهم ودعمها لقرار لوغان، وهذا يخلي خطتهم تفشل وينتهي الموسم وهم في حالة صدمة وانكسار بعد ما كانوا قريبين من قلب الطاولة كونور في هذا الموسم نشوفه يحاول يحصل على مكان داخل الشركة رغم إنه كان غير مبالي سابقًا، ونشوف اهتمامه بشكل أكبر بالجانب السياسي ومحاولته يترشح لرئاسة أمريكا، ومع إنه بعيد عن صلب صراعات الشركة الأساسية إلا إن وجوده كان له حضور خفيف ومؤثر أحيانًا، ودوره كان جيد في هذا الموسم، وممكن نشوف له أهمية أكبر في الموسم الأخير توم كان صدمة الموسم، نشوف تخبط علاقته بشيف مع خوف دائم من السجن بسبب أشياء سواها سابقًا، ومع طموح واضح إنه يثبت نفسه داخل الشركة، وفي النهاية يقرر يسلم خطة الإخوان إلى لوغان ويفضل مصلحته على أي ولاء سابق، أما غريغ فكان متخبط وما يعرف ينحاز لمن، ويحاول يأمن مستقبله ويستفيد من قربه من توم ولوغان، ومع الوقت بدأ يتحول لشخص أكثر انتهازية ويوازن بينهم حسب مصلحته، وبشكل عام الاثنين كانوا يتحركون بدافع البقاء أكثر من أي شيء ثاني وبشكل عام الموسم الثالث كان من أقوى المواسم تصعيدًا، مليان صراعات وانقلابات بين الشخصيات، ونهاية صادمة رفعت التوتر لمستوى أعلى ومهدت بشكل قوي للموسم الأخير تقيم الموسم الثالث 10/10

أيش هي المراجعة اللي كتبتوها ومرت عليها أيام وللان متواجده في بالكم؟

سول مستغرب ليه محد يعامله بجدية الأطقم يلبسها كل يوم:

what’s the story behind your Letterboxd profile pic?

#فقرة | أربعة الجمعة شاركنا آخر 4 أفلام شاهدتها.